ខេត្តបន្ទាយមានជ័យ ៖ ស្ថិរភាពនយោបាយនិងសន្តិភាព កំណើនសេដ្ឋកិច្ចដ៏រឹងមាំ និងស្ថិរភាពសង្គមរយៈពេលវែង គឺជាកត្តាសំខាន់បំផុតដែលវិនិយោគិនជប៉ុនសម្លឹងមើល មុននឹងបោះទុនវិនិយោគលើប្រទេសណាមួយ ។ ដោយសារប្រទេសកម្ពុជាមានកត្តាទាំង៣ខាងលើនេះ បានជំរុញឲ្យជប៉ុនមកបណ្ដាក់ទុនវិនិយោគនៅកម្ពុជាមានកំណើនជាបន្ដបន្ទាប់…
ខេត្តបន្ទាយមានជ័យ ៖ ស្ថិរភាពនយោបាយនិងសន្តិភាព កំណើនសេដ្ឋកិច្ចដ៏រឹងមាំ និងស្ថិរភាពសង្គមរយៈពេលវែង គឺជាកត្តាសំខាន់បំផុតដែលវិនិយោគិនជប៉ុនសម្លឹងមើល មុននឹងបោះទុនវិនិយោគលើប្រទេសណាមួយ ។ ដោយសារប្រទេសកម្ពុជាមានកត្តាទាំង៣ខាងលើនេះ បានជំរុញឲ្យជប៉ុនមកបណ្ដាក់ទុនវិនិយោគនៅកម្ពុជាមានកំណើនជាបន្ដបន្ទាប់ ។
ថ្លែងក្នុងឱកាសសម្ពោធរោងចក្រផលិតគ្រឿងបន្លាស់រថយន្តនៅតំបន់សេដ្ឋកិច្ចពិសេសសានកូ ក្រុងប៉ោយប៉ែត កាលពីថ្ងៃទី៨ ធ្នូ កន្លងមក រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាកម្ពុជា បានលើកឡើងថា បច្ចុប្បន្ន កម្ពុជាមានក្រុមហ៊ុនជប៉ុនចំនួន១១៥ ក្នុងនោះជាង១០ជាក្រុមហ៊ុនកាត់ដេរសម្លៀកបំពាក់ គ្រឿងអេឡិចត្រូនិក និងក្រុមហ៊ុនផលិតគ្រឿងបន្លាស់រថយន្ត និងម៉ូតូ ។
លោក សុខ ចិន្តាសោភា អគ្គលេខាធិការក្រុមប្រឹក្សាកម្ពុជារូបនេះ បានថ្លែងថា ៖« ក្នុងចំណោមក្រុមហ៊ុនជប៉ុនដែលកំពុងវិនិយោគចំនួន១១៥នោះ ភាគច្រើនវិនិយោគនៅតំបន់សេដ្ឋកិច្ចពិសេស ។ ដោយឡែក នៅក្រុងប៉ោយប៉ែតមានចំនួន៨កន្លែង, រាជធានីភ្នំពេញមានប្រមាណ៣០កន្លែង, ក្រុងបាវិត ខេត្តស្វាយរៀង និងខេត្តព្រះសីហនុ កំពុងដំណើរការ » ។
លោកបន្ដថា ៖« ការចាប់ដំណើរការរបស់ក្រុមហ៊ុន Techno Park Poi Pet នាពេលនេះ អាចចាត់ទុកថាជាមេដែក និងជាកម្លាំងចលករដ៏មានប្រសិទ្ធភាពក្នុងការទាក់ទាញ និងស្រូបយកក្រុមហ៊ុនវិនិយោគដទៃទៀតមកក្នុងតំបន់សេដ្ឋកិច្ចពិសេស សានកូ ប៉ោយប៉ែត ជាពិសេសក្រុមហ៊ុនវិនិយោគជប៉ុន ដែលមានសកម្មភាពក្នុងវិស័យផលិតសម្ភារបរិក្ខារ អេឡិចត្រូនិក និងគ្រឿងបង្គុំរថយន្ដ ។ សកម្មភាពទាំងនេះមិនត្រឹមតែបានចូលរួមចំណែកក្នុងការធ្វើពិពិធកម្មវិនិយោគនៅកម្ពុជាប៉ុណ្ណោះទេ ប៉ុន្ដែថែមទាំងបានរួមចំណែកផ្ទេរនូវចំណេះ ជំនាញ បទពិសោធន៍ការងារ និងជាពិសេសបានបង្កើតនូវការងារជាច្រើនកន្លែងដល់ប្រជាពលរដ្ឋខ្មែរយើងនាពេលបច្ចុប្បន្ន និងទៅថ្ងៃខាងមុខ ព្រមទាំងបានចូលរួមចំណែកដល់ការអនុវត្តគោលនយោបាយឧស្សាហកម្មកម្ពុជាឆ្នាំ២០១៥-២០២៥ ផងដែរ » ។
ឯកអគ្គរាជទូតជប៉ុនប្រចាំកម្ពុជា លោក ហ៊ីដេហ៊ីសា ហូរីណូឈី មានប្រសាសន៍ដែរថា ៖« ដោយបានការគាំទ្រ និងសហប្រតិបត្តិការពីរាជរដ្ឋាភិបាលកម្ពុជា មានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសកម្ពុជាមានសុខសន្តិភាព និងការអភិវឌ្ឍ ហើយវិនិយោគិនជប៉ុនបានចូលមកវិនិយោគនៅកម្ពុជា ដើម្បីជួយឲ្យប្រជាពលរដ្ឋមានការងារធ្វើ » ។
លោកឯកអគ្គរាជទូត ក៏បានថ្លែងកោតសរសើរពីកិច្ចអភិវឌ្ឍន៍នៅក្នុងតំបន់សេដ្ឋកិច្ចពិសេស សានកូ ប៉ោយប៉ែត និងសង្ឃឹមយ៉ាងមុតមាំថា តាមរយៈក្រុមហ៊ុន Techno Park Poi Pet តំបន់សេដ្ឋកិច្ចពិសេសមួយនេះ នឹងបន្ដទាក់ទាញវិនិយោគិនបន្ថែមទៀត ដើម្បីជំរុញការអភិវឌ្ឍក្រុងប៉ោយប៉ែត ក៏ដូចជាប្រទេសកម្ពុជាទាំងមូល ។
លោកបញ្ជាក់ថា ៖« ក្នុងនាមរដ្ឋាភិបាលជប៉ុន លោកនឹងខិតខំប្រឹងប្រែងជំរុញការវិនិយោគជប៉ុននៅកម្ពុជាឲ្យកាន់តែមានកំណើនបន្ថែមទៀត » ។
លោក អ៊ុ រាត្រី អភិបាលរងខេត្ត បានមានប្រសាសន៍ថា ៖« ក្រុងប៉ោយប៉ែតបានកែប្រែ និងឈានឡើងផ្នែកសេដ្ឋកិច្ច ដែលមានច្រកអន្តរជាតិប៉ោយប៉ែតសម្រាប់នាំទំនិញចេញចូល និងភ្ញៀវទេសចរ ហើយមានតំបន់សេដ្ឋកិច្ចពិសេសចំនួន៤គឺ តំបន់សេដ្ឋកិច្ចពិសេសអូរនាង, សានកូ, លីអ៊ុតនី និងតំបន់សេដ្ឋកិច្ចពិសេសប៉ោយប៉ែត ដែលមានរោងចក្រចំនួន១៤ កំពុងដំណើរការ ក្នុងនោះមានក្រុមហ៊ុនជប៉ុនចំនួន៨កន្លែង ដែលមានកម្មករ-កម្មការិនីប្រមាណ៦.៨៦៣នាក់ និងកាស៊ីណូ១០កន្លែង » ។
សេដ្ឋវិទូ ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងកន្លងមកថា ជប៉ុនបានវិនិយោគលើមូលដ្ឋានសំខាន់ៗ រយៈពេលវែងនៅកម្ពុជារួចហើយ ។
