រាជធានីភ្នំពេញ ៖ ក្រុមរបាំដែលមានឈ្មោះថា Mark Morris Dance Group របស់សហរដ្ឋអាមេរិកបានបង្ហាញវត្តមានសម្តែងរយៈពេល១០ថ្ងៃនៅប្រទេសកម្ពុជា ក្នុងន័យផ្លាស់ប្តូរបទពិសោធន៍វប្បធម៌ពីគ្នាទៅវិញទៅមក ក្នុងដំណើរទស្សកិច្ចជាលើកដំបូងនៅប្រទេសកម្ពុជា។
លោក Mark Morris ប្រធានផ្នែកសិល្បៈរបស់ក្រុមរបាំ Mark Morris Dance Group បានក្នុងសន្និសីទកាសែត កាលពីព្រឹកថ្ងៃទី១៤ តុលា ២០១៤ នៃសាកលវិទ្យាល័យភូមិន្ទវិចិត្រសិល្បៈថា យើងមានផែនការថាយើងគួរធ្វើបែបណា ដើម្បីទទួលបាននូវបទពិសោធន៍មួយដ៏ល្អ ហើយយើងសង្ឃឹថា យើងនឹងសម្រេចបាន។ ក្នុងរយៈពេល១០ថ្ងៃនេះ យើងនឹងខិតខំសិក្សាស្វែងយល់ពីប្រទេសកម្ពុជា ពីសិល្បៈ វប្បធម៌ ហើយក៏សង្ឃឹមថា ប្រជាជនកម្ពុជា នឹងតាមដាននូវសកម្មភាពទូទៅរបស់ពួកយើង ដែលនេះគឺជាការរៀនសូត្រពីគ្នាទៅវិញទៅមក។
លោក Mark Morris បានបញ្ជាក់ថា មូលហេតុដែលលោកជ្រើសរើសយកកម្ពុជា ជាប្រទេសទីមួយ ក្នុងដំណើរសម្តែងនេះ គឺដោយសារប្រទេសនេះ មានមរតកសម្បូរស្តុកស្តម ផ្នែកសិល្បៈ របាំ និងតូរ្យតន្ត្រីផងដែរ ហើយការដែលលោកមកទីនេះ ក៏ជាឱកាសមួយដើម្បីឲ្យលោកចូលរួមស្វែងយល់ពីទម្រង់របាំ និងទម្រង់តន្ត្រីផងដែរ។
លោក Jay Ramon ប្រធានកិច្ចការសាធារណៈស្ថានទូតសហរដ្ឋអាមេរិកប្រចាំនៅកម្ពុជា និងជាអ្នកនាំពាក្យស្ថានទូតសហរដ្ឋអាមេរិកបានឲ្យដឹងថា ការសម្តែងនេះ គឺជាផ្នែកមួយនៃកម្មវិធីដែលមានឈ្មោះថា DanceMotiton USA របស់ក្រសួងការបរទេសសហរដ្ឋអាមេរិក និងដោយមានជំនួយពីអង្គការអម្រឹតាសិល្បៈ យើងមានកិត្តិយស ដោយក្រុមរបាំ Mark Morris Dance Group បានមកចូលរួមសម្តែងនៅកម្ពុជា ដែលជាប្រទេសទី១ នៃដំណើរចាប់ផ្តើមសំដែងរបស់ពួកគេនៅទ្វីបអាស៊ី។ ក្រុមរបាំនេះ ស្នាក់នៅ និងសម្តែងនៅប្រទសកម្ពុជារយៈពេល១០ថ្ងៃ ហើយបន្ទាប់ពីចាកចេញពីប្រទេសកម្ពុជា ក្រុមរបាំនេះនឹងទៅសម្តែងនៅប្រទេសទីម័រខាងកើត កោះតៃវ៉ាន់ និងប្រទេសចិន។
លោកបន្តថា ក្នុងរយៈពេល១០ថ្ងៃនៅកម្ពុជានេះ ក្រុមរបាំ Mark Morris Dance Group នឹងរួមសហការគ្នាជាមួយអ្នករបាំ និងតន្ត្រីករ មកពីអង្គការ អម្រឹតាសិល្បៈ អង្គការសិល្បៈខ្មែរអមតៈ អង្គការសិល្បៈខ្មែរ អង្គការ Epic arts សកលវិទ្យាល័យភូមិន្ទវិចិត្រសិល្បៈ វិទ្យាល័យវិចិត្រសិល្បៈ និងអង្គការ Tiny Toones នឹងធ្វើការសម្តែងនៅរោងមហោស្រពសិល្បៈខ្មែរនៅក្រុងតាខ្មៅនៅថ្ងៃទី២២ ខែតុលា វេលាម៉ោង៦ល្ងាច ។ ចំពោះសំបុត្រចូលទស្សនា មានចែកជូនដោយឥតគិតថ្លៃនៅអង្គការអម្រឹតាសិល្បៈ មហាវិថីសុធារស ចាប់ពីថ្ងៃទី១៥ ខែតុលា នេះតទៅ៕
ចែករំលែកព័តមាននេះ