ប្រទេសកាណាដា ៖ វេជ្ជបណ្ឌិតជឿថា ស្ត្រីម្នាក់ដែលបានរួចផុតពីគ្រោះថ្នាក់ដោយគ្រាប់កាំភ្លើងជិតនឹងទ្រូង ត្រូវបានសង្គ្រោះនោះ គឺដោយសារតែស៊ីលីកូនក្នុងសុដន់របស់នាង។ នេះបើយោងតាមសារព័ត៌មាន CNN។
ឧប្បត្តិហេតុដែលបានកើតឡើងក្នុងឆ្នាំ២០១៨ នៅទីក្រុងតូរ៉ុនតូ ប្រទេសកាណាដា គឺជាករណីមួយក្នុងចំណោមករណីមួយចំនួនដែលបានកត់ត្រានៅក្នុងអក្សរសិល្ប៍វេជ្ជសាស្ត្រ ដែលសុដន់ស៊ីលីកូន បានជួយសង្គ្រោះអាយុជីវិតរបស់ស្ត្រីម្នាក់ បើតាមសម្តីរបស់វេជ្ជបណ្ឌិត Giancarlo McEvenue ដែលបានប្រាប់ CNN។
វេជ្ជបណ្ឌិតរូបនេះ បានកត់សម្គាល់ថា សុដន់ស៊ីលីកូន ទំនងជាបានធ្វើឱ្យគ្រាប់កាំភ្លើងផ្លាតចេញពីចំណុចសំខាន់នៅលើរាងកាយរបស់ស្ត្រីម្នាក់នោះ។ ទោះបីជាព័ត៌មានលម្អិតនៃការបាញ់ប្រហារនៅមិនទាន់ច្បាស់ក៏ដោយ គ្រូពេទ្យវះកាត់ McEvenue បានប្រាប់ CNN ថា ស្ត្រីនោះបានដើរចូលទៅមន្ទីរសង្គ្រោះបន្ទាន់ក្នុងតំបន់ ដើម្បីស្វែងរកការព្យាបាល បន្ទាប់ពីត្រូវបានបាញ់ចំទ្រូង។
វេជ្ជបណ្ឌិត McEvenue បានប្រាប់ថា គ្រាប់កាំភ្លើងបានបាញ់ចូលនៅសុដន់ខាងឆ្វេងរបស់ស្ត្រីនោះ តែបែរជាផ្លាតទៅខាងស្តាំ ធ្វើឱ្យបាក់ឆ្អឹងជំនីខាងស្តាំ។ នេះគឺបានធ្វើឱ្យគ្រាប់មិនបុកចូលទៅក្នុងបេះដូងរបស់នាងទេ។
មកដល់ពេលនេះ គេមិនទាន់ដឹងថា អ្នកបាញ់ជានរណាទេ។ គ្រូពេទ្យបានធ្វើការព្យាបាលមុខរបួស ដោយវះកាត់យកគ្រាប់ចេញ និងប្រើប្រាស់ថ្នាំអង់ទីប្យ៊ូទិចរយៈពេលខ្លី៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