សហព័ន្ធ​សេវា​អប់រំ​នៃ​កម្ពុជា ស្នើ​ឱ្យ​ស្ថាប័ន​ពាក់ព័ន្ធ​ពិចារណា​ផ្តល់​យន្តការ​ពិសេស​ជូន​គ្រឹះ ស្ថាន​អប់រំ​ឯកជន​ក្នុង​គ្រា​កូ​វី​ដ​-១៩


រាជធានី​ភ្នំពេញ ៖ វីរុស​កូ​វី​ដ​-១៩ បាន​រីក​រាលដាល​ឥត​ឈប់​ឈរ​ដែល​ធ្វើ​ឱ្យ​ពិភពលោក​ទាំងមូល​មានការ​ព្រួយបារម្ភ​យ៉ាង​ខ្លាំង ដែល​ក្នុង​នោះ​ប្រទេស​កម្ពុជា ក៏​រង​នូវ​ផល​ប៉េះ​ពាល់ នេះ​ផង​ដែរ ហើយ​ថែម​ទាំង​មាន​អ្នក​ឆ្លង​វីរុស​ដ៏​កាច​សាហាវ​នេះ​ជាង​១០០​ករណី​ដែល តម្រូវ​ឱ្យ​បិទ​សាលា​រៀន​​រដ្ឋ និង​ឯកជន​មួយ​រយៈ បិទ​ខារ៉ាអូខេ ក្លឹ​ប​កម្សាន្ត រោងកុន និង​បៀរ ហ្កា​ឌិន ព្រមទាំង​កាស៊ីណូ​ទូ​ទាំង​ប្រទេស​ផង​ដែរ ដើម្បី​បង្ការ​ការ​ឆ្លង ។

នៅ​ក្នុង​ពេល​សម្រាក​វិស្សមកាល​តូច​នេះ គ្រឹះស្ថាន​អប់រំ​ឯកជន​ទាំងអស់​បាន​និង​កំពុង​ប្រឹង ប្រែង​បន្ត​ការ​បង្រៀន​ពី​ចម្ងាយ​ជូន​សិស្ស​-​និស្សិត​ទាំងអស់​ទៅ​តាម​លទ្ធភាព​ដែល​ខ្លួន​មាន ។ គ្រឹះស្ថាន​អប់រំ​ស្ទើរ​ទាំងអស់ ជា​ពិសេស​គ្រឹះស្ថាន​ដែល​ទទួល​ថ្លៃ​សិក្សា​ប្រចាំខែ និង​ត្រី​មា ស​កំពុង​ជួប​បញ្ហា​ប្រឈម​ជា​ច្រើន​លើ​ការ​បើកប្រាក់​ឈ្នួល​ជូន​បុគ្គលិក គ្រូបង្រៀន ថ្លៃ​ឈ្នួល​អគារ និង​កាតព្វកិច្ច​ចំណាយ​ផ្សេង​ៗ​ទៀត ។

កាលពី​ពេល​ថ្មី​ៗ​មកនេះ សម្ដេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជា​ណាចក្រ​កម្ពុជា បាន​ស្នើ​សុំ​ឱ្យ​មានការ​យោគយល់​គ្នា​រវាង​ម្ចាស់​អគារ និង​ទីតាំង លើ​ថ្លៃ​ជួល ដែល​បាន​ជួល​ឱ្យ​អ្នក​រកស៊ី​មួយ​ចំនួន ដោយ​សម្តេច​បាន​មាន​ប្រសាសន៍​ថា នៅ​ក្នុង​ពេល​នេះ គឺ​បាន​សេចក្តី​ថា ហាង​នឹង​ត្រូវ​បិទទ្វារ រហូត​គ្មាន​អ្នក​ណា​ជួល​ទៅ​ថ្ងៃក្រោយ ប៉ុន្តែ​ប្រសិនជា​អនុគ្រោះ​ឱ្យ​គ្នា ១​ខែ ២​ខែ ឬ​បញ្ចុះ​ថ្លៃ​ប៉ុណ្ណេះ​ភាគរយ ឬ ៥០​ភាគរយ ៦០​ភាគរយ ឬ ៧០ ភាគរយ គឺ​យើង​អាច​រក្សា​អតិថិជន​ឱ្យ​ជួល​ត្រឡប់​មក​វិញ នៅ​ពេល​ដែល​សភាពការណ៍​បាន​រើ​បម្រាស់​ត្រឡប់​មក​វិញ ។

ជាមួយ​គ្នា​នេះ​ដែរ លោក ប៉ិច បូ​ឡែ​ន ប្រធាន​សហព័ន្ធ​សេវា​អប់រំ​នៃ​កម្ពុជា និង​ជា​អគ្គ​នាយក​ក្រុម​ហ៊ុន Westline Education Group បាន​ថ្លែងអំណរគុណ​ដល់​រាជរដ្ឋាភិបាល​ដែល​បាន អំពាវ​នាវ​ឱ្យ​មានការ​យោគយល់​ពី​ម្ចាស់​អគារ និង​បាន​អន្តរាគមន៍​គោលនយោបាយ​ជា ច្រើន​ដល់​ធុរជន​កម្ពុជា និង​សូម​អរគុណ​ដល់​ក្រសួងសុខាភិបាល​ដែល​បាន​និង​កំពុង​ដឹក នាំ​ការងារ​ប្រយុទ្ធ​ប្រឆាំង​ការ​រាលដាល​នៃ​ជំងឺ​កូ​វី​ដ ១៩ ព្រមទាំង​សូម​អរគុណ​ដល់​ក្រសួង អប់រំ​ដែល​បាន​ផ្តួចផ្តើម​ដំណើរការ ការ​គាំទ្រ​រៀន​ពី​ចម្ងាយ​ជូន​សិស្ស​ចំណេះ​ទូទៅ​ខ្មែរ ។

