ខេត្តកំពង់ឆ្នាំង ៖ គិតមកដល់ពេលនេះ មានរយៈពេលជាង៧ខែហើយ ដែលអាជ្ញាធរក្រុងកំពង់ឆ្នាំង បានដាក់កំណត់ឱ្យម្ចាស់ផ្ទះចំនួន១២គ្រួសារ ដែលកំពុងរស់នៅផ្ទះល្វែងនៅចំណុចផ្សារឆ្នាំង ចាកចេញជាបន្ទាន់ ព្រោះតែសំណង់ផ្ទះលែ្វងនេះ ដែលបានសាងសង់ក្នុងសម័យអាណានិគមបារាំង…
ខេត្តកំពង់ឆ្នាំង ៖ គិតមកដល់ពេលនេះ មានរយៈពេលជាង៧ខែហើយ ដែលអាជ្ញាធរក្រុងកំពង់ឆ្នាំង បានដាក់កំណត់ឱ្យម្ចាស់ផ្ទះចំនួន១២គ្រួសារ ដែលកំពុងរស់នៅផ្ទះល្វែងនៅចំណុចផ្សារឆ្នាំង ចាកចេញជាបន្ទាន់ ព្រោះតែសំណង់ផ្ទះលែ្វងនេះ ដែលបានសាងសង់ក្នុងសម័យអាណានិគមបារាំង មានសភាពទ្រុឌទ្រោមណាស់ទៅហើយ ដែលអាចបង្កគ្រោះថ្នាក់ថ្ងៃណាមួយជាយថាហេតុ ។ ប៉ុន្តែមកដល់ពេលនេះ អ្នករស់នៅទាំង១២គ្រួសារនៅមិនទានចាកចេញអស់នៅឡើយទេ ។
ទោះយ៉ាងនេះក្តី អាជ្ញាធរក្រុងកំពង់ឆ្នាំង ក៏មិនដឹងធ្វើយ៉ាងណាដែរ ព្រោះតែពួកគាត់អះអាងថាជាកម្ម
សិទ្ធិរបស់គាត់ ព្រោះតែពួកគាត់គ្មានលទ្ធភាពធ្វើថ្មីបាន ។ សូមរំឭកថា យោងតាមសេចក្តីជូនដំណឹងរបស់រដ្ឋបាលសាលាក្រុងកំពង់ឆ្នាំង បានជូនដំណឹងដល់ប្រជាពលរដ្ឋដែលកំពុងរស់នៅលើសំណង់អគារចំនួន១៣ល្វែង ចាប់ពីអគារលេខB134 ដល់B147 ដែលមានប្រជាពលរដ្ឋ១២គ្រួសារកំពុងរស់នៅបានបញ្ជាក់ថា តាមមន្ត្រីជំនាញដែលបានចុះធ្វើការសិក្សាលើអគារខាងលើនេះ អាចនឹងបាក់ស្រុត រលំនៅថ្ងៃណាមួយជាមិនខាន ព្រោះតែអគារនេះមានអាយុកាលប្រមាណជិត១០០ឆ្នាំទៅហើយ ហើយមានសភាពពុកផុយដោយកន្លែងទៀតផង ។
ហេតុនេះហើយបងប្អូនដែលកំពុងតែស្នាក់នៅ ត្រូវចាកចេញដោយមិនត្រូវដេកមិនត្រូវចូលជ្រក ឬសម្រាកឡើយ និងផ្អាកការធ្វើអាជីវកម្មលក់ដូរចាប់ពីថ្ងៃទី២៨ មិថុនា ឆ្នាំ២០១៩តទៅ ។ ក៏ប៉ុន្តែតាំងពីពេលដាក់ឱសានវាទនោះ មកដល់ពេលនេះមានរយៈពេលជាង៧ខែមកហើយ ប្រជាពលរដ្ឋទាំងនោះនៅមិនទាន់ចាកចេញនៅឡើយទេ ។
អភិបាលក្រុងកំពង់ឆ្នាំងលោក យិន សាវ៉េន កាលពីរសៀលថ្ងៃទៅ២៨ មករា ឆ្នាំ២០២០ បានប្រាប់កោះសន្តិភាពតាមទូរស័ព្ទថា រដ្ឋបាលសាលាក្រុងកំពង់ឆ្នាំង បានជូនដំណឹងដល់អ្នករស់នៅលើផ្ទះល្វែងដែលមានអាយុកាលដ៏ចំណាស់នេះរួចហើយ ប៉ុន្តែបើអ្នករស់នៅមិនព្រមចេញ លោកក៏មិនដឹងធ្វើម៉េចដែរ បើមានគ្រោះថ្នាក់សូមកុំបន្ទោសអាជ្ញាធរ ព្រោះអាជ្ញាធរបានជូនដំណឹងដល់ពួកគាត់រួចហើយ ។
ទោះយ៉ាងនេះក្តី តាមរយៈប្រព័ន្ធផ្សព្វផ្សាយ លោកនៅតែអំពាវនាវជាថ្មី ដល់ម្ចាស់ផ្ទះដែលកំពុងស្នាក់នៅក្នុងអគារខាងលើនេះ សូមមេត្តាចាកចេញ រកកន្លែងស្នាក់នៅបណ្តោះអាសន្ន ហើយសហការគ្នាវាយអគារចាស់នេះ ចេញហើយធ្វើអគារថ្មីជាកម្មសិទ្ធិផ្ទាល់ខ្លួនចុះ ព្រោះក្នុងចំណោមផ្ទះទាំង១៣ល្វែង មានមួយភាគជាអគាររបស់រដ្ឋ ដែលអាជ្ញាធរខេត្តទើបសុំកាត់ចេញពីបញ្ជីសារពើភ័ណ្ឌរួចហើយដែរ ដើម្បីប្រគល់ជូនអ្នកដែលបានកាន់កាប់តាំងពីដើមមក ។
គួររំលឹកដែរថា អគារផ្ទះល្វែង១៣ល្វែងខាងលើនេះ គឺកសាងសម័យអាណានិគមនិយមបារាំងក្នុងឆ្នាំ១៩៣១ មកដល់ពេលនេះមានអាយុកាល៨៩ឆ្នាំហើយកំពុងមានសភាពចាស់ទ្រុឌទ្រោមជាខ្លាំង ។ អ្វីដែលជាប្រការគួរឱ្យព្រួយបារម្ភនេះ ប្រសិនបើអគារទាំងនេះបាក់រលំនោះ ពិតណាស់ថានឹងក្លាយជាមហាសោកនាដកម្មមួយដោយចៀសមិនផុត ។ បងប្អូនប្រជាពលរដ្ឋគប្បីធ្វើការដោះស្រាយដល់បញ្ហានេះហើយ មិនអាចផ្សងព្រេងរស់នៅប្រឈមនឹងគ្រោះថ្នាក់គ្រប់ពេលវេលាបាននោះទេ ។ ការធ្វើលំនៅឋានប្រវាស់ជាមួយធនាគារក៏អាចធ្វើទៅបានដែរ មិនគួរទាល់តំរិះទាល់គំនិតរហូតអគារដ៏ចំណាស់នេះបាក់សង្កត់ ទើបស្តាយក្រោយនោះទេ ៕
ចែករំលែកព័តមាននេះ