រាជធានីភ្នំពេញ៖ ក្នុងឆ្នាំ២០១៩កន្លងទៅនេះកម្ពុជាមានសន្និធិបំណុលសាធារណៈក្រៅប្រទេសមានជាង៧លានដុល្លារអាមេរិក ហើយបន្តបង្កើនការខ្ចីបន្ថែមប្រមាណ១.៤០០លានSDR (ទ្រព្យបំរុងអន្តរជាតិ) ដើម្បីឆ្លើយតបទៅនឹងសេដ្ឋកិច្ចជាតិ ជាហេតុធ្វើឱ្យបំណុលរបស់កម្ពុជាកើនហូតដល់ជាង៨ពាន់លានដុល្លារអាមេរិកមកដល់ឆ្នាំ២០២០នេះ។
ក្រោយបញ្ចប់វេទិការសាធារណៈស្តីពីការគ្រប់គ្រងម៉ាក្រូសេដដ្ឋកិច្ច និងច្បាប់ថវិកាឆ្នាំ២០២០កាលពីថ្ងៃទី៣០ ខែមករា ឆ្នាំ២០២០ លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ចនិងហិរញ្ញវត្ថុប្រាប់អ្នកសារព័ត៌មានថាកម្ពុជាបង្កើនការខ្ចីប្រាក់ពីបរទេសបន្ថែមដោយសារសេដ្ឋកិច្ចជាតិកើនឡើងហើយប្រាក់ចំណូលដែលកម្ពុជាទទួលបានក៏មានការកើនឡើងដូច្នេះវាមិនមានជាបញ្ហាចោទជាហានិភ័យនោះទេ។
លោក វង្សី វិស្សុត បានមានប្រសាសន៍ថា «កំណើននេះមកពីយើងបង្កើនការខ្ចីកាលពីឆ្នាំទៅគឺយើងបង្កើនការខ្ចីដល់១.៤០០លានSDR ។បើមើលតួលេខវាឡើងដោយសារតែសេដ្ឋកិច្ចរបស់យើងវាឡើង ចំណូលរបស់យើងក៏កើនឡើងខ្លាំងដែរ ដូច្នេះវាមិនចោទជាបញ្ហាជាហានិភ័យអ្វីទាំងអស់។នៅក្នុងការខ្ចីប្រាក់ពីបរទេសនេះគឺចិនមានចំណែកធំជាងគេប្រហែលជាង៤៧%» ។ លោកបានបញ្ជាក់ថា «កម្ចីនៅក្នុងតួលេខឆ្នាំ២០២០នេះយើងខ្ចីពីប្រទេសទ្វេភាគីមានប្រមាណ២ភាគ៣ និង១ភាគ៣ខ្ចីពីស្ថាប័នអន្តរជាតិពហុ
ភាគី»។
ការកំណត់ពិដាននៃការខ្ចីសម្រាប់ឆ្នាំ២០២០ បើតាមលោក ហាវ រតនៈ អគ្គនាយកនៃអគ្គនាយកដ្ឋានថវិកានៃក្រសួងក្រសួងសេដ្ឋកិច្ចនិងហិរញ្ញវត្ថុបង្ហាញថាដោយឈរលើមូលដ្ឋាននៃការគិតគូរនិងផ្អែកទៅលើទិដ្ឋភាពសំខាន់ៗមួយចំនួន ៖ ១)-កំណើនតម្រូវការទុនវិនិយោគដ៏កំហុកក្នុងវិស័យហេដ្ឋារចនាសម្ព័ន្ធនិងសេវាសាធារណៈ ទាំងទំហំ បរិមាណ និងគុណភាពសម្រាប់ជំរុញការហក់ឡើងនៃសេដ្ឋកិច្ចនៅក្នុងដំណាក់កាលថ្មីនិងក្នុងបរិបទនៃភាពមិនច្បាស់លាស់, ២)-គម្រោងអភិវឌ្ឍន៍ដែលនឹងចុះកិច្ចព្រមព្រៀងឥណទានសម្បទាននៅក្នុងឆ្នាំ២០២០ គឺជាគម្រោងវិនិយោគសាធារណៈក្នុងវិស័យអាទិភាព, ៣)-ឥណទានដែលគ្រោងខ្ចីសុទ្ធសឹងតែមានកម្រិតសម្បទានខ្ពស់, ៤)-ស្ថានភាពបំណុលសាធារណៈកម្ពុជាបច្ចុប្បន្ននិងក្នុងរយៈពេលមធ្យម និងវែងនៅតែមានចីរភាពនិងមានហានិភ័យកម្រិតទាប និង៥)-ការបន្តបង្កើនប្រសិទ្ធភាពខ្ពស់ក្នុងការគ្រប់គ្រងនិងការអនុវត្តគម្រោង។