ដើម្បី​និរន្ត​ភាព​សាលារៀន ក៏​ដូច​ជា​ស្ថេ​រ​ភាព​ការងារ​បុគ្គលិក គ្រូបង្រៀន​តាម​គ្រឹះស្ថាន​អប់ រំ​ឯកជន លោក ប៉ិច បូ​ឡែ​ន បាន​សូម​ឱ្យ​ស្ថាប័ន​ពាក់ព័ន្ធ​មេត្តា​ពិចារណា​ដល់​វិស័យ​អប់រំ ឯកជន​ដែល​កំពុង​ផ្តល់​ការងារ​រាប់​ម៉ឺន​នាក់ និង​ផ្តល់​ការ​សិក្សា​ដល់​សិស្ស​-​និស្សិត​រាប់​សែន នាក់ ជា​វិស័យ​អ​ទិ​ភាព​មួយ​ផង និង​សូម​ពិចារណា​ផ្តល់​ជូន​យន្តការ​ពិសេស​មួយ​ចំនួន ដូច ខាងក្រោម​ជូន​គ្រឹះស្ថាន​អប់រំ​ឯកជន ៖

១- ការ​រៀបចំ​ឥណទាន​ឡើង​វិញ ឬ​ការ​ផ្តល់​ឥណទាន​បន្ថែម​ដោយ​ការ​បត់បែន និង​យល់ យោគ​មួយ ។

២- ការ​លើកលែង​ការ​បង់ប្រាក់​របប​បេឡា​សន្តិសុខ​សង្គម រហូត​ដល់​ស្ថានភាព​ប្រសើរ​ជា ថ្មី ។

៣- ការ​ផ្តល់​ប្រាក់​ឧបត្ថម្ភ​បន្ថែម ២០% នៃ​ប្រាក់ខែ​អប្បបរមា ១៩០ ដុល្លារ​ដល់​បុគ្គលិក​អប់រំ និង​គ្រូបង្រៀន​ដែល​អាច​នឹង​ទទួល​រង​ផល​ប៉ះពាល់​ពី​ការ​កាត់​បន្ថយ​បៀវត្ស ការ​ព្យួ​ការងារ ឬ​ការ​ផ្អាក​សកម្មភាព​អាជីវកម្ម ។

៤- ការ​ពន្យារពេល​ការ​រៀបចំ​សៀវភៅ​ការងារ​បុគ្គលិក​បរទេស​ក្នុងអំឡុងពេល​នេះ ។

៥- ផ្តល់​ជូន​កញ្ចប់​ថវិកា​សមរម្យ​ណាមួយ​សម្រាប់​គ្រឺះ​ស្ថាន​អប់រំ​ដែល​រង​ផល​ប៉ះពាល់​ខ្លាំង ដោយសារ​កូ​វី​ដ ១៩ សម្រាប់​ដំណើ​ការ​គ្រឹះស្ថាន​ឡើង​វិញ ។

៦- សូម​ម្ចាស់​អគារ​ទាំងអស់​ដាក់ចិត្ត​យោគយល់ និង​ស្វែ​ករក​ដំណោះស្រាយ​ឈ្នះ​ឈ្នះ មួយ​ជាមួយ​ម្ចាស់​អាជីវកម្ម​ក្នុងអំឡុងពេល​នេះ ។

លោក ប៉ិច បូ​ឡែ​ន បានឱ្យ​ដឹង​ថា «​ខ្ញុំ​ជឿ​ថា យើង​ទាំងអស់​គ្នា​, រដ្ឋាភិបាល​, ប្រជាជន​, វិស័យ​រដ្ឋ និង​ឯកជន​, សិស្សានុសិស្ស​, មាតាបិតា​, អ្នក​អាណា​ព្យ​បាល និង​គ្រឹះស្ថាន​អប់រំ យើង​ទាំងអស់​គ្នា​ជា​ប្រជាជន​ខ្មែរ​ពិតជា​អាច​យកជ័យ​ជម្នះ​ក្នុង​ការ​ទប់ស្កាត់​ការ​រាលដាល​នៃ​វីរុស​កូ​វី​ដ​-១៩ នេះ ហើយនឹង​អាច​បន្ត​ការ​អភិវឌ្ឍ​ធនធានមនុស្ស និង​សេដ្ឋកិច្ច​ប្រទេស យើង​ឱ្យ​រីក​ចម្រើន​បន្ត​ដូច​ចិត្ត​យើង​ចង់បាន​ទាំងអស់​គ្នា​» ។

សូម​បញ្ជាក់​ផង​ដែរ​ថា សហព័ន្ធ​សេវា​អប់រំ​នៃ​កម្ពុជា បាន​ចូលរួម​ជាមួយ​សម្តេច​នាយក រដ្ឋមន្ត្រី​ក្នុង​យុទ្ធនាការ​បង្ការ ទប់ស្កាត់​ការ​រាលដាល​ជំងឺ​កូ​វី​ដ ១៩ ដោយ​បាន​ឧបត្ថម្ភ​ថវិកា ចំនួន ១​ម៉ឺន​ដុល្លារ ហើយ Westline Education Group ក៏​បាន​ចូលរួម​ឧបត្ថម្ភ​ចំនួន ១​ម៉ឺន ដុល្លារ​ផង​ដែរ៕ ដោយ​សហការ (​កែសម្រួល​ដោយ ៖ បុប្ផា​)

ពាណិជ្ជកម្ម

Sponsored News

ការស្ទង់មតិគេហទំព័រថ្មី




សូម​អរគុណ