ខេត្តសៀមរាប៖ សមត្ថកិច្ចបានឱ្យដឹងថា មានពលរដ្ឋ៣នាក់ទៅស៊ីឈ្នួលចុះស្តារអណ្តូងលូចាស់ឱ្យគេ ស្រាប់តែចៃដន្យអាក្រក់បណ្តាលឱ្យប៉ះពាល់ដល់អាយុជិវីតរហូត២នាក់ភ្លាមៗ រីឯម្នាក់ទៀតរួចផុតពី
គ្រោះថ្នាក់ដ៏រន្ធត់នេះ ។ ហេតុការណ៍ បង្កការភ្ញាក់ផ្អើលកើតឡើងកាលពីវេលាម៉ោង៧ព្រឹកថ្ងៃទី២៥ មេសា នេះ ស្ថិតនៅតាមបណ្តោយផ្លូវជាតិលេខ៦ ក្នុងភូមិឪឡោកឃុំបាគង ស្រុកប្រាសាទបាគង ខេត្តសៀមរាប។មូលហេតុនោះ គឺដោយសារអត់អ៊ុកស៊ីហ្សែន ។
លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគងបានឱ្យដឹងថា ករណីចុះស្តារអណ្ដូង ដែលមានជម្រៅ៧ម៉ែត្រនៅភូមិឪឡោក ឃុំបាគង បណ្ដាលឱ្យមានមនុស្សស្លាប់២នាក់ ម្នាក់ឈ្មោះ ឈុត ស៊ាន ភេទប្រុស អាយុ៣៩ឆ្នាំ និងម្នាក់ទៀត ឈ្មោះ យឿម.រ៉ាត់ ភេទប្រុស អាយុ៤៧ឆ្នាំ ទាំង២នាក់រស់នៅភូមិស្ទឹង ឃុំបាគង ស្រុកប្រាសាទបាគង ។
ចំណែកម្ចាស់ផ្ទះ មានឈ្មោះ ធិត.សួន(ហៅប៉ក់ ភេទស្រី អាយុ៤៥ឆ្នាំ នៅភូមិឪឡោក ជាអ្នកជួលក្នុង១នាក់ តម្លៃ៣០០០០រៀល ។ លោកបន្តថា តាមការសន្និដ្ឋាន និងធ្វើកោសល្យវិច័យបានឱ្យដឹងថា ករណីស្លាប់នេះ គឺបណ្តាលមកពីខ្វះអ៊ុកស៊ីហ្សែនដកដង្ហើមក្នុងអណ្តូងលូ ។ លោកបន្ថែមថា បន្ទាប់ពីសមត្ថកិច្ចធ្វើកោសល្យវិច័យរួច ក៏ប្រគល់សពទាំង២ទៅឱ្យក្រុមគ្រួសារធ្វើបុណ្យតាមប្រពៃណី ។
ចែករំលែកព័តមាននេះ