រាជធានីភ្នំពេញ ៖ មជ្ឈមណ្ឌលសហគមន៍ធុរកិច្ចនិងអគារការិយាល័យបែបថ្មីមួយ នឹងលេចរូបរាងនៅចំកណ្តាលទីក្រុងភ្នំពេញ នាអំឡុងត្រីមាសទី៤ ឆ្នាំ២០១៩ ខាងមុខ ដែលគម្រោងនេះនឹងចូលរួមចំណែកក្នុងការផ្គត់ផ្គង់តម្រូវការអគារិយាល័យនៅកម្ពុជាបន្ថែម ដែលកំពុងមានតម្រូវការខ្ពស់នាពេលបច្ចុប្បន្ននេះ។ ថ្លែងក្នុងពិធីបុកគ្រឹះសាងសង់…
រាជធានីភ្នំពេញ ៖ មជ្ឈមណ្ឌលសហគមន៍ធុរកិច្ចនិងអគារការិយាល័យបែបថ្មីមួយ នឹងលេចរូបរាងនៅចំកណ្តាលទីក្រុងភ្នំពេញ នាអំឡុងត្រីមាសទី៤ ឆ្នាំ២០១៩ ខាងមុខ ដែលគម្រោងនេះនឹងចូលរួមចំណែកក្នុងការផ្គត់ផ្គង់តម្រូវការអគារិយាល័យនៅកម្ពុជាបន្ថែម ដែលកំពុងមានតម្រូវការខ្ពស់នាពេលបច្ចុប្បន្ននេះ។
ថ្លែងក្នុងពិធីបុកគ្រឹះសាងសង់ មជ្ឈមណ្ឌលសហគមន៍ធុរកិច្ចនិងអគារការិយាល័យ The Point នាព្រឹក ថ្ងៃទី១២ ធ្នូ ឆ្នាំ២០១៨ លោកស្រី អាន សុធីតា នាយិកាគ្រប់គ្រងក្រុមហ៊ុនអចលនទ្រព្យ CBRE ដែលជា
ក្រុមហ៊ុនទទួលបានសិទ្ធិលក់គម្រោងនេះ បានអោយដឹងថា The Point មានទីតាំងក្នុងតំបន់ល្អ ស្ថិតនៅតាមបណ្តោយមហាវិថីម៉ៅ សេទុង ទល់មុខនឹងស្ថានទូតចិន គឺជាសំណង់អាគារកំពស់ ៧ ជាន់។
The Point គឺជាអគារការិយាល័យ និងផ្សារសហគមន៍ ក្រោមការវិនិយោគរួម រវាងវិនិយោគិនក្នុងស្រុក។ អគារការិយាល័យនេះ បានបោះទុនវិនិយោគ ប្រមាណ៧លានដុល្លារអាមេរិក ដោយមិនទាន់រាប់បញ្ចូលតម្លៃដី សាងសង់ឡើយ គឺមានន័យតែតម្លៃ សាងសង់អគារតែប៉ុណ្ណោះ ។
លោកស្រីបន្តថា គម្រោងរបស់ The Point នឹងត្រូវប្រើពេលវេលាសាងសង់ប្រមាណ១ឆ្នាំ ដើម្បីបញ្ចប់គម្រោងនេះទាំងស្រុង ហើយគម្រោងនេះដែរ នឹងផ្គត់ផ្គង់អគារិយាល័យកម្រិត B ទៅកាន់ទីផ្សារកម្ពុជាប្រមាណ ៣ភាគរយនៃតម្រូវការសរុប ។
លោកស្រីថា ៖ «គម្រោងអគារិយាល័យរបស់ The Point មានផ្ទៃក្រឡាសរុបប្រមាណ៩២០០ម៉ែត្រការ៉េ និងផ្សារសហគមន៍ប្រមាណ២២០០ម៉ែត្រការ៉េ ។ សម្រាប់ផ្សារសហគមន៍វិញ គម្រោងនេះក៏ទទួលបានជោគជ័យជាបណ្ដើរៗហើយផងដែរ ដោយក្នុងនោះគេមានក្រុមហ៊ុនធំៗបានទាក់ទងរៀបចំដំណើរការនៅពេលបញ្ចប់គម្រោង ជាក់ស្ដែងដូចជាហាងកាហ្វេដ៏ល្បីមួយរបស់អាមេរិក Starbuck ក៏បានទាក់ទងក្នុងការបើកនៅទីនោះដែរ » ។
លោកស្រីបន្ថែមថា លោកស្រីមានជំនឿជាក់ខ្ពស់លើទីផ្សារអគារិយាល័យនៅតំបន់នោះ ដោយសារតែតម្រូវការអគារិយាល័យមានច្រើន ស្របពេលក្រុមហ៊ុនថ្មីៗទើបបង្កើតក៏ច្រើន ហើយនៅតំបន់នោះ ក៏មិនទាន់មានអគារិយាល័យកម្រិត B ច្រើនប៉ុន្មានដែរ ដូច្នេះនៅពេលបន្តបន្ទាប់ អគារិយាល័យថ្មីនេះ នឹងក្លាយជាកន្លែងដែលមានសក្ដានុពលខ្ពស់សម្រាប់ក្រុមហ៊ុនថ្មីៗនិងក្រុមហ៊ុនធំៗ ។
