រាជធានីភ្នំពេញ ៖ រថយន្តកុងតឺន័រមួយគ្រឿងបើកលឿនត្រឡប់ក្រោយដាច់គន្លឹះក្រឡាប់ផ្ងារជើងមួយកំណាត់ក្រោយ ហើយមួយកំណាត់មុខបានបើកចូលផែបាត់ បង្កឲ្យមានការភ្ញាក់ផ្អើលកាលពីវេលាម៉ោង៧និង៣៥នាទីយប់ថ្ងៃទី៣១ ខែធ្នូ ឆ្នាំ២០១៨ នៅតាមបណ្ដោយផ្លូវមហាវិថីឈ្នះ ឈ្នះ ទល់មុខផែស្ងួតតិច
ស្រ៊ុន ដែលស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹងថា នៅមុនពេលកើតហេតុ គេឃើញ រថយន្តកុងតឺន័ររបស់ផែស្ងួត តេងឡាយ បើកបរក្នុងទិសដៅពីត្បូងទៅជើងក្នុងល្បឿនយ៉ាងលឿន លុះបើកមកដល់ចំណុចផែស្ងួត តិចស្រ៊ុន ស្រាប់តែរថយន្តកុងតឺន័រខាងលើបានបត់ត្រឡប់ក្រោយមិនបន្ថយល្បឿន បណ្តាលឱ្យក្រឡាប់ផ្ងារជើងមួយកំណាត់ក្រោយ តែសំណាងល្អមិនបណ្តាលអោយក្រឡាប់លើមនុស្ស ដែលធ្វើដំណើរតាមដងផ្លូវខាងលើនោះទេ។
បើតាមសំដីប្រជាពលរដ្ឋដែលធ្វើដំណើរតាមដងផ្លូវខាងលើបាននិយាយថា រថយន្ដកុងតឺន័រផែស្ងួតខាងលើ បើកបលឿនៗណាស់ និងបង្កឲ្យមានគ្រោះថ្នាក់ជាច្រើនលើកផងដែរ ខ្លះបើកបុករត់ចោលរថយន្ត ខ្លះបុករត់មិនដោះស្រាយ ខ្លះបុករត់ចូលផែ ដោយមិនទទួលខុសត្រូវ។
ប្រជាពលរដ្ឋសំណូមពរដល់អ្នកបើកបររថយន្តកុងតឺន័រ មុននឹងបើកបរសូមត្រួតពិនិត្យអោយបានគ្រប់
ជ្រុងជ្រោយ ចៀសវាងកើតមានករណីដូចខាងលើ ។
ក្រោយពេលកើតហេតុ ដោយមិនមានប៉ះពាល់ដល់មនុស្ស និងសម្បត្តិសាធារណៈ សមត្ថកិច្ចបានប្រគល់អោយក្រុមហ៊ុនផែស្ងួតខាងលើបានយករថយន្តស្ទូចមកស្ទូចរថយន្តកុងតឺន័រយកទៅទុកក្នុងផែខាងលើវិញ ៕
ចែករំលែកព័តមាននេះ