រាជធានីភ្នំពេញ ៖ រយៈពេលជិតកន្លះខែមកហើយដែលហេតុការណ៍ផ្ទុះអាវុធបង្ក្រាបក្រុមអ្នកផឹកស្រានៅក្នុងវត្តអធ្វា (ខ្លះថានៅក្រៅវត្ត) បានធ្វើឱ្យនាងស្វែង សុជាតា ដែលជាតារាភាពយន្តឆ្នាសឆ្នើមម្នាក់បានរបួសដៃស្តាំ និងអ្នកថតភាពយន្ត២នាក់ត្រូវបានចាប់ខ្លួនដាក់ពន្ធនាគារ។ ការទាក់ទងតាមទូរស័ព្ទអ្នកនាងស្វែង សុជាតា និយាយថា ដៃរបួសកំរើកបានខ្លះៗហើយ ព្រោះឆ្អឹងដែលបាក់បានតរួចរាល់។ នាងបន្តថា ដោយសារមុខរបួសធំពេក ទើបការព្យាបាលយូរ។ អ្នកនាងស្វែង សុជាតា បន្តថា ប្រហែលមួយខែ ឬមួយខែកន្លះទៀតអាចនឹងជាសះស្បើយធម្មតាដូចដើមវិញ។ នាងឱ្យដឹងថា នៅក្នុងឆ្នាំ២០១០នេះ នាងទើបតែចេញថតរឿង”ព្រាយដំបូក” ឬ “រឿងវេនកម្ម” ក៏ជួបគ្រោះថ្នាក់តែម្តង។ ទោះបីជាបែបណានាងមានកុងត្រាថតរឿងមួយចំនួនទៀតតែមិនទាន់ចេញថត។
ចំពោះរឿងរលកសំលេង គឺបានថតចប់ផុតកុងត្រាហើយ ដែលរឿងនេះកំពុងដាក់បញ្ចាំងនៅលើកញ្ចក់ទូរទស្សន៍ CTN ។ រឿងព្រាយដំបូកដែលបង្កឱ្យមានបញ្ហាកន្លងមកនេះមិនទាន់ថតចប់សព្វគ្រប់នោះទេ។ ទាក់ទងនឹងរឿងរ៉ាវដែលថានាងនឹងដាក់ពាក្យប្តឹងនោះ នាងបានបដិសេធថា នាងមិនប្តឹងទេ។ នាងនិយាយថា នាងខ្ញុំលើកលែងអភ័យទោសឱ្យគ្រប់គ្នាទាំងអស់។ ចំពោះថាអង្គការក្រៅរដ្ឋាភិបាលមួយចំនួនចង់ជួយនាងប្តឹងពីរឿងរ៉ាវដែលកើតឡើងនោះ នាងនិយាយថា នាងបានពិភាក្សាសំរួលគ្នារួចរាល់ហើយ មិនឱ្យមានការប្តឹងអ្វីទាំងអស់សូមបញ្ចប់ត្រឹមនេះទៅចុះ។ ការមិនប្តឹងនេះនាងនិយាយថា នាងខ្ញុំធ្វើដើម្បីអ្នកទាំងអស់គ្នា ដោយមិនចង់ឱ្យអ្នកដែលមិនដឹងអ្វីជាប់គុកនោះឡើយ។ ដូច្នេះរឿងនេះនាងខ្ញុំសូមបញ្ចប់ហើយ។
ចំពោះការថតបន្តនៅពេលនាងជាសះស្បើយ នាងស្វែង សុជាតា ថា នាងត្រៀមនឹងសំដែងថតបញ្ចប់រឿងឱ្យគេបើចាំបាច់។ អ្នកស្រីភរិយាលោកម្ចាស់ផលិតកម្មសាវីនប្រូដាកសិនបានឱ្យដឹងថា ការថតបន្តបញ្ចប់សាច់រឿងនោះ ផលិតកម្ម និងក្រុមការងារមិនទាន់សំរេចគ្នាបែបណានៅឡើយទេ ព្រោះមិនទាន់បានពិភាក្សាគ្នា។ ចំណែកស្វាមីរបស់អ្នកស្រីពេលនេះមិននៅជិតគ្នាទេ គឺនៅឆ្ងាយពីគ្នា ដូច្នេះមិនទាន់ច្បាស់ថា ត្រូវថតបន្ត ឬក៏ផ្អាកនោះឡើយ ដោយរង់ចាំការពិភាក្សាគ្នាសិន។
គួររំលឹកថា កាលពីវេលាម៉ោង១២យប់ ថ្ងៃទី២៩ តុលា ឆ្នាំ២០១០ អំពើហិង្សាដោយមានការផ្ទុះអាវុធពីសំណាក់កម្លាំងប៉េអឹម នៅក្នុងបរិវេណវត្តអធ្វា បង្កឡើងដោយក្រុមអ្នកថតភាពយន្តរឿង «វេនកម្ម» របស់ផលិតកម្មសាវីនប្រូដាកសិនដែលនាំគ្នាផឹកស៊ីស្រវឹងអួទីនួនិយាយគ្នាលែងស្តាប់។ ខណៈនោះក៏កើតជំលោះពាក្យសំដីយ៉ាងតឹងសរសៃកជាមួយម្ចាស់ផលិតកម្ម រួចឈានទៅវាយសមត្ថកិច្ចដែលចុះទៅធ្វើអន្តរាគមន៍ឱ្យរបួសបែកក្បាលហូរឈាមជោកខ្លួនចំនួន២នាក់ មុននឹងមានការផ្ទុះអាវុធជាច្រើនគ្រាប់បណ្តាលឱ្យត្រូវតួឯកស្រីនាងស្វែង សុជាតា ។
