ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា ករណីទូកនេសាទមួយគ្រឿងដែលបានបាត់មនុស្សចំនួន៣នាក់នៅលើទូកនោះ បន្ទាប់មកក៏រកឃើញសពមនុស្ស២នាក់ ហើយនៅបាត់ខ្លួនម្នាក់ទៀត តាមពិតនោះគឺជារឿងឃាតកម្មបង្កឡើងដោយជនសង្ស័យម្នាក់ជាកម្មករទូកនេសាទលើទូកជាមួយគ្នា ហើយបច្ចុប្បន្នជនសង្ស័យរូបនេះត្រូវនគរបាលចាប់ខ្លួនបានហើយ ក្រោមកិច្ចសហការរួមគ្នារវាងនគរបាលខេត្តព្រះសីហនុ និងនគរបាលខេត្តព្រៃវែង សម្របសម្រួលផ្លូវច្បាប់ពីអយ្យការអមសាលាដំបូងខេត្ត។
បើតាមលោក ជួន ណារិន្ទ ស្នងការនគរបាលខេត្ត បានឱ្យដឹងថា ករណីខាងលើនេះកើតឡើងកាលពីថ្ងៃទី១ ខែមីនា ឆ្នាំ២០២០ នៅលើផ្ទៃសមុទ្រជិតកោះថាស ក្នុងខេត្តព្រះសីហនុ។
ប្រភពដដែលបន្តថា ជនសង្ស័យចាប់ខ្លួនបានខាងលើឈ្មោះ ធី វណ្ណៈ ហៅណាក់ ភេទប្រុស អាយុ២២ឆ្នាំ មានស្រុកកំណើតនៅភូមិត្រពាំងចាម ឃុំពោធិ៍ ស្រុកស៊ីធរកណ្ដាល ខេត្ដព្រៃវែង ។ ចំណែកជនរងគ្រោះដែលបាត់បង់ជីវិត ទី១-ឈ្មោះ ប៊ុន បូរ៉ា ភេទប្រុស ជាកូនដៃទូក មានស្រុកកំណើតភូមិ-ឃុំជាមូយនឹងជនសង្ស័យ ។ ទី២-ឈ្មោះ ហែម ពឿន ភេទប្រុស ជាតៃកុងទូក មានស្រុកកំណើតភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ ខេត្ដកំពត (ជនរងគ្រោះទាំង២ត្រូវបានគេរកឃើញលើផ្ទៃសមុទ្រជាបន្តបន្ទាប់ក្រោយកើតហេតុនេះ)។
លោកស្នងការនគរបាលខេត្តបានបន្តទៀតថា ក្រោយពេលចាប់ខ្លួនជនសង្ស័យបានសារភាពថា នៅថ្ងៃកើតហេតុ ម៉ោងប្រហែល១១និង៣០នាទីព្រឹក ខ្លួនបានប្រើប្រាស់នូវសារធាតុញៀនហួសកម្រិត។ ហើយក្រោយពេលអូសមងបានពីរដៃ ខ្លួនក៏យកញញួរវាយទៅលើតៃកុងទូកចំនួន២ញញួរ និងរុញទម្លាក់ទឹកតែម្តង បន្ទាប់មកដោយសារតែខ្លួនភ័យខ្លាចកូនដៃទូកម្នាក់ដែលនៅសល់ ហើយក៏ជាអ្នកភូមិនឹងគ្នាផងនោះ ដោយខ្លាចរូបគេរាយការណ៍ជូនសមត្ថកិច្ច ខ្លួនក៏យកកាំបិតកាប់ទៅលើកូនដៃទូកឈ្មោះ ប៊ុន បូរ៉ា ត្រូវសៀតថ្កា១កាំបិត រួចរុញទម្លាក់ទឹកដូចគ្នា ទើបខ្លួនបើកទូកទៅទុកនៅជិតដីគោក ហើយក៏បានគេចខ្លួនទៅឯខេត្តព្រៃវែងបាត់ទៅ។
ក្រោយចម្លើយសារភាពរបស់ជនរងគ្រោះខាងលើហើយ បច្ចុប្បន្ននេះជនសង្ស័យត្រូវបានសមត្ថកិច្ចនាំពីខេត្តព្រៃវែង មកកាន់ស្នងការដ្ឋាននគរបាលខេត្តព្រះសីហនុ ដើម្បីចាត់ការបន្តតាមនីតិវិធី និងបញ្ជូនទៅផ្តន្ទាទោសតាមច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