សហរដ្ឋអាមេរិក៖ យោងតាមសាកលវិទ្យាល័យចនហុបគីនថា ចំនួនអ្នកឆ្លងវីរុសCOVID-19 នៅសហរដ្ឋអាមេរិកបានកើនលើសពី៣៥០.០០០នាក់ហើយ គិតមកដល់ថ្ងៃទី៦ មេសា វេលាម៉ោង១៥និង៣០
នាទីម៉ោងក្នុងស្រុក ។ សាកលវិទ្យាល័យនេះ ដែលអាអាជ្ញាធរអាមេរិកអនុញ្ញាតឲ្យចេញតុល្យការប្រចាំថ្ងៃថា ចំនួនអ្នកឆ្លងវីរុសនៅសហរដ្ឋអាមេរិកបានឡើងដល់៣៥២.៥៤៦នាក់ជាមួយអ្នកស្លាប់ ឡើងដល់១០.៣៨៩នាក់។
រដ្ឋញូវយ៉ករងការប៉ះពាល់ខ្លាំងជាងគេ ដោយសារវីរុស ជាមួយអ្នកឆ្លង១៣០.៦៨៩នាក់ និងអ្នកស្លាប់៤.៧៥៨នាក់។ ក្នុងចំណោមរដ្ឋេឯទៀតៗដែលមានអ្នកឆ្លងលើសពី១០.០០០នាក់មានដូចជារដ្ឋញូវចឺសីុ មីជីហ្គេន កាលីហ្វ័រនីញ៉ា ល្វីហ្សាណា ផ្លរីដា ម៉ាសាជូសេត ផេនសីុលវេនៀនិងអីុលលីណយ។ កម្រិតពិភពលោកក្នុងចំណោមប្រទេសនិងដែនដីជាង១៨០ កត់សម្គាល់ឃើញអ្នកឆ្លងវីរុសសរុប១.៣២៤.៩០៧នាក់ និងអ្នកស្លាប់សរុប៧៣.៧០៣នាក់ ចំណែកមនុស្សជាង២៧៥.០០០នាក់បានជាសះស្បើយ។
វិបត្តិសុខាភិបាលបណ្ដាលមកពីវីរុសCOVID-19 នាថ្ងៃទី៦មេសាបើតាមអ្នកទទួលខុសត្រូវអាមេរិកថា បានឈានចូលសប្ដាហ៍ដ៏សោកសៅបំផុត ដែលនាំឲ្យគេនឹកឃើញដល់ អនុស្សាវរីយ៍នៅPEARL HARBORនិងការវាយប្រហារភេរវកម្ម ថៃ្ងទី១១កញ្ញា២០០១។លោកANDREW CUOMOអភិបាលរដ្ឋញូវយ៉ក ចំណុចកណ្ដាលនៃការឆ្លងនៅអាមេរិក បានសម្រេចពន្យារពេលការបង្ឋាំងមនុស្សរហូតដល់ថ្ងៃទី២៩មេសា ដោយលោកអះអាងថានៅមិនទាន់ដល់ពេលបន្ធូរដៃបាននៅឡើយ។
ដោយសារតែចំនួនមនុស្សស្លាប់កើនច្រើនពេកសមាជិកសភាម្នាក់នៃក្រុងញូវយ៉កគូសបញ្ជាក់នាថ្ងៃទី៦មេសាថា ក្រុងញូវយ៉កក្នុងពេលដ៏ឆាប់ខាងមុខនេះ អាចត្រូវការបញ្ចុះបណ្ដោះអាសន្នបណ្ដាអ្នកស្លាប់ដោយសារការឆ្លងវីរុស ក្នុងឧទ្យានក្រុងសិនព្រោះក្នុងបណ្ដាកន្លែងតម្កល់សពពុំមានលទ្ធភាពគ្រប់គ្រាន់ ក្នុងការទទួលសព ។
តាមTWITTERសមាជិកសភារូបនេះលោកMARK LEVINEគូសបញ្ជាក់ថា ខណៈចំនួនអ្នកស្លាប់ ក្នុងទីក្រុងសេដ្ឋកិច្ចនោះបានកើនច្រើនបំផុត ចាប់តាំងពី១០ថ្ងៃមកហើយ ជាមួយអ្នកស្លាប់២.៤៧៥នាក់គិតមកដល់ព្រឹកថៃ្ងទី៦មេសា ក្រុងញូវយ៉កក្នុងពេលដ៏ឆាប់ នឹងអនុវត្តការបញ្ចុះសពអ្នកស្លាប់បណ្ដោះអាសន្នក្នុងឧទ្យានក្រុង ។
បណ្ដារណ្ដៅនឹងជីកជាជួរ សម្រាប់បញ្ចុះមឈូសសពក្នុងមួយជួរៗ ១០មឈូស។ អភិបាលក្រុងញូវយ៉កលោកBILL DE BLASIO មុននេះបន្តិចក៏បានលើកឡើងដែរ ពីការបញ្ចុះសពបណ្ដោះអាសន្នរហូតដល់ពេលបញ្ចប់វិបត្តិ។ លោកMARK LEVINEគូសបញ្ជាក់ទៀតថា ចំនួនអ្នកស្លាប់មិនត្រឹមមានការកើនឡើងក្នុងបណ្ដាមន្ទីរពេទ្យប៉ុណ្នោះទេ តែនៅតាមផ្ទះក៏មានអ្នកស្លាប់ក្នុង១ថ្ងៃៗពី២០ទៅ២៥នាក់ដែរ៕
ចែករំលែកព័តមាននេះ