បច្ចុប្បន្ន វិនិយោគិនជប៉ុនបានវិនិយោគសាងសង់ខុនដូ សណ្ឋាគារ អាផាតមិន ការិយាល័យ ភោជនីយដ្ឋាន មន្ទីរពេទ្យ ទីលានវាយកូនហ្គោល ក៏ដូចជាសេវាកម្មហិរញ្ញវត្ថុនានា ។ តាមរយៈមូលដ្ឋានទាំងនេះ គឺជាភាពចាំបាច់សម្រាប់ទាក់ទាញវិនិយោគិនជប៉ុនឲ្យមកបណ្ដាក់ទុនរកស៊ីនៅកម្ពុជា នាពេលអនាគតកាន់តែច្រើន ។
លោកថា ៖« ការបើកជើងហោះហើរត្រង់របស់អាកាសចរណ៍ ANA កាលពីចុងឆ្នាំមុន គឺជាប្រវត្តិសាស្ត្រនៃការភ្ជាប់ទំនាក់ទំនងនយោបាយ និងសេដ្ឋកិច្ចជប៉ុន-កម្ពុជា ឲ្យកាន់តែរឹងមាំថែមទៀត » ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បាននិយាយនាពេលកន្លងមកថា កម្ពុជាកំពុងក្លាយជាទីតាំងទាក់ទាញវិនិយោគិន ហើយវិនិយោគិនមុននឹងមកវិនិយោគនៅប្រទេសណា ពួកគេមើលទៅលើកត្តាចំនួន៣ ដូចជា ស្ថិរភាពនយោបាយនិងសន្តិភាព កំណើនសេដ្ឋកិច្ចដ៏រឹងមាំ និងស្ថិរភាពសង្គមរយៈពេលវែង ។ លោកបន្តថា កម្ពុជាកំពុងសម្រេច និងរក្សាបាននូវស្ថិរភាពទាំង៣ផ្នែកនេះ ដែលជួយឲ្យកម្ពុជាក្លាយជាទីតាំងសម្រាប់វិនិយោគិនមកពីជុំវិញពិភពលោក ។
គួរកត់សម្គាល់ថា បច្ចុប្បន្ន គម្រោងវិនិយោគជប៉ុនដែលបានកត់ត្រាដោយក្រុមប្រឹក្សាអភិវឌ្ឍន៍កម្ពុជា មានចំនួន១១៥គម្រោង ក្នុងទុនវិនិយោគសរុបប្រមាណជាង១ប៊ីលានដុល្លារអាមេរិក ដែលបានបង្កើតការងារប្រមាណ៣៦.០០០កន្លែង ។ ដោយឡែក នៅក្រុងប៉ោយប៉ែត បច្ចុប្បន្នមានតំបន់សេដ្ឋកិច្ចពិសេសចំនួន៣ ដែលទទួលបានគោលការណ៍វិនិយោគពីរាជរដ្ឋាភិបាល និងមានក្រុមហ៊ុនវិនិយោគសរុបចំនួន១៥ ដោយបានស្រូបយកកម្លាំងពលកម្មប្រមាណ៣.៥០០កន្លែង ។
ធនាគារពិភពលោក ក៏ដូចជាធនាគារអភិវឌ្ឍន៍អាស៊ីបានព្យាករមកលើស្ថានភាពសេដ្ឋកិច្ចកម្ពុជានាពេលកន្លងទៅ គឺជាការផ្ដល់នូវទំនុកចិត្តបន្ថែមទៀតដល់វិនិយោគិនបរទេស មកបណ្ដាក់ទុនវិនិយោគនៅក្នុងប្រទេសកំពុងអភិវឌ្ឍន៍មួយនេះ ។ បច្ចុប្បន្ន វិនិយោគិនមកពីបណ្ដាប្រទេសក្រៅតំបន់ បានកំពុងស្វែងរកការបណ្ដាក់ទុននៅក្នុងប្រទេសកម្ពុជាជាបន្តបន្ទាប់ ដែលកត្តាទាំងនេះហើយបានជួយដល់សេដ្ឋកិច្ចកម្ពុជា និងផ្ដល់ការងារយ៉ាងច្រើនដល់ពលរដ្ឋក្នុងប្រទេស ៕
ចែករំលែកព័តមាននេះ