រាជធានីភ្នំពេញ៖ ខណៈជំងឺកូវីដ ១៩ នៅតែចោទជាបញ្ហាសម្រាប់សុខភាពសាធារណ និង សេដ្ឋកិច្ចកម្ពុជា រាជរដ្ឋាភិបាលកន្លងមកបានចេញវិធានការមួយបិទការនាំចេញអង្ករ ស និងស្រូវទៅក្រៅប្រទេស ដែលធ្វើឱ្យស្រូវរបស់ប្រជាកសិករមួយចំនួននៅសល់ច្រើនក្នុង ស្តុក ។
ក្នុងនោះដែរ រដ្ឋមន្ត្រីក្រសួងកសិកម្មបានស្នើ និងជំរុញឱ្យម្ចាស់រោងម៉ាស៊ីនកិនស្រូវ បន្តទិញស្រូវពីកសិករ សម្រាប់ផ្គត់ផ្គង់ក្នុងស្រុក ដើម្បីបង្កាខ្វះស្បៀងនៅខណៈកូវីដ ១៩ នៅក្នុងប្រទេសកម្ពុជា និងពិភពលោកនៅតែចោទជាបញ្ហា ។
នៅក្នុងដំណើរទស្សនកិច្ចរោងម៉ាស៊ីនកិនស្រូវមួយនៅខេត្តតាកែវ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើឱ្យរោងម៉ាស៊ីនកិនស្រូវ បន្តចូល រួមសហការឲ្យបានល្អ ដើម្បីជួយជំរុញការនាំចេញមាសសឲ្យទទួលបានជោគជ័យតាម គោលដៅរំពឹងទុក និងជាពិសេសចូលរួមសហការអនុវត្តបទបញ្ជារបស់រាជរដ្ឋាភិបាល ហាមនាំចេញអង្ករ ស បានពេញលេញ ។ មួយវិញទៀត រោងម៉ាស៊ីនកិនស្រូវទូទាំងខេត្ត តាកែវ ត្រូវជួយទិញប្រមូលស្រូវពីប្រជាកសិករយកមកស្តុកទុកឱ្យអស់លទ្ធភាពដើម្បី ជួយដោះស្រាយទីផ្សារស្រូវរបស់ពួកគាត់ និងជួយធានានូវបរិមាណស្តុកស្រូវ ដើម្បីធានា សុវត្ថិភាពស្បៀងសម្រាប់រយ:ពេលវែង ។
លោក ថៃ វីឡុង អ្នកគ្រប់គ្រងទូទៅរោងម៉ាស៊ីនកិនស្រូវមួយនៅក្នុងខេត្តតាកែវបាននិយាយ ថា ក្នុងឆ្នាំ ២០១៩ ក្រុមហ៊ុនប្រមូលទិញស្រូវគ្រប់ប្រភេទបានចំនួន ៩៦.៣៨៦តោន និងឆ្នាំ ២០២០ នេះបាន ៦៥.៣៧៥ តោន ។ ដោយឡែកក្នុងឆ្នាំ ២០១៩ ការនាំចេញពីរោងម៉ាស៊ីន កិនស្រូវមួយនេះបានប្រមាណ ៤០.១៧៥តោន និង ៣ខែដើមឆ្នាំ ២០២០ ការនាំចេញបាន ប្រមាណ ២៤.៤២៨តោន ភាគច្រើនទៅកាន់ប្រទេសចិន ។
លោកបន្តថា បច្ចុប្បន្នក្នុងរោងម៉ាស៊ីនកិនស្រូវមួយនេះមានឡសម្ងួតចំនួន ៣ ដែលអាច
សម្ងួតស្រូវបាន ៥៥០តោនក្នុង ១ថ្ងៃ និងមានស្រូវស្តុកទុកចំនួន ៧ពាន់តោន រង់ចាំកិន និងនាំចេញតាមការបញ្ជាទិញពីខាងក្រៅ ទន្ទឹមនឹងនេះក្រុមហ៊ុនក៏នៅជួបមានជួបបញ្ហា ប្រឈមនឹងការប្រគួតប្រជែងជាមួយប្រទេសជិតខាង ទាក់ទងទៅនឹងតម្លៃភ្លើង និងការ ដឹកជញ្ជូន ដែលនៅមានតម្លៃខ្ពស់នៅឡើយ ។
យោងតាមរបាយការណ៍របស់អគ្គនាយកដ្ឋានកសិកម្ម បានឱ្យដឹងថា ក្នុងឆ្នាំ ២០១៩ កន្លង មកកម្ពុជា មានស្រូវសរុបចំនួនជាង ១០,៨៨លានតោន ក្នុងនេះសម្រាប់ស្រូវវស្សាទទួល បានបរិមាណផលសរុបចំនួន ៨ ២៦៩ ៣៣៣តោន និងស្រូវប្រាំង ២ ៦១៦ ២៤១តោន ។ ដោយឡែក ខេត្តតាកែវ បរិមាណស្រូវសរុបទាំងវស្សា និងប្រាំងចំនួន ១ ២០៨ ៦៤០តោន ហើយមកទល់ពេលនេះគឺនៅសល់ផ្ទៃដីស្រែប្រាំងចំនួន ៤ពាន់តោនទៀតមិនទាន់បាន ប្រមូលផល គិតជាបរិមាណស្រូវប្រមាណ ១៦ពាន់តោនទៀត ។
គួរបញ្ជាក់ថា រាជរដ្ឋាភិបាលកម្ពុជា បានចេញបទបញ្ជាមួយ មិនឱ្យនាំអង្ករ ស និងស្រូវទៅ កាន់ប្រទេសក្រៅមួយរយៈ ដោយរង់ចាំមើលស្ថានការណ៍កូវីដ១៩ សិន ។ ការហាមឃាត់ នេះ គឺដើម្បីរក្សាស្រូវ និងអង្ករសម្រាប់ផ្គត់ផ្គង់ក្នុងស្រុក ដោយសារតែពលរដ្ឋមួយចំនួន ព្រួយបារម្ភពីការខ្វះខាតស្បៀង និងនាំគ្នាទិញអង្ករស្តុកទុកនៅផ្ទះច្រើនធ្វើឱ្យអង្ករឡើងថ្លៃ ខ្ពស់ មិនអាចគ្រប់គ្រងបាន ។
ប្រមុខរាជរដ្ឋាភិបាលក៏បានប្រកាសផងដែរថា កម្ពុជានឹងមិន ខ្វះស្បៀងសម្រាប់ផ្គត់ផ្គង់ទេ ហើយក៏សូមឱ្យពលរដ្ឋរក្សាភាពស្ងៀមស្ងាត់ និងកុំជ្រួលច្របល់ ៕
ចែករំលែកព័តមាននេះ