រាជធានីភ្នំពេញ ៖ បច្ចុប្បន្នគេសង្កេតឃើញថា នៅតាមសាលាបណ្តុះបណ្តាលអប់រំដល់កុមារ និងកម្រិតការសិក្សាទូទៅពុំទាន់បានដាក់បញ្ចូលនូវកម្មវិធីប្រឹក្សាផ្នែកអប់រំ និងចិត្តសាស្ត្រឱ្យមានលក្ខណៈទូលំទូលាយនៅឡើយនោះទេ ខណៈដែលអ្នកផ្តល់ប្រឹក្សាយោបល់ យល់ឃើញថា កម្មវិធីប្រឹក្សានេះបានចូលរួមចំណែកសំខាន់មួយក្នុងការលើកកម្ពស់ការសិក្សារបស់សិស្សានុសិស្ស។
កញ្ញា ម៉េង សុខលីន ប្រធានប្រតិបត្តិការ និងអ្នកប្រឹក្សាយោបល់នៃក្រុមហ៊ុន Asia House Aide (AHA) បានឱ្យដឹងថា៖ « កម្មវិធីប្រឹក្សាផ្នែកសិក្សាអប់រំ និងចិត្តសាស្ត្រ បង្កើតឡើងដើម្បីឱ្យសិស្សានុសិស្សទទួលបានការសិក្សាមួយល្អប្រសើរ ហើយកម្មវិធីនេះ យើងរំពឹងទុកថា អាចជួយឱ្យសិស្សានុសិស្សមានភាពស្និទ្ធស្នាលជាមួយមនុស្សជុំវិញខ្លួន ពិសេសជាមួយក្រុមគ្រួសារ»។
កញ្ញាលើកឡើងថា ៖ «សម្រាប់ខ្លួនខ្ញុំផ្ទាល់ បន្ទាប់ពីប្រឡូកនៅក្នុងវិស័យប្រឹក្សាយោបល់ផ្នែកផ្លូវចិត្តសាស្ត្រនេះ ខ្ញុំសង្កេតឃើញនៅប្រទេសកម្ពុជាមិនទាន់សេវាកម្មបែបហ្នឹងច្រើននៅឡើយនោះទេ ។ អ៊ីចឹងខ្ញុំសុំសំណូមពរទៅដល់ប្រមុខរាជរដ្ឋាភិបាល ឬស្ថាប័នដែលពាក់ព័ន្ធអាចជួយគិតគូរបង្កើតឱ្យមានសេវាកម្មបែបនេះឱ្យនៅគ្រប់ស្ថាប័នពាក់ព័ន្ធការអប់រំទាំងអស់ នៅកម្ពុជា»។
អ្នកស្រី គង់ គង្គា ជាប្រជាពលរដ្ឋម្នាក់មានកូនកំពុងសិក្សានៅសាលាវ៉េស្ទឡាញន៍ របស់ក្រុមហ៊ុនវេសឡាញ អេឌ្យូខេសិន គ្រុប បាននិយាយថា ៖ «កម្មវិធីប្រឹក្សាយោបល់ផ្នែកសិក្សាអប់រំ និងចិត្តសាស្ត្រ បើសិនជាអ្នកជំនាញ គាត់មានឯកទេសពិតប្រាកដ ខ្ញុំជឿថា អាចជួយបានច្រើនដល់សិស្សានុសិស្ស ព្រោះក្មេងៗឥឡូវភាគច្រើនពួកគាត់មិនសូវយកចិត្តទុកដាក់ច្រើនទៅលើការសិក្សានោះទេ គាត់ច្រើនយកពេលវេលាទៅលើកាន់ទូរស័ព្ទ និងការលេងហ្គេម។ អ៊ីចឹងប្រសិននៅតាមសាលាមានកម្មវិធីប្រឹក្សាផ្នែកសិក្សាអប់រំ និងចិត្តសាស្ត្រនេះ គឺមាតាបិតាសិស្សអាចពិភាក្សាយោបល់នៅពេលកូនមានបញ្ហាជាមួយអ្នកជំនាញ ដើម្បីឱ្យការសិក្សារបស់កូនៗមានលក្ខណៈល្អប្រសើរឡើងវិញ»។
