ខេត្តប៉ៃលិន ៖ មន្ត្រីបរិស្ថានខេត្តក៏ដូចជា មន្ត្រីអភិរក្សសត្វព្រៃ និងព្រៃឈើ (MJP) មានការព្រួយបារម្ភយ៉ាងខ្លាំងចំពោះបញ្ហាព្រៃឈើ ខណ:ប្រជាពលរដ្ឋមួយចំនួនបាននាំគ្នាលួចដុតព្រៃរានយកដីដាំដំណាំចម្ការ និងមានករណីភ្លើងឆេះព្រៃខ្លួនឯងជាដើម ពិតជាធ្វើឱ្យមន្ត្រីជំនាញមានការឈឺក្បាលវិលមុខ…
ខេត្តប៉ៃលិន ៖ មន្ត្រីបរិស្ថានខេត្តក៏ដូចជា មន្ត្រីអភិរក្សសត្វព្រៃ និងព្រៃឈើ (MJP) មានការព្រួយបារម្ភយ៉ាងខ្លាំងចំពោះបញ្ហាព្រៃឈើ ខណ:ប្រជាពលរដ្ឋមួយចំនួនបាននាំគ្នាលួចដុតព្រៃរានយកដីដាំដំណាំចម្ការ និងមានករណីភ្លើងឆេះព្រៃខ្លួនឯងជាដើម ពិតជាធ្វើឱ្យមន្ត្រីជំនាញមានការឈឺក្បាលវិលមុខ និងខិតខំចុះល្បាត ព្រមទាំងនាំគ្នាពន្លត់យ៉ាងសស្រាក់សស្រាំ ហើយរហូតមកដល់ពេលនេះ មានការឆេះព្រៃចំនួនជាង១០កន្លែងក៏ត្រូវបានជួយពន្លត់ទាន់ពេលវេលាផងដែរ ។
ហេតុការណ៍នេះបានកើតឡើងកាលពីចុងខែមករា និងនៅដើមខែកុម្ភៈនេះ ស្ថិតនៅចំណុចអូរស្លេវ៥កន្លែង ក្នុងក្រៅពីនេះ គឺឆេះនៅក្នុងភូមិដីក្រហម ភូមិអូរប្រើស ក្នុងសង្កាត់អូរតាវ៉ៅ ក្រុងប៉ៃលិន ។
បើតាមប្រភពព័ត៌មានពីលោក គឹម សុខា ប្រធានមន្ទីរបរិស្ថានខេត្តប៉ៃលិនបានឱ្យដឹងថា រហូតមកដល់ដើមឆ្នាំ២០២០នេះ ករណីប្រជាពលរដ្ឋលួចដុតព្រៃរានយកដី និងករណីភ្លើងឆេះព្រៃនៅតំបន់អភិរក្សមានការកើនឡើងរហូតដល់ជាង១០កន្លែង ដោយកន្លែងខ្លះត្រូវបានគេលួចដុតព្រៃ ហើយប្រជាពលរដ្ឋជួយពន្លត់ទាន់ពេលវេលា កន្លែងខ្លះទៀតត្រូវកម្លាំងបរិស្ថាន និងមន្ត្រីអភិរក្សសត្វព្រៃ (MJP) ចុះទៅជួយអន្តរាគមន៍ពន្លត់ទាន់ពេលផងដែរ ។
លោកបន្តទៀតថា កន្លែងដែលភ្លើងឆេះច្រើនជាងគេ គឺនៅចំណុចដើមគគីប្រហោងចំណុចអូរស្លេវ ក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខណៈនៅតំបន់នេះមានអ្នកលួចកាប់រានព្រៃយកដីធ្វើចម្ការក៏មានកាន់តែច្រើនឡើង ។ លោកបញ្ជាក់ទៀតថា ពេលខ្លះត្រូវគេលួចដុតថ្ងៃ ខណៈស្ងាត់មនុស្ស ហើយក៏មានគេលួចដុតពេលយប់បន្ទាប់ពីមន្ត្រីរបស់លោកត្រឡប់ទៅផ្ទះវិញ ។ តែទោះបីជាយ៉ាងណាឱ្យតែខាងលោកដឹងដំណឹងថា មានករណីភ្លើងឆេះព្រៃ គឺលោកតែងតែបញ្ជាមន្ត្រីក្រោមឱវាទឱ្យចុះទៅជួយពន្លត់ ដើម្បីរក្សាព្រៃឈើដែលនៅសេសសល់តិចតូចទាំងនោះឱ្យនៅគង់វង្សបន្តទៀត ។
លោកក៏មានសំណូមពរដល់ប្រជាពលរដ្ឋផងដែរថា សូមកុំបន្តនាំគ្នាលួចកាប់ និងដុតព្រៃរានយកដីធ្វើជាកម្មសិទ្ធិខ្លួនទៀតព្រោះវាមានផលប៉ះពាល់ដល់បរិស្ថាន និងប៉ះពាល់ដល់សត្វដែលរស់នៅក្នុងព្រៃផងដែរ ។ ម្យ៉ាងវិញទៀតបើអស់ព្រៃឈើនឹងធ្វើឱ្យអាកាសធាតុក្តៅខ្លាំងធ្វើឱ្យបាត់លំនឹងអាកាសធាតុជួនកាលក្លាយទៅជាខ្យល់ព្យុះជាដើម ។
ដូច្នេះបើយើងបំផ្លាញធម្មជាតិនៅពេលក្រោយ ធម្មជាតិនឹងធ្វើបាបតបស្នងមកយើងវិញជាក់ជាមិនខាន ។ បើសិនជាពលរដ្ឋចង់ឱ្យមានភ្លៀងច្រើន ឬអាកាសធាតុមានលំនឹងត្រូវតែខិតខំនាំគ្នាបន្តដាំកូនឈើនៅជុំវិញផ្ទះនៅតាមចម្ការ និងក្បែរៗដងផ្លូវតាមទីសារធាណឱ្យច្រើន ព្រោះរុក្ខជាតិទាំងនោះអាចទាក់ទាញទឹកភ្លៀង និងមានលំនឹងអាកាសធាតុផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