រាជធានីភ្នំពេញ ៖ ផ្ទះល្វែងមួយកន្លែងសង្ស័យឆ្លងចន្តរអគ្គិសនីនៅចំនៀងផ្ទះ បណ្ដាលឲ្យឆាបឆេះខូចខាតសម្ភារអស់មួយចំនួនតូច និងបង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច កាលពីវេលាម៉ោង១២និង១០នាទីរំលងអធ្រាត្រ ឈានចូលថ្ងៃទី០៩ ខែមករា ឆ្នាំ២០១៨ ត្រង់ចំណុចផ្ទះលេខ៨០ និង៨១ តាមបណ្ដោយផ្លូវលេខ១៥ ក្នុងបុរីភពថ្មី ក្បែរនឹងការដ្ឋានសំណង់ផ្សារទំនើបអ៊ីអន់ទី២ ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
បើតាមសម្តីពីស្ត្រីម្នាក់ជាអ្នកធ្វើការ និងស្នាក់នៅក្នុងផ្ទះកើតហេតុខាងលើ បានរៀបរាប់ឲ្យដឹងថា នៅក្នុងផ្ទះកើតហេតុ គឺមានមនុស្សស្រីដែលជាអ្នកបម្រើចំនួនបួនទៅប្រាំស្នាក់នៅក្នុងផ្ទះកើតហេតុ ដោយឡែកម្ចាស់ផ្ទះ គឺមិនបានស្នាក់នៅក្នុងផ្ទះខាងលើនោះទេ ។
នៅមុនពេលកើតហេតុ គាត់រួមទាំងអ្នកធ្វើការប៉ុន្មាននាក់ទៀត បាននាំគ្នាឡើងទៅសម្រាកនៅឯជាន់ខាងលើ លុះដល់វេលាកើតហេតុ ស្រាប់តែគាត់ឮសំឡេងដូចជាមានអ្នកបុកកញ្ចក់ និងឮសំឡេងស្រែកឆោឡោ បន្ទាប់មកគាត់ក៏បានរត់ចុះមកមើលស្រាប់តែឃើញមានផ្សែង និងអណ្ដាតភ្លើងចេញមកពីចំនៀងផ្ទះ និងឃើញមានប្រជាពលរដ្ឋកំពុងវាយបំបែកកញ្ចក់ទ្វារ និងបង្អួចយកបំពង់ពន្លត់អគ្គិភ័យបាញ់ពន្លត់អស់ជាង២០បំពង់នៅតែមិនរលត់ ។
ភ្លាមៗនោះក៏មានប្រជាពលរដ្ឋបានទាក់ទងសមត្ថកិច្ចមូលដ្ឋានក៏ដូចជារថយន្តពន្លត់អគ្គិភ័យរបស់ស្នងការដ្ឋានរាជធានីភ្នំពេញ ចេញមកអន្តរាគមន៍បាញ់ពន្លត់អស់ចំនួនមួយគ្រឿង ទើបរលត់ទៅវិញជាស្ថាពរ ។
បើតាមសម្តីពីសមត្ថកិច្ចបានឲ្យដឹងថា នៅក្នុងករណីអគ្គិភ័យឆាបឆេះខាងលើនោះ គឺបង្កឲ្យទ្រព្យសម្បត្តិនៅក្នុងផ្ទះរងការខូចខាតអស់មួយចំនួនតូច ចំណែកឯផ្ទះគ្រាន់តែរងការខូចខាតឆេះជាន់ផ្ទាល់ដីផ្នែកខាងមុខឆេះរោលបន្តិចបន្តួច ។ តាមការសន្និដ្ឋានជំហានដំបូង សមត្ថកិច្ចប្រាប់ថា បង្កឡើងដោយសារតែឆ្លងចរន្តអគ្គិសនី ចំពោះមូលហេតុពិតប្រាកដសមត្ថកិច្ចកំពុងធ្វើការស្រាវជ្រាវបន្តទៀត ៕
ចែករំលែកព័តមាននេះ