រាជធានីភ្នំពេញ៖ បន្ទាប់ពីក្លាយជាដៃគូសម្តែងជាមួយគ្នាបានប៉ុន្មានរឿងរវាងកញ្ញាឌុច លីដា និងលោកណាខុន មក អ្នកគាំទ្របានបញ្ចុះបញ្ចូលឲ្យពួកគេស្រលាញ់គ្នាជាគូស្នេហ៍ ។ ដូច្នេះហើយធ្វើឲ្យអ្នកទាំង២ហាក់អៀនគ្នានៅពេលបណ្តើរគ្នាទៅណាមកណាចូលរួមកម្មវិធីនានា ។
មួយរយៈចុងក្រោយនេះតារាសម្ដែងណាខុន និងឌុច លីដា ត្រូវបានគេសង្កេតឃើញថា តែងតែបណ្ដើរគ្នាទៅចូលរួមស្ទើរគ្រប់កម្មវិធីនៅពេលមានការអញ្ជើញពីអ្នករៀបចំកម្មវិធី ។ ភាពស្និទ្ធស្នាល និងទៅណាមកណាជាមួយគ្នាជាញឹកញាប់ រហូតធ្វើឲ្យមតិគាំទ្រទាំងក្នុងនិងក្រៅសិល្បៈ លើកឡើងថា អ្នកទាំងពីរកំពុងតែលួច បង្កាត់ភ្លើងស្នេហ៍ ។ ការលើកឡើងនេះក្រោយពីអ្នកទាំងពីរចាប់ដៃគ្នាសម្ដែងជាតួឯកប្រុសស្រី ក្នុងរឿង«ម្ចាស់ចម្ការ»រួចមក ។ អ្នកគាំទ្រថាបន្ទាប់ពីរឿងនេះក៏ជាប់ជំពាក់ជំពិន ចាប់ចិត្តលើគ្នាដកចិត្តមិនរួច ។
ការលើកឡើងនោះត្រូវឌុច លីដា និងណាខុន ទទួលស្គាល់ ថា ពួកគេទាំងពីរពិតជាមាន ចំណងទាក់ទងគ្នាពិសេសមែន តែមិនក្នុងន័យ ស្នេហាទេ គឺក្នុងនាមជាបងប្អូន មិត្តភក្ដិសិល្បៈ ប៉ុណ្ណោះ ។ ចំពោះការដើរតាមគ្នាស្អិតនោះដោយ សារតែមានការស្រឡាញ់ចូលចិត្តពី ហ្វេនៗ ដែលចង់ឲ្យពួកគេក្លាយជាគូស្នេហ៍ ពិត ៗ។
ឌុច លីដា និងលោកណា ខុន ត្រូវអ្នកសារព័ត៌មានចោទសួរក្នុងឱកាសសម្ពោធរឿង«ណូលីណូឡា»កាលពីល្ងាចថ្ងៃទី១៨ កញ្ញា ឆ្នាំ២០១៨ជាវណ្ណកម្មថ្មីរបស់ផលិតកម្មមហាហង្ស។ ស្រីស្អាតមុខស្រស់ឌុច លីដា បានប្រាប់ថា«យើងទាំង២នាក់ភ្ញាក់ផ្អើលនៅពេលដែលប្រិយមិត្តអ្នកគាំទ្រដាក់ទិស ចំៗឲ្យនាងខ្ញុំ និងលោកណា ខុនស្រឡាញ់គ្នាឲ្យដូចជាគូស្នេហ៍ ពិតៗ ។ ចំណុចនេះធ្វើឲ្យនាងខ្ញុំរឹងអស់ខ្លួនប្រាណនៅពេលមានការលើកដាក់បែបនេះ »។
ទោះជាយ៉ាងណាក៏ដោយឌុច លីដា មិនបានច្រានចោលការលើកឡើងនោះឡើយគ្រាន់តែយល់ថាស្នេហាកើតឡើងដោយសារតែការយល់ចិត្តគ្នា ។ នាងបន្តថា«បើមើលទៅលើគុណសម្បត្តិរបស់លោកណា ខុន គឺល្អច្រើនសង្ហា ហើយកំពុងក្លាយជាតារាលេចធ្លោក្នុងពិភពសម្តែង ។ នាងខ្ញុំមិនបដិសេធនោះទេ តែសុំមិនទាន់គិតអ្វីច្រើនជាងមិត្តរួមការងារ។ នេះមកពីយើងទាំង២ឧស្សាហ៍ចេញថតរឿងជាមួយគ្នាប៉ះឈុតស្នេហា ឌឺដងដូចជាក្នុងរឿង«ណូលីណូឡា»គឺសម្តែងកាច់កុងគ្នា ហើយពេលសម្រាកឈប់ថតក៏ថតលេងបែបយុវវ័យ ថតស្និទ្ធផុសលេងយូរទៅមានការបង្អាប់ឲ្យស្រឡាញ់គ្នាតែម្តង»។
ទោះបីជាមានការអះអាងពីសាមីខ្លួនទាំងពីរ បែបនោះក្ដី ក៏មហាជនគិតថា ការទាក់ទងគ្នារវាងអ្នកទាំងពីរអាចលើសពីមិត្តភាព ព្រោះគ្មាន មិត្តរួមការងារណាបណ្ដើរគ្នាដូចគូស្នេហ៍ទៅ ចូលរួមកម្មវិធីបែបនេះទេ ។
លោកណា ខុន និយាយថា«ហាក់ចង់ឲ្យរឿងនេះក្លាយជារណ៍ពិតណាស់ព្រោះលីដាស្អាតហើយពូកែ។ ប្រសិនបើនាងដក់ចិត្តលើខ្ញុំមែនអាចនឹងសិក្សាចិត្តគ្នា ប៉ុន្តែអាស្រ័យលើនិស្ស័យប៉ុណ្ណោះ»។
កន្លងមកអ្នកសិល្បៈដែលអ្នកគាំទ្រសង្ស័យស្រលាញ់គ្នាក្រៅឆាកគឺរវាងលោកខាត់ វៃហាំងនិងស៊ីន យូប៉ីន ។ មួយគូទៀតគឺលោកលឹម ជាឡាយ និងគៀត សុវណ្ណាឡាង ៕
ចែករំលែកព័តមាននេះ