ជនជាប់ចោទទាំង៤នាក់ត្រូវចាប់ខ្លួនមាន ១-ឈ្មោះអឹម សៀកឡេង ភេទប្រុស អាយុ២១ឆ្នាំ ជានិស្សិតឆ្នាំទី៣ ផ្នែកគីមីវិទ្យា នៃសាកលវិទ្យាល័យតិចណូ ២-ឈ្មោះជុំ វិឆៃ ភេទប្រុស អាយុ២២ឆ្នាំ រស់នៅភូមិអភិវឌ្ឍន៍យោធិនពិការ៣១៧ នៅតាកែនកោះស្លា ខេត្តកំពត អ្នកទាំងពីរនេះជាអ្នកថតភាពយន្តឱ្យផលិតកម្ម «សាវីនប្រូដាកសិន»។ ៣-ឈ្មោះសាយ សុផេង ភេទប្រុស អាយុ២៩ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប និង៤-ឈ្មោះខ្វា ផុល អាយុ៤២ឆ្នាំ រស់នៅភូមិជ្រាង សង្កាត់ជ្រាវ ។
ព្រះរាជអាជ្ញារងអមសាលាដំបូងខេត្តសៀមរាប-ឧត្តរមានជ័យ លោកតូច សុភក្តី បញ្ជាក់ថា ក្នុងចំណោមជនជាប់ចោទទាំង៤នាក់នោះ ឈ្មោះអឹម សៀកឡេង ត្រូវបានរកឃើញថាជាជនដៃដល់វាយទៅលើកម្លាំងប៉េអឹមចំនួនពីររូបបណ្ដាលឱ្យបែកក្បាលគឺលោកវរសេនីយ៍ត្រីវូ សុភេន នាយរងមន្ទីរប្រតិបត្ដការនៃបញ្ជាការដ្ឋានកងរាជអាវុធហត្ថខេត្ដសៀមរាប និងលោកអនុសេនីយ៍ទោ ឆាយ រ៉ង ខណៈពេលដែលពួកគាត់ចុះទៅធ្វើអន្ដរាគមន៍ជម្លោះពាក្យសំដីរវាងក្រុមថតភាពយន្ដជាមួយម្ចាស់ផលិតកម្ម។
ចំណែកលោកទី សុវិនថាល់ ព្រះរាជអាជា្ញអមសាលាដំបូងសៀមរាប-ឧត្ដរមានជ័យ នៅថ្ងៃដដែលនោះដែរបានមានប្រសាសន៍ប្រាប់ថា ជនជាប់ចោទទាំង៤នាក់នោះត្រូវបានតុលាការសម្រេចធ្វើការឃុំខ្លួនជាបណ្ដោះអាសន្ននៅពន្ធនាគារ ព្រោះមានភស្ដុតាងមិនអាចប្រកែកបាន។
លោកប៉ិច សាវីន ដែលអះអាងខ្លួនថា ជាថៅកែផលិតកម្មសាវីនប្រូដាកសិន ហើយបជួបរឿងចំរូងចំរាសនាពេលថតរឿងខ្មោចនោះនិយាយថា ក្រុមហ៊ុនលោកបានចំណាយលុយប្រមាណជាង ៦ពាន់ដុល្លារក្នុងការថតរឿងមួយដែលមានចំណងជើងថា «វេនកម្ម» ប៉ុន្ដែនៅឈុតបញ្ចប់ដែលមានរយៈពេលប្រមាណជា២ទៅ៣នាទីតែប៉ុណ្ណោះ យើងត្រូវជ្រើសរើសទីតាំងវត្ដអធា្វនេះដើម្បីថតស្រាប់តែជួបរឿងដ៏អាក្រក់បែបហ្នឹង។ លោកបានបញ្ជាក់បន្ថែមថា រឿងហេតុវាកើតឡើងដោយសារតែពួកគេបាននាំគ្នាផឹកស៊ី និងចាក់ធុងបាស់កងរំពងផ្អើលអស់អ្នកភូមិ ហើយលោកបានតំរូវឱ្យបញ្ឈប់ជាច្រើនដង តែគេមិនស្ដាប់ ផ្ទុយទៅវិញពួកគេបានហៅក្មេងកាងប្រចាំភូមិមកស្ទាក់ផ្លូវក្នុងបំណងវាយរូបលោកទៀត ទើបលោកប្ដឹងសមត្ថកិច្ចប៉េអឹមឱ្យមកជួយអន្ដរាគមន៍។
លោកបានបញ្ជាក់ទៀតថា នៅពេលដែលសមត្ថកិច្ចចុះមកដល់ក្រុមការងារមួយចំនួនបានបញ្ឈប់ និងចូលទៅកន្លែងស្នាក់នៅអស់ហើយ នៅសល់តែមួយចំនួនខ្លះកាន់ដំបងវែង-ខ្លី បានសំរុកវាយមកលើក្រុមសមត្ថកិច្ចរហូតដល់បែកក្បាលទើបមានការផ្ទុះអាវុធត្រូវចំដៃតួឯកស្រី នាងស្វែង សុជាតា មួយគ្រាប់៕
ចែករំលែកព័តមាននេះ