រាជធានីភ្នំពេញ ៖ នាវារបស់កម្ពុជាកំពុងដំណើរការទៅមុនហើយ មិនអាចអ្នកណាមករារាំងបានឡើយ ពោល គឹដំណើររៀបចំការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ ឆ្នាំ២០១៨នេះ នៅដំណើរជាធម្មតា ។ នេះបើតាមអ្នកនាំពាក្យគណបក្សប្រជាជនកម្ពុជា…
រាជធានីភ្នំពេញ ៖ នាវារបស់កម្ពុជាកំពុងដំណើរការទៅមុនហើយ មិនអាចអ្នកណាមករារាំងបានឡើយ ពោល គឹដំណើររៀបចំការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ ឆ្នាំ២០១៨នេះ នៅដំណើរជាធម្មតា ។ នេះបើតាមអ្នកនាំពាក្យគណបក្សប្រជាជនកម្ពុជា ។
លោកសុខ ឥសានអ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី២០ ខែឧសភាថាចង់ ឬមិនចង់ចូលរួមបោះឆ្នោតនាវាបានដំណើរទៅមុខហើយ មិនអាចរុញរាឲ្យថយក្រោយបានឡើយ ។
ការលើកឡើងនេះបន្ទាប់ពីលោកសម រង្ស៊ីអតីតប្រធានគណបក្សសង្គ្រោះជាតិបានលើកឡើងថា ការចូលរួមបោះឆ្នោតជាសិទ្ធិរបស់ពលរដ្ឋគ្រប់រូប តែការមិនចូលរួមបោះឆ្នោតក៏ជាសិទ្ធិរបស់ពលរដ្ឋគ្រប់រូបដែរ ។ ករណីនេះរឹតតែច្បាស់ថែមទៀតនៅពេលដែលយើងដឹងថា គេអំពាវនាវឲ្យយើងចូលរួមក្នុងការបោះឆ្នោតក្លែងក្លាយមួយ ដែលមិនផ្តល់ជម្រើសពិតប្រាកដជូនប្រជាពលរដ្ឋ ហើយដែលធ្វើឡើងគ្រាន់តែ ដើម្បីបំភ្លៃឆន្ទៈប្រជាពលរដ្ឋក្នុងគោលបំណងតែមួយគត់ គឺផ្តល់ភាពស្របច្បាប់ឲ្យរបបផ្តាច់ការដែលប្រជាពលរដ្ឋភាគច្រើនស្អប់ខ្ពើម ។
យ៉ាងណាក្តីលោកសុខ ឥសានបានលើកឡើងថា ចាប់តាំងពីការបោះឆ្នោតឆ្នាំ១៩៩៣ រហូតមករាជរដ្ឋាភិបាលកម្ពុជាគ្រប់នីតិកាលនៃរដ្ឋសភាបានប្រកាន់ខ្ជាប់តាមគោលការណ៍លទ្ធិប្រជាធិបតេយ្យ ។ ទន្ទឹមនឹងនេះដើម្បីធានានិរន្តរភាពនៃលទ្ធិប្រជាធិបតេយ្យរាជរដ្ឋាភិបាលចាំបាច់ត្រូវគួបផ្សំជាមួយការពង្រឹងនីតិរដ្ឋ ។
លោកបន្តថា ការអនុវត្តនីតិរដ្ឋនេះហើយដែលប៉ះទង្គិចជាមួយក្រុមជនដែលប្រព្រឹត្តរំលោភច្បាប់ ជាពិសេសភាគច្រើន ជាសមាសភាពមកពីអតីតបក្សប្រឆាំងដែលតែងតែបង្ករឿងនាំឲ្យប៉ះពាល់ផលប្រយោជន៍ជាតិ និងប្រជាជន ។
លោកក៏បានបញ្ជាក់ថា «បញ្ហាសំខាន់ គឺសកម្មភាពអនុវត្តតាមផែនការរបស់រដ្ឋបរទេសដែលចង់ផ្តួលរំលំរាជរដ្ឋាភិបាលកម្ពុជាស្របច្បាប់ដែលពួកគេយល់ថា ជាឧបសគ្គដល់នយោបាយវាតទីនិយមរបស់ពួកគេ ក្នុងការប្រកួតប្រជែងមនោគមន៍វិជ្ជានៅលើពិភពលោក ។ ដូច្នេះហើយ ទោះចង់ ឬមិនចង់នាវាកម្ពុជានៅតែត្រូវប្រឈមមុខ ចំពោះខ្យល់ព្យុះសង្ឃរាជាមិនខានឡើយ ទោះបីរាជរដ្ឋាភិបាលកម្ពុជាដឹកនាំដោយសម្តេចតេជោហ៊ុន សែន ខិតខំបញ្ជៀសយ៉ាងណាក៏ដោយ » ។
លោកក៏បានសង្កត់ធ្ងន់ ប៉ុន្តែដោយសារកម្លាំងមហាសាមគ្គីប្រជាជនកម្ពុជាដែលជាម្ចាស់លទ្ធិប្រជាធិបតេយ្យនៅកម្ពុជាក្រោមការដឹកនាំបញ្ជារបស់សម្តេចតេជោព្រមទាំងមានការជួយឧបត្ថម្ភគាំទ្រពីបណ្តាប្រទេសស្រឡាញ់យុត្តិធម៌ និងសន្តិភាពលើសកលលោក នាវាកម្ពុជាពិតជាអាចទ្រោលសភាពការណ៍បាន រួចផុតពីហានិភ័យផ្សេងៗជាក់ជាមិនខានឡើយ ។
