(តពីលេខមុន)ស្នាដៃសម្តែងភាពយន្ត លោកណុប ណែម និងលោកគង់ សំអឿន គឺជាដៃគូសម្តែងភាពយន្តដ៏ល្អសក្តិសមរបស់អ្នកស្រីវីរៈ តារា ក្នុងបណ្តាខ្សែភាពយន្តទាំងឡាយដែលអ្នកស្រីចូលរួមសម្តែង ។ អំឡុងទសវត្សទី៦០និង៧០នៃសតវត្សទី២០នោះ…
(តពីលេខមុន)ស្នាដៃសម្តែងភាពយន្ត
លោកណុប ណែម និងលោកគង់ សំអឿន គឺជាដៃគូសម្តែងភាពយន្តដ៏ល្អសក្តិសមរបស់អ្នកស្រីវីរៈ តារា ក្នុងបណ្តាខ្សែភាពយន្តទាំងឡាយដែលអ្នកស្រីចូលរួមសម្តែង ។ អំឡុងទសវត្សទី៦០និង៧០នៃសតវត្សទី២០នោះ ប្រទេសកម្ពុជាមានផលិតកម្មភាពយន្តច្រើន ប៉ុន្តែអ្នកស្រីវីរៈ តារា សម្តែងឱ្យតែផលិតកម្ម «រន្ទះពេជ្រភាពយន្ត» របស់ស្វាមីអ្នកស្រីមួយប៉ុណ្ណោះ ។
អ្នកស្រីវីរៈ តារា ចូលរួមសម្តែងបានជាង១០រឿង មានដូចជារឿង «សព្វសិទ្ធិ» ផលិតឆ្នាំ១៩៦៥។ រឿង «ពុទ្ធិសែននាងកង្រី» ផលិតឆ្នាំ១៩៦៧ ។ រឿងអដ្ឋិសុវណ្ណ ចន្ទកេសរ» ផលិតឆ្នាំ១៩៦៩ ។ រឿង «សំគមបាញ់លលក» ផលិតឆ្នាំ១៩៧០ ។ រឿង «អនអើយស្រីអន» ផលិតឆ្នាំ១៩៧២ ។ រឿង «ចំណងដៃទឹកភ្នែក» ផលិតឆ្នាំ១៩៧៤ ។ រឿង «ឯណាប្រពន្ធខ្ញុំ» ផលិតឆ្នាំ១៩៧៥ ។ រឿង «ភ្នំពកូន» ផលិតឆ្នាំ១៩៧៥ ។ រឿង «សេះសមុទ្រ» ផលិតឆ្នាំ១៩៧៥ ។
ខ្សែភាពយន្តរឿង «សព្វសិទ្ធិ» «ពុទ្ធសែននាងកង្រី» និងរឿង «អនអើយស្រីអន» មានប្រជាប្រិយភាពខ្លាំងជាងគេបើប្រៀបធៀបនឹងខ្សែរឿងទាំងប៉ុន្មានដែលអ្នកស្រីវីរៈ តារា ចូលរួមសម្តែងនោះ ។
ដោយសារប្រទេសកម្ពុជាធ្លាក់ចូលរបបប្រល័យពូជសាសន៍ខ្មែរក្រហម ខ្សែភាពយន្តចំនួន៣រឿងរបស់អ្នកស្រីវីរៈ តារា គឺរឿង «ឯណាប្រពន្ធខ្ញុំ», រឿង «ភ្នំពកូន» និងរឿង «សេះសមុទ្រ» មិនបានចាក់បញ្ចាំងជូនទស្សនិកជនទស្សនាទេ ។
ពេលពួកខ្មែរក្រហមជម្លៀសចេញពីភ្នំពេញនាឆ្នាំ១៩៧៥ គូស្វាមី-ភរិយាលោកលី ប៊ុនយីម និងអ្នកស្រីវីរៈ តារា ចាកចេញទៅតែខ្លួនទទេ ដូច្នេះហើយដុំហ្វ៊ីលភាពយន្តទាំងនោះបាត់បង់អស់ ។
គូព្រេងគូព្រាត់
នាពេលមួយលោកលី ប៊ុនយីម បានទៅកំពត ហើយឃើញអ្នកស្រីវីរៈ តារា ។ សម្រស់សោភាក្នុងវ័យក្រពុំ១៨ឆ្នាំរបស់អ្នកស្រីវីរៈ តារា ទាក់ភ្នែក ទាក់ចិត្តផលិតករភាពយន្តលោកលី ប៊ុនយីម។ ដោយសេចក្តីស្នេហាចំពោះអ្នកស្រីវីរៈ តារា ជាស្នេហាដែលប្រាថ្នាជាគូអនាគតនោះ ស្របតាមប្រពៃណីលោកលី ប៊ុនយីម បានចូលស្តីដណ្តឹង ។ អ្នកទាំងពីរបានរៀបការជាមួយគ្នានៅឆ្នាំ១៩៦៤ ។
គូអាពាហ៍ពិពាហ៍នេះប្រកបរបរផលិតភាពយន្ត ដោយលោកលី ប៊ុនយីម ជាចាងហ្វាងផលិតកម្ម និងអ្នកស្រីវីរៈ តារា ក្លាយជាតួឯកស្រីឆ្នើមរបស់ផលិតកម្មនេះ ។
មិនតែប៉ុណ្ណោះកូនប្រុសឈ្មោះលី រតនៈ របស់លោកលី ប៊ុនយីម និងអ្នកស្រីវីរៈ តារា បានចូលរួមសម្តែងជាមួយម្តាយផងដែរ ក្នុងរឿង «អនអើយស្រីអន» ។
កូនសុទ្ធតែប្រុសចំនួន៥នាក់ ប៉ុន្តែពួកគេពុំបានឃើញឪពុកម្តាយ គឺលោកលី ប៊ុនយីម និងអ្នកស្រីវីរៈ តារា នៅរួមលំនៅដល់វ័យចំណាស់ និងបន្តដល់គ្រាអវសានជីវិតទេ ដោយសារតែការលែងលះបែកព្រាត់គ្នា ។
ដោយមិនអាចរួមរស់នឹងគ្នាបានតទៅទៀត ចំណងអាពាហ៍ពិពាហ៍ក៏ដាច់ដោយ អ្នកស្រីវីរៈ តារា និងលោកលី ប៊ុនយីម បានចែកផ្លូវគ្នាដើររៀងខ្លួន ។ ការបែកព្រាត់នៃគូអាពាហ៍ពិពាហ៍នេះនៅឆ្នាំ១៩៨៦ ។
ដំណើរគេចចេញពីរបបប្រល័យពូជសាសន៍
ថ្ងៃទី១៧ ខែមេសា ឆ្នាំ១៩៧៥ គ្មាននរណាអាចរស់នៅទីក្រុងភ្នំពេញបានទៀតទេ ដោយត្រូវពួកខ្មែរក្រហមជម្លៀសចេញទាំងអស់ ក្នុងនោះមានទាំងក្រុមគ្រួសាររបស់អ្នកស្រីវីរៈ តារា ផងដែរ ។ អ្នកស្រីវីរៈ តារា និងលោកលី ប៊ុនយីម ជាស្វាមីចាកចេញពីភ្នំពេញ តាមទិសដែលគេជម្លៀសទៅស្រុកកំពង់ត្រាច ខេត្តកំពត ។
(សូមតាមដានភាគបន្តលេខក្រោយទៀត)
នេះជាភាគទី១
ចែករំលែកព័តមាននេះ