រាជធានីភ្នំពេញ ៖ អនាគតស្វាមីនាង ដេននី ក្វាន់ បានចេញមុខមកប្រឆាំងទាស់នូវរាល់ព័ត៌មានទាំងឡាយដែលបានធ្វើការចុះផ្សាយថា តារារូបនេះកំពុងមានជំងឺអាឡែហ្ស៊ីស្បែក និងកំពុងសម្ងំព្យាបាលនៅប្រទេសថៃ។
លោក ចាន់ មករា ដែលជាអនាគតស្វាមីរបស់នាង ដេននី ក្វាន់ បានចាត់ទុកការចុះផ្សាយព័ត៌មិនច្បាស់លាស់ពាក់ព័ន្ធទៅនឹងជំងឺអនាគតភរិយារបស់លោកនាពេលនេះ គឺជាការបំភាន់ភ្នែកមហាជន និងចង់បានការចាប់អារម្មណ៍ចូលអានច្រើនតែប៉ុណ្ណោះ។
ជាការកត់សម្គាល់ ការចុះផ្សាយពីបណ្តាញសារព័ត៌មាននានាពីជំងឺរបស់នាង ដេននី ក្វាន់ នាពេលនេះបានកើតឡើង បន្ទាប់ពីរូបប៉ុន្មានសន្លឹកដែលតារារូបនេះបានបង្ហោះបង្ហាញពីការសម្រាកព្យាបាលមួយនៅក្នុងប្រទេសថៃកាលពីពេលថ្មីៗនេះ។ ជាមួយនឹងការបង្ហាញនូវរូបភាពទាំងនោះ ដេននី ក្វាន់ មិនបានបញ្ជាក់ពីជំងឺអ្វីនោះទេ នាំឱ្យមានការសន្និដ្ឋានទាំងការសង្ស័យពីជំងឺរបស់នាងថា អាចជាបញ្ហាអាឡែហ្ស៊ីស្បែក។
យ៉ាងម៉ិញជុំវិញការលើកឡើងនេះ លោក ចាន់ មករា បានចេញមកជំទាស់ តែបានទទួលស្គាល់ថា ដេននី ក្វាន់ ពិតជាកំពុងសម្រាកព្យាបាលជំងឺនៅប្រទេសថៃពិតប្រាកដមែន តែមិនមែនជំងឺអាឡែហ្ស៊ីស្បែកនោះឡើយ។
លោកបានលើកឡើងថា ខ្ញុំសូមបញ្ជាក់ជាសាធារណៈ គាត់ (ដេននីក្វាន់ មានបញ្ហារលាកសួត ឬទឹកចូលសួត) ដែលបណ្តាលមកពីពេទ្យនៅខ្មែរ ព្យាបាលដោយប្រើសេរ៉ូមច្រើនពេក ទើបធ្វើឱ្យមានទឹកចូលសួត ។ ប៉ុន្តែក្រោយពេលយកមកព្យាបាល និងតាមដានយ៉ាងយកចិត្តទុកដាក់ពីមន្ទីពេទ្យប្រទេសថៃ ស្ថានភាពជំងឺគាត់ធូរស្បើយបាន 60ទៅ70 % ហើយ ហើយប្រមាណយ៉ាងយូរ 4-5 ថ្ងៃទៀត នឹងជាសះស្បើយ 100 % ៕ (កែសម្រួលដោយ ៖ បុប្ផា)
ចែករំលែកព័តមាននេះ