លោក ផូរ សុធារៈ អគ្គនាយកក្រុមហ៊ុន 3DS Property Management បានអោយដឹងថា The Point ត្រូវបានរចនាឡើងមិនត្រឹមជាអគារិយាល័យទំនើបនោះទេ តែក៏ជាគោលដៅសម្រាប់ជាកន្លែងទិញទំនិញ ពិសារភោជនីយអាហារ និងជាសួនលំហែដែលមានដើមឈើធំៗព័ទ្ធជុំវិញទៅដោយអគារខ្ពស់ៗ ។ កន្លែងលក់ទំនិញដ៏សម្បូរបែបដែលស្ថិតនៅជាន់ផ្ទាល់ដី របស់ The Point នឹងធ្វើអោយអ្នកទៅមកទស្សនាមានភាពងាយស្រួល និងមានអារម្មណ៍ ដូចជាកំពុងដើរកម្សាន្តអញ្ចឹង ។
លោក ផូរ សុធារៈ មានប្រសាសន៍បញ្ជាក់ថា អ្វីដែលសំខាន់បំផុតនោះ គឺ The Point បានគិតគូរយ៉ាងម៉ត់ចត់ទៅលើបញ្ហាចំណតយានយន្ត។ ហេតុដូច្នេះហើយ The Point ត្រូវបានរៀបចំឡើងផ្តល់នូវភាពងាយស្រួលជូនអតិថិជន ដោយចំណតយានយន្ត អាចផ្ទុករថយន្តបានរហូតដល់ 200 គ្រឿង និងទោចក្រយានយន្តរាប់រយគ្រឿងថែមទៀតផង។
លោកសាយ សំអាល់ រដ្ឋមន្ត្រីក្រសួងបរិស្ថាន ដែលបានអញ្ជើញចូលរួមក្នុងពិធីបើកការដ្ឋាន សាងសង់គម្រោង The Point នេះដែរបានមានប្រសាសន៍ថា នេះគឺជាសម្រេចចិត្តមួយដ៏ត្រឹមត្រូវ ក្នុងការបណ្ដាក់ទុនវិនិយោគគម្រោងអគារ ការិយាល័យ និងផ្សារសហគមន៍ The Point នៅពេលនេះ ។
លោករដ្ឋមន្ត្រីមានប្រសាសន៍បន្ថែមថា «តាមរយៈការវិនិយោគនេះ មិនត្រឹមតែឆ្លុះបញ្ចាំងពីជំនឿទុកចិត្តដ៏មុតមាំរបស់វិនិយោគិនទៅលើគោលនយោបាយរបស់រដ្ឋាភិបាលកម្ពុជា តែវាក៏បានបង្ហាញពីការគិតគូរ
របស់វិនិយោគិនទៅលើទីផ្សារកម្ពុជា ដែលកំពុងមានសន្ទុះយ៉ាងខ្លាំងក្លា និងប្រកបដោយភាពទាក់ទាញ
ផងដែរ» ។
លោកបន្តថា បច្ចុប្បន្ននេះ ប្រទេសកម្ពុជាមានសក្ដានុពល និងកត្តាអំណោយផលជាច្រើន សម្រាប់ការវិនិយោគក្នុងស្រុក ក៏ដូចជាបរទេស ព្រោះកម្ពុជាស្ថិតនៅចំណុចកណ្ដាលនៃតំបន់អាស៊ាន ដែលជាចំណុចទាក់ទាញមួយរបស់វិនិយោគិនក្រៅប្រទេសក្នុងការមកបណ្ដាក់ទុនវិនិយោគធ្វើអាជីវកម្ម ។
ទន្ទឹមនឹងនេះដែរ កម្ពុជាក៏ជាប្រទេសមួយមានកំណើនសេដ្ឋកិច្ចយ៉ាងលឿនបំផុតនៅលើពិភពលោក ដែលរក្សាបាននូវកំណើនសេដ្ឋកិច្ចខ្ពស់ជាបន្តបន្ទាប់ ជាមធ្យមក្នុងរង្វង់៧ភាគរយក្នុងមួយឆ្នាំៗ ដែលបានធ្វើឱ្យប្រជាជនកម្ពុជា មានជីវភាពកាន់តែប្រសើរជាលំដាប់ ព្រមទាំងបានកែប្រែកម្ពុជា ពីប្រទេសមានចំណូលទាប មកជាប្រទេសដែលមានចំណូលមធ្យមកម្រិតទាប និងកំពុងបោះជំហានយ៉ាងស្វាហាប់ និងប្រកបដោយភាពជឿជាក់ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ ២០៣០ ។
គួរបញ្ជាក់ថា តាមការវាយតម្លៃរបស់អ្នកជំនាញអចលនវត្ថុជាច្រើនថា តំបន់មហាវិថីម៉ៅសេទុងនឹងក្លាយជាតំបន់ពាណិជ្ជកម្មដ៏មានសក្ដានុពល ហើយក្នុងនោះតម្រូវការអគារិយាល័យនៅតំបន់នោះ នឹងកាន់តែកើនឡើងខ្ពស់ផងដែរ ហើយតំបន់ផ្លូវ២៧១ ក៏កំពុងដេញតាមសកម្មភាពរបស់មហាវិថីម៉ៅសេទុងនេះដែរ គឺពីមុនម៉ៅសេទុងបណ្ដុំទៅដោយកន្លែងលក់គ្រឿងសំណង់ និងបរិក្ខារគេហដ្ឋាន តែពេលនេះបានផ្លាស់ប្តូរទៅជាតំបន់អាជីវកម្មបណ្ដើរៗហើយ ៕ ដោយសហការ
ចែករំលែកព័តមាននេះ