ប្រទេសចិន ៖ យោងតាមតុល្យការចេញផ្សាយនាព្រឹកថ្ងៃទី១១ កុម្ភៈ ដោយអាជ្ញាធរចិនថា វីរុសកូរ៉ូណាថ្មីបណ្ដាលឲ្យមនុស្សស្លាប់ឡើងដល់១,០១១នាក់ហើយនៅចិនដីគោក ក្រោយការប្រកាសពីអ្នកស្លាប់ថ្មី១០៣នាក់ក្នុងខេត្តហ៊ូបី ។ តាមតុល្យការចុងក្រោយប្រចាំថ្ងៃឲ្យដឹងថា ចំនួនអ្នកឆ្លងវីរុសកូរ៉ូណាថ្មីបានកើនដល់ជាង៤២.២០០នាក់ប្រឈមមុខនឹងការឆ្លងរាលដាលដែលមិនទាន់ធូរស្រាលពិសេសនៅចិន ប្រធានាធិបតីចិន លោកសីុជីនពីងដែលពាក់ម៉ាសការពារ កាលពីថ្ងៃទី១១កុម្ភៈបានចុះទៅកាន់សង្កាត់មួយនៃក្រុងប៉េកាំង ដើម្បីពិនិត្យមើលការខិតខំប្រឹងប្រែងនានា នៃការតស៊ូប្រឆាំងការឆ្លងហើយទស្សនាមន្ទីរពេទ្យមួយ។ លោកបានអំពាវនាវឲ្យមានវិធានការកាន់តែខ្លាំងនិងកាន់តែមឺុងម៉ាត់ប្រឆាំងជំងឺនោះ។
ក្នុងសេចក្ដីថ្លែងការណ៍ដ៏វែងមួយផ្សាយតាមទូរទស្សន៍ មេដឹកនាំចិនបានលើកពីសភាពការណ៍នៅក្រុងវូហាន ដែលស្ថិតនៅដាច់ពីគេចាប់តាំងពីថ្ងៃទី២៣មករាមក ព្រមទាំងផ្នែកមួយធំនៃខេត្តហ៊ូបីុ ដែលពេលនេះមានចំនួនជនរងគ្រោះកាន់តែច្រើន។ លោកទទួលស្គាល់ថា ការឆ្លងនៅហ៊ូបីុនិងក្រុងវូហាន នៅតែធ្ងន់ធ្ងរបំផុតដេោយលោកអំពាវនាវឲ្យចាត់បណ្ដាវិធានការកាន់តែខ្លាំងនិងមឺុងម៉ាត់ដើម្បីទប់ការឆ្លង។លោកសីុជីនពីងអះអាងថា ចិនពិតជាអាចទទួលបានជោគជ័យទាំងស្រុង ក្នុងការតស៊ូប្រឆាំងការឆ្លងវីរុសកូរ៉ូណាថ្មីនេះ។ លោកថាសម្រាប់ពេលនេះសភាពការណ៍៍នៅតែធ្ងន់ធ្ងរបំផុត។ នៅក្រុងប៉េកាំងពេលចុះពិនិត្យលើការងារបង្ការនិងត្រួតពិនិត្យការឆ្លង លោកសីុគូសបញ្ជាក់ថា បក្សទាំងមូល កងកម្លាំងប្រដាប់អាវុធនិងប្រជាជនទាំំងមូល រួមសាមគ្គីជាមួយប្រជាជនហ៊ូបីុនិងក្រុងវូហាន។ វូហាននិងខេត្តហ៊ូបីុជាអាទិភាពដាច់ខាតសម្រាប់ការបង្ការនិងការត្រួតពិនិត្យការឆ្លង។
លោកសីុគូសបញ្ជាក់ទៀតថាវូហានជាទីក្រុងវីរភាពមួយ ហើយប្រជាជនខេត្តហ៊ូបីុនិងក្រុងវូហានជាប្រជាជនដែលមានវីរភាព ដែលដាច់់ខាតមិនរាថយចំពោះការលំបាកឬគ្រោះថ្នាក់ណាក៏ដោយ ដូចធ្លាប់មានក្នុងប្រវត្តិសាស្ត្រ។ បើដរាបណាយើងធ្វើការរួមគ្នា តស៊ូដោយអង់អាចក្លាហាននិងជម្នះបណ្ដាការលំបាក នោះយើងពិតជាអាចទទួលបានជោគជ័យទាំងស្រុងមួយ ក្នុងការតស៊ូប្រឆាំងការឆ្លង។ ក្រៅពីចិនដីគោកវីរុសកូរ៉ូណាថ្មីមានអ្នកឆ្លងជាង៣២០នាក់ក្នុងប្រទេសនិងដែនដីប្រមាណជា៣០។
រដ្ឋាភិបាលអង់គ្លេសនាថ្ងៃទី១០កុម្ភៈបានចាត់ទុកវីរុសកូរ៉ុណាថ្មី ថាជាការគំរាមកំហែងធ្ងន់ធ្ងរនិងបន្ទាន់មួយសម្រាប់សុភាពសាធារណៈ ហើយប្រកាសពីអ្នកឆ្លងថ្មី៤នាក់ទៀតក្នុងប្រទេសនេះ នាំឲ្យចំនួនអ្នកឆ្លងឡើងដល់៨នាក់។ ចំណែកបណ្ដារដ្ឋមន្ត្រីសុខាភិបាលអឺរ៉ុបនឹងរួមប្រជុំបន្ទាន់នាថ្ងៃទី១៣កុម្ភៈ នៅក្រុងព្រុចសែលដើម្បីពិភាក្សាពីបណ្ដាវិធានការសម្របសម្រូលគ្នាប្រ្រឆាំងការឆ្លង៕
ចែករំលែកព័តមាននេះ