ខេត្តប៉ៃលិន ៖ យោងតាមរបាយការណ៍នៃស្នងការនគរបាលខេត្តប៉ៃលិនបានឱ្យដឹងថា កាលពីវេលាម៉ោង៤ និង៣០នាទីរសៀលថ្ងៃទី២៣ ខែមេសា ឆ្នាំ២០២០ មានភ្លៀងធ្លាក់លាយឡំខ្យល់កន្ត្រាក់ បណ្តាលអោយប៉ើងដំបូលផ្ទះប្រជាពលរដ្ឋចំនួន៦៧ផ្ទះ និងរបើកដំបូលសាលាសង្កាត់១ខ្នង…
ខេត្តប៉ៃលិន ៖ យោងតាមរបាយការណ៍នៃស្នងការនគរបាលខេត្តប៉ៃលិនបានឱ្យដឹងថា កាលពីវេលាម៉ោង៤ និង៣០នាទីរសៀលថ្ងៃទី២៣ ខែមេសា ឆ្នាំ២០២០ មានភ្លៀងធ្លាក់លាយឡំខ្យល់កន្ត្រាក់ បណ្តាលអោយប៉ើងដំបូលផ្ទះប្រជាពលរដ្ឋចំនួន៦៧ផ្ទះ និងរបើកដំបូលសាលាសង្កាត់១ខ្នង រលំស្លាកគណបក្ស១ផ្ទាំងធំ ។
ខ្យល់កន្ត្រាក់នេះ បានធ្វើឱ្យរលំដើមឈើកាត់ផ្លូវ និងដាច់ខ្សែភ្លើងផងដែរ ។
តាមរបាយការណ៍បានឱ្យដឹងទៀតថា នៅក្នុងក្រុងប៉ៃលិនរងការខូចខាតផ្ទះចំនួន៧ខ្នង រួមមាន ១-ឈ្មោះ យឹម សាមេត ភេទស្រី អាយុ៤៧ឆ្នាំ ជាម្ចាស់ផ្ទះទំហំ៥ម៉ែត្រគុណនឹង១១ម៉ែត្រ រងការខូចខាតដំបូលស័ង្កសី ប្រហែល៥០% ២-ឈ្មោះ ព្រុំ សុីថា អាយុ៦២ឆ្នាំ ភេទប្រុស ជាម្ចាស់ផ្ទះទំហំ៧ម៉ែត្រគុណនឹង៨ម៉ែត្រ រងការខូចខាតដំបូលទាំងស្រុង ៣-ឈ្មោះ ថា ស្រីម៉ៅ ភេទស្រី អាយុ៣១ឆ្នាំ ជាម្ចាស់រោងលក់ចាប់ហួយ ទំហំ៣ម៉ែត្រគុណនឹង៥ម៉ែត្រ រងការខូចខាតរបើកស័ង្កសីចំនួន៣សន្លឹក និងផ្ទះទំហំ៦ម៉ែត្រគុណនឹង៩ម៉ែត្រ រងការខូចខាតហ្វ៊ីប្រូចំនួន៦សន្លឹក ៤-ឈ្មោះ កាន់ គា ភេទប្រុស អាយុ៥៦ឆ្នាំ ជាម្ចាស់រោងលក់បបរប្រក់ស័ង្កសី មានទំហំ២ម៉ែត្រគុណនឹង៣ម៉ែត្រ រងការខូចខាតទាំងស្រុង ។
៥-ឈ្មោះ មុំ ចាន់លីន ភេទស្រី អាយុ៣២ឆ្នាំ ជាម្ចាស់ផ្ទះទំហំ៥ម៉ែត្រគុណនឹង៦ម៉ែត្រ រងការខូចខាតរបើកដំបូលស័ង្កសីទាំងស្រុង ៦-ឈ្មោះ មុំ ដា ភេទប្រុស អាយុ៥៤ឆ្នាំ ជាម្ចាស់ផ្ទះទំហំ៥ម៉ែត្រគុណនឹង៧ម៉ែត្រ រងការខូចខាតរបើកដំបូលហ្វ៊ីប្រូប្រហែល៥០% ៧-សាលាសង្កាត់បរយ៉ាខា រងការខូចខាតក្បឿងប្រហែល៥០សន្លឹក និងរលំស្លាកគណបក្សចំនួន១ផ្ទាំង ហើយរលំដើមឈើកាត់ផ្លូវ ដាច់ធ្លាក់ខ្សែភ្លើងនៅផ្លូវជាតិលេខ៥៧ ក្នុងភូមិទួលល្វា សង្កាត់ទួលល្វា ក្រុងប៉ៃលិន បណ្តាលឱ្យកកស្ទះចរាចរណ៍ជិត១ម៉ោង ។
ចំណែកនៅស្រុកសាលាក្រៅចំនួន៦០ខ្នងផ្ទះ ៖ ក្នុងឃុំស្ទឹងកាច់រងការខូចខាតផ្ទះចំនួន៣ខ្នង ក្នុងឃុំអូរអណ្ដូងរងការខូចខាតផ្ទះចំនួន៥ខ្នង និងនៅក្នុងឃុំស្ទឹងត្រង់រងការខូចខាតផ្ទះចំនួន៥២ខ្នង តែមិនបណ្តាលឱ្យរងរបួសនរណាម្នាក់នោះទេ ៕ (កែសម្រួលដោយ ៖ ធីតា)
ចែករំលែកព័តមាននេះ