លោកសម រង្ស៊ីបានសរសេលើបណ្តាញសង្គមហ្វេសប៊ុកថា ពហិការមិនទៅបោះឆ្នោតជាសិទ្ធិរបស់ប្រជាពលរដ្ឋ បើការបោះឆ្នោតណាមួយជាការបោះឆ្នោតក្លែងក្លាយចំពោះមន្ត្រីរដ្ឋាភិបាលសម្តេចតេជោ ហ៊ុន សែន និងគូកនទាំងអស់ដែលកំពុង ឬមានបំណងប្តឹងខ្ញុំ បន្ទាប់ពីការអំពាវនាវរបស់ខ្ញុំសូមឲ្យប្រជាពលរដ្ឋធ្វើពហិការមិនចូលរួមការបោះឆ្នោតនៅថ្ងៃទី២៩ ខែកក្កដា ខាងមុខ ។
លោកបានបញ្ជាក់ថា «ខ្ញុំសូមរំលឹកថា ការចូលរួមបោះឆ្នោតជាសិទ្ធិរបស់ពលរដ្ឋគ្រប់រូប តែការមិនចូលរួមបោះឆ្នោត ក៏ជាសិទ្ធិរបស់ពលរដ្ឋគ្រប់រូបដែរេះ ។ ករណីនេះរឹតតែច្បាស់ថែមទៀតនៅពេលដែលយើងដឹងថា គេអំពាវនាវឲ្យយើងចូលរួមក្នុងការបោះឆ្នោតក្លែងក្លាយមួយដែលមិនផ្តល់ជម្រើសពិតប្រាកដជូនប្រជាពលរដ្ឋ ហើយដែលធ្វើឡើងគ្រាន់តែដើម្បីបំភ្លៃឆន្ទៈប្រជាពលរដ្ឋក្នុងគោលបំណងតែមួយគត់ គឺផ្តល់ភាពស្របច្បាប់ឲ្យរបបផ្តាច់ការដែលប្រជាពលរដ្ឋភាគច្រើនស្អប់ខ្ពើម» ។
លោកក៏បានលើកឡើងថា អ្នករាយការណ៍ពិសេសអង្គការសហប្រជាជាតិលោកស្រី រូណា ស្មីត (Rhona Smith) បានបញ្ជាក់យ៉ាងច្បាស់ ក្នុងសេចក្តីថ្លែងការណ៍មួយរបស់លោកចុះថ្ងៃ៣០ មេសា ២០១៨ ៖ «ការបោះឆ្នោតណាមួយដែលគណបក្សប្រឆាំងដ៏ធំជាងគេត្រូវបានរារាំងមិនឲ្យចូលរួម មិនមែនជាការបោះឆ្នោតពិតប្រាកដទេ» ។ ការបោះឆ្នោតដែលមិនពិតប្រាកដ គឺជាការបោះឆ្នោតក្លែងក្លាយ ។ នរណាក៏ដោយមិនត្រូវបង្ខំប្រជាពលរដ្ឋឲ្យទៅចូលរួមការបោះឆ្នោតក្លែងក្លាយណាមួយទេ ។ ផ្ទុយទៅវិញ ពលរដ្ឋដែលចេះគិតតែបន្តិចគួរធ្វើពហិការមិនចូលរួមដាច់ខាតការបោះឆ្នោតក្លែងក្លាយបែបនេះ ។
លោកសម រង្ស៊ីបានគូសបញ្ជាក់ថា«ខ្ញុំគោរពសិទ្ធិគូបដិបក្ខរបស់ខ្ញុំ ក្នុងការមានយោបល់ និងសម្តែងមតិ របស់ពួកគេ ។ ខ្ញុំសូមឲ្យគេគោរពសិទ្ធិរបស់ខ្ញុំផងដែរ ក្នុងការមានយោបល់ និងសម្តែងមតិរបស់ខ្ញុំ ។ ខ្ញុំមិនមានមធ្យោបាយ និងបំណងថោកទាបទៅរារាំងពលរដ្ឋណាមិនឲ្យគេទៅបោះឆ្នោត បើគេមានចិត្តចង់ ទៅបោះឆ្នោត ។ មានតែរបបផ្តាច់ការទេ ដែលមានមធ្យោបាយ និងបំណងថោកទាបបង្ខំឲ្យពលរដ្ឋជាច្រើនលើសលប់ទៅបោះឆ្នោត ទោះបីជាពួកគេមិនមានចិត្តចង់ទៅបោះឆ្នោតក៏ដោយ ពីព្រោះពួកគេយល់ឃើញថា វាជាការបោះឆ្នោតក្លែងក្លាយដូចអង្គការសហប្រជាជាតិបានបញ្ជាក់ គឺជាការបោះឆ្នោតដើម្បីគ្រាន់តែប្រថាប់ត្រាឲ្យរបបផ្តាច់ការតែប៉ុណ្ណោះ» ។
លោកសុខ ឥសានបានលើកឡើងថា លោកសម រង្ស៊ី បរាជ័យនយោបាយ តែសម រង្ស៊ីនៅមានយន្តហោះជិះ នៅមានម្ហូបឆ្ងាញ់ៗ តែបងប្អូនបានអីដែរ ។ ដូច្នេះបងប្អូនដែលចាញ់បោកសម រង្សី ត្រូវខាតបង់ទាំងពេលវេលា ទាំងលុយកាក់ និងទ្រព្យសម្បត្តិ ហើយដេកព្រួយរហូត ។ តែសម រង្ស៊ី មិនដែលគិតព្រួយម្តងណាទេ មានតែសប្បាយដើរស៊ីចាយ ដេកសណ្ឋាគារធំៗយ៉ាងសែនសប្បាយ លើគំនរទុក្ខរបស់អ្នគាំទ្រខ្លួន ៕
ចែករំលែកព័តមាននេះ