លោកបានគូសបញ្ជាក់ថា «ជារួមក្នុងការគ្រប់គ្រងបំណុលសាធារណៈរាជរដ្ឋាភិបាលប្រកាន់ខ្ចប់នូវគោលការណ៍គន្លឹះចំនួន៥ ៖ ១)-ខ្ចីឥណទានក្នុងទំហំសមស្របដែលស្ថានភាពថវិកានិងសេដ្ឋកិច្ចអាទ្រាំទ្របាន ,២)-ខ្ចីតែឥណទានដែលមានកម្រិតសម្បទាន ឬលក្ខខណ្ឌអនុគ្រោះខ្ពស់, ៣)-ខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើនសេដ្ឋកិច្ចនិងវិស័យបង្កើនផលិតភាពសេដ្ឋកិច្ចឬផលិតភាពផលិតកម្ម, ៤)-ប្រើប្រាស់ឥណទានប្រកបដោយតម្លាភាប គណនេយ្យភាព, ប្រសិទ្ធភាពនិងស័ក្តិសិទ្ធិភាពខ្ពស់បំផុត និង ៥)-ប្រើប្រាស់ឥណទានសម្រាប់ហិរញ្ញប្បទានគម្រោងវិនិយោគលើហេដ្ឋារចនាសម្ព័ន្ធសាធារណៈដែលត្រូវមានស្តង់ដា និងគុណភាពខ្ពស់ស្របតាមគោលការណ៍នៃការគ្រប់គ្រង់ការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិនៅក្នុងដំណាក់កាលថ្មី ពិសេសធានាបាននូវចីរភាពសេដ្ឋកិច្ច សង្គម បរិស្ថាន និងភាពធន់នឹងបម្រែបម្រួលអាកាសធាតុ»។
យោងតាមក្រសួងសេដ្ឋកិច្ចនិងហិរញ្ញវត្ថុ សន្និធិបំណុលសាធារណៈក្រៅប្រទេសគិតត្រឹមដំណាច់ឆ្នាំ២០១៩(ប៉ាន់ស្មាន)មានប្រមាណ៧.៦០៦លានដុល្លារអាមេរិក ហើយក្នុងនោះខ្ចីពីចិន៤៧,៧%,ជប៉ុន៥,៤%,សាធារណៈកូរ៉េ៥,១%,ទ្វេភាគីផ្សេងទៀត២៧,៩%,
ពហុភាគី៥,៨% និងបំណុលមរតកដែលកំពុងចរចាដោះស្រាយ៨,២%។
បើតាមក្រសួងសេដ្ឋកិច្ចនិងហិរញ្ញវត្ថុ សន្និធិបំណុលសាធារណៈក្រៅប្រទេសនៅក្នុងរយៈជិតមួយទសវត្សរ៍កន្លងទៅនេះកម្ពុជាត្រូវការខ្ចីប្រាក់ពីខាងក្រៅកើនឡើងជាបន្តបន្ទាប់។ជាក់ស្តែងនៅឆ្នាំ២០១៤មាន៥.២៧៩លានដុល្លារអាមេរិក,ឆ្នាំ២០១៥មាន៥.៦៤៨លានដុល្លារអាមេរិក,ឆ្នាំ២០១៦មាន៥.៨៦០លានដុល្លារអាមេរិក,ឆ្នាំ២០១៧មាន៦.៦៦៩លានដុល្លារអាមេរិក,ឆ្នាំ២០១៨មាន៧.០២១លានដុល្លារអាមេរិក,ឆ្នាំ២០១៩មាន៧.៦០៦លានដុល្លារអាមេរិកនិងឆ្នាំ២០២០គ្រោង៨.៨៩៨លានដុល្លារអាមេរិក៕ កែសម្រួលដោយ ៖ សុឃាក់
ចែករំលែកព័តមាននេះ