ប្រទេសចិន៖ នាយករដ្ឋមន្ត្រីចិន លោកLI KEQIANG កាលពីថ្ងៃទី១១កុម្ភៈ បានសង្កត់ធ្ងន់លើភាពចាំ់បាច់បង្កើនការខិតខំប្រឹងប្រែងដើម្បីចូលធ្វើការវិញ និងអះអាងពីការផ្គត់ផ្គង់ខាងវេជ្ជសាស្ត្រ ព្រមទាំងបណ្ដាផលិតផលប្រចាំថ្ងៃ ក្នុងកាលៈទេសៈដែលកំពុងមានការប្រយុទ្ធជាសាកលរបស់ប្រទេសប្រឆាំងការឆ្លងរាលដាលនៃវីរុសCOVID-19។
នាយករដ្ឋមន្ត្រីចិនអះអាងបែបនេះ ក្នុងឱកាសនៃកិច្ចប្រជុំមួយ របស់ក្រុមប្រឹក្សាកិច្ចការរដ្ឋចិន ដែលរៀបចំធ្វើកាលពីថ្ងៃទី១១កុម្ភៈ។ សេចក្ដីប្រកាសមួយចេញផ្សាយក្រោយកិច្ចប្រជុំនេះលើកឡើងថា អាជ្ញាធរនិងគ្រប់ផ្នែកទាំងអស់បានបំពេញយ៉ាងរឹងមាំ ការងារបង្ការនិងត្រួតពិនិត្យការឆ្លង ដោយនាំឲ្យមានការរីកចម្រើនដែលអាច ឈានទៅរកការវិលទៅបំពេញការងារវិញ និងសកម្មភាពផលិតកម្មឡើងវិញរបស់បណ្ដាសហគ្រាស ដោយបង្កើនយ៉ាងឆាប់ការផ្គត់ផ្គង់ខាងវេជ្ជសាស្ត្រគន្លឹះនានា ព្រមទាំងធានាការផ្កត់ផ្គង់ជាទូទៅឲ្យបានគ្រប់គ្រាន់ បណ្ដាផលិតផលប្រចាំថ្ងៃ។
ការសម្រេចចិត្តដែលប្រកាន់យកក្នុងឱកាសនៃកិច្ចប្រជុំនោះ គូសបញ្ជាក់ពីការវិលទៅបំពេញការងារវិញ និងបន្តផលិតកម្មរបស់បណ្ដាសហគ្រាស យោងទៅតាមស្ថានភាពរបស់មូលដ្ឋាន។ ទាក់ទិននឹងបណ្ដាសហគ្រាសផលិតបណ្ដាផលិតផលវេជ្ជសាស្ត្រគន្លឹះនានា ការខិតខំប្រឹងប្រែងត្រូវមានដើម្បីជួយពួកគេ ឲ្យឈានដល់សមត្ថភាពផលិតកម្ម ឲ្យបានឆាប់បំផុតតាមដែលអាចធ្វើទៅបាន ហើយដោះស្រាយបណ្ដាបញ្ហារបស់ពួកគេទាក់ទិននឹងការបំពាក់ឧបករណ៍ កម្លាំងពលកម្មនិងវត្ថុធាតុដើម។
បណ្ដាអ្នកចូលរួមក្នុងកិច្ចប្រជុំនោះ ក៏អំពាវនាវផងដែរឲ្យធានា ដល់ការវិលត្រឡប់ដោយមានការរៀបរយ របស់បណ្ដាពលករអន្តោប្រវេសន៍ទៅកាន់កន្លែងធ្វើការពួកគេ ដើម្បីកាត់បន្ថយការលំបាកនានា របស់បណ្ដាសហគ្រាសឯកជននិងសហគ្រាសធុនតូច ក្នុងពេលវីរុសរាតត្បាត។ ចិននឹងអនុវត្តបណ្ដាយន្តការជួយទ្រទ្រង់និងបណ្ដាវិធានការអនុគ្រោះ ក្នុងនោះមានការកាត់បន្ថយអត្រាការប្រាក់នៃប្រាក់កម្ចី និងការកែលម្អនយោបាយកាត់បន្ថយពន្ធ៕
ចែករំលែកព័តមាននេះ