បើតាមអ្នកប្រឹក្សាយោបល់នៃក្រុមហ៊ុន AHA វិបត្តិផ្លូវចិត្តអាចកើនឡើងនៅលើមនុស្សគ្រប់វ័យ ពិសេសមនុស្សចាប់ពីអាយុ១០ឆ្នាំដល់៣៤ឆ្នាំ ប្រឈមមុខខ្ពស់កើតមានបញ្ហានេះ ហើយបើគ្មានដំណោះស្រាយទាន់ពេលនោះទេ ក្មេងៗកើតមានវិបត្តិក្នុងការចូលរួមទំនាក់ទំនងទូទៅនៅក្នុងសង្គម។ តាមការស្រាវជ្រាវរកឃើញថា ជារៀងរាល់ឆ្នាំមានសិស្ស ឬយុវជនជាច្រើនបានសម្រេចចិត្តសម្លាប់ខ្លួនដោយសារការមានសំពាធខាងផ្លូវចិត្ត។ ដូចនេះត្រូវមានការចាប់ផ្តើមដោះស្រាយ ឬបង្ការកុំឱ្យមានវិបត្តិឈានដល់កើតជំងឺផ្លូវចិត្ត។
ហេតុដូច្នេះហើយទើបក្រុមហ៊ុន AHA រៀបចំកម្មវិធីនេះជាមួយសាលាវ៉េស្ទឡាញន៍ តាមរយៈការចុះអនុស្សរណៈយោគយល់គ្នា លើកម្មវិធីប្រឹក្សាយោបល់ផ្នែកសិក្សាអប់រំ និងចិត្តសាស្ត្រកាលពីថ្ងៃទី ២៦ ខែឧសភា ឆ្នាំ២០១៨ ដើម្បីដាក់បញ្ចូលកម្មវិធីនេះចូលទៅក្នុងកម្មវិធីសិក្សារបស់សាលាវ៉េស្ទឡាញន៍ ។
ថ្នាក់ដឹកនាំបានឲ្យដឹងថា ក្រុមហ៊ុនវេសឡាញ អេឌ្យូខេសិន គ្រុប បានគាំទ្រ និងលើកកម្ពស់ភាពជោគជ័យផ្នែកសិក្សាអាជីព និងការរីកចម្រើនផ្នែកសង្គមរបស់សិស្ស វ៉េស្ទឡាញន៍ និងសិស្ស Northline ទាំងអស់។ យើងផ្ដល់ការប្រឹក្សាដោយសម្ងាត់ និងដោយឥតគិតថ្លៃដើម្បីជួយដល់សិស្សដែលកំពុងសិក្សា និងបុគ្គលិកដែលធ្វើការនៅសាលាវ៉េស្ទឡាញន៍ និងសាលា Northline ក្នុងតំបន់ផ្ដោតសំខាន់ៗចំនួនបីដូចជា ការប្រឹក្សាយោបល់ផ្នែកសិក្សាអប់រំ, ប្រឹក្សាយោបល់ផ្នែកសង្គម / ផ្លូវចិត្ត និងការពិគ្រោះលើការងារអាជីព ។
កម្មវិធីនេះ គឺផ្តល់នូវរចនាសម្ព័ន្ធដើម្បីជួយបំពេញតម្រូវការណែនាំ និងប្រឹក្សាយោបល់របស់សិស្សទាំងអស់លើកទឹកចិត្តឲ្យ មានការគោរពចំពោះភាពរឹងមាំ និងសេចក្តីត្រូវការរបស់បុគ្គលម្នាក់ៗ ក៏ដូចជាជួយសិស្សឱ្យយល់ខ្លួនឯង និងកសាងទំនាក់ទំនងប្រកបដោយន័យជាមួយអ្នកដទៃ។ បន្ថែមពីលើកម្មវិធីក៏ជួយសិស្សអោយចេះធ្វើផែនការ និងសម្រេចគោលដៅអប់រំ និងស្វែងយល់ពីផ្លូវអាជីពផ្ទាល់ខ្លួន ផ្តល់សេវាពិគ្រោះយោបល់ និងសម្របសម្រួលដល់អ្នកអប់រំឪពុកម្តាយធានាបាននូវភាពងាយស្រួលក្នុងការផ្តល់ប្រឹក្សាដល់សិស្សទាំងអស់៕
ចែករំលែកព័តមាននេះ