ខេត្តបាត់ដំបង ៖ ធ្លាប់ជាកីឡាករប្រដាល់ក្បាច់គុនបុរាណខ្មែរដ៏ខ្លាំងក្លាមួយរូប ដែលមានប្រវត្តិកំណើតជាអ្នកខេត្តបាត់ដំបង ពេជ្រ ប៊ុនធឿន បានបាត់មុខពីសង្វៀនប្រដាល់ជិត៣ឆ្នាំហើយ បើគិតមកដល់ពេល
នេះ ។ មិនតែប៉ុណ្ណោះ បច្ចុប្បន្នអតីតអ្នកប្រដាល់ដ៏ល្បីល្បាញរូបនេះ កំពុងធ្លាក់ខ្លួនចូលក្នុងរណ្ដៅអវចីនៃអ្នកសេពថ្នាំញៀនយ៉ាងសកម្មទៀតផង ។ នេះបើតាមការរៀបរាប់ដោយគ្មានការលាក់លៀមពីសំណាក់ឪពុកម្ដាយរបស់អតីតកីឡាករដ៏ល្បីរូបនេះ ។
លោក សាត ថាន ជាឪពុកបង្កើតរបស់អ្នកប្រដាល់ ពេជ្រ ប៊ុនធឿន បានថ្លែងប្រាប់កោះសន្តិភាព កាលពីព្រឹកថ្ងៃទី០៥ មីនា ថា ៖ «កូនប្រុសខ្ញុំ (ពេជ្រប៊ុនធឿន) ពិតជាបានបោះបង់សង្វៀនប្រដាល់មែន ក្នុងរយៈពេលប្រហែល៣ឆ្នាំកន្លងទៅនេះ ហើយថែមទាំងធ្លាក់ខ្លួនជាអ្នកសេពថ្នាំញៀនទៀតផង ។ ខ្ញុំនិងគ្រួសារធ្លាប់បានយកវាទៅដាក់មណ្ឌលកែប្រែ ដើម្បីបន្សាបថ្នាំញៀនចំនួន៤លើកហើយ» ។ គាត់និយាយថា ពេលនេះ
ប៊ុនធឿន បានចេញពីមណ្ឌលកែប្រែជាលើកចុងក្រោយជាងកន្លះឆ្នាំហើយ មើលទៅកែប្រែខ្លួនល្អប្រសើរជាងមុន ។ ឪពុកដែលឈានចូលវ័យ៧០ឆ្នាំរូបនេះ បានបញ្ជាក់ថា ពិតមែនតែកូនគាត់កែប្រែខ្លួនបានខ្លះ តែគេនៅតែឆក់ឱកាសម្ដងម្កាលទៅលួចសេពថ្នាំញៀន ជាមួយមិត្តភក្ដិដដែល ។ ប៉ុន្តែពេលខ្លះ គេក៏បានទៅជួយចាប់ម៉ូយតាក់ស៊ីនៅចំណតរថយន្តផ្សារបឹងឈូក ក្នុងក្រុងបាត់ដំបងដែរ ដើម្បីបានកម្រៃចាយវាយផ្ទាល់ខ្លួន ។
ឆ្នាំនេះ អតីតអ្នកប្រដាល់ដ៏ល្បីឈ្មោះ ពេជ្រ ប៊ុនធឿន មានអាយុ៣៥ឆ្នាំហើយ ។ នេះបើតាមការបញ្ជាក់ប្រាប់ពីអ្នកស្រី ញឹក ចាន់ ដែលជាម្ដាយបង្កើត ។ អ្នកស្រីបានប្រាប់ថា ប៊ុនធឿនមានស្រុកកំណើតនៅកន្លែងរស់នៅបច្ចុប្បន្ននេះឯង គឺភូមិផ្កាស្លា សង្កាត់ចំការសំរោង ក្រុងបាត់ដំបង និងជាកូនទី៣ក្នុងចំណោមបងប្អូនប្រុស-ស្រីចំនួន៤នាក់ ។ អ្នកស្រីញឹក ចាន់ វ័យ៦៦ឆ្នាំ បានបញ្ជាក់ដែរថា៖ «ប៊ុនធឿន គឺជាកូនប្រុសតែម្នាក់គត់របស់ខ្ញុំ ក្នុងចំណោមកូន៤នាក់ដែលខ្ញុំស្រឡាញ់បំផុត តែអកុសលកូនប្រុស ជាទីស្រឡាញ់រូបនេះ បែរជាធ្លាក់ខ្លួនចូលក្នុងពិភពនៃអ្នកសេពថ្នាំញៀនទៅវិញ» ។
អ្នកស្រីញឹក ចាន់ ហាក់អួលដើម.កពេលនិយាយអំពីប្រវត្តិកូនប្រុស ដែលកំពុងធ្លាក់ក្នុងរណ្ដៅអវចីនៃគ្រឿងញៀននេះ ខណៈកិត្តិយសកូនប្រុសគាត់ធ្លាប់តែល្បីល្បាញក្នុងវិស័យកីឡាប្រដាល់ ។ គាត់បានរៀបរាប់ថា៖ «ខ្ញុំមានការសោកស្ដាយ និងរន្ធត់ខ្លាំងណាស់ នៅពេលកូនធ្លាក់ក្នុងស្ថានភាពបែបនេះ» ។ ប៊ុនធឿន ធ្លាប់រៀបការប្រពន្ធក្នុងឆ្នាំ២០០៣ នៅរាជធានីភ្នំពេញ ដែលកាលនោះប៊ុនធឿន កំពុងល្បីល្បាញខ្លាំងបំផុតក្នុងវិស័យកីឡាប្រដាល់ តែជីវិតអាពាហ៍ពិពាហ៍របស់គេ មានអាយុត្រឹមតែជាង១ខែប៉ុណ្ណោះ ក៏ដើរដល់ផ្លូវបំបែក ដោយសារតែការរស់នៅមិនចុះសម្រុងគ្នា ។
បើតាមប្រវត្តិដែលរៀបរាប់ដោយក្រុមគ្រួសារ អ្នកប្រដាល់ ពេជ្រ ប៊ុនធឿន ជាគ្រាប់ពូជដែលបណ្ដុះចេញ
ពីក្នុងក្លិបកីឡាប្រដាល់ «ពន្លឺសាមគ្គី» ដែលមានគ្រូបង្វឹក គឺលោក សៅ ថិន នៅសង្កាត់អូរចា ក្រុងបាត់ដំបង ។ ប៊ុនធឿន បានចាប់ផ្ដើមអាជីពជាអ្នកប្រដាល់ក្បាច់គុនបុរាណខ្មែរ ទាំងឪពុកម្ដាយ និងបងប្អូនមិនបានដឹង ។ កីឡាករវ័យក្មេងរូបនេះ បានឡើងបង្ហាញមុខជាលើកដំបូងនៅលើសង្វៀនប្រដាល់ចន្លោះឆ្នាំ១៩៩៧-១៩៩៨ ។ នេះជាការបញ្ជាក់ប្រាប់របស់លោកសាត ថាន ដែលជាឪពុកបង្កើត ។
អ្នកខេត្តបាត់ដំបង ដែលនិយមវិស័យកីឡាប្រដាល់ បានចាប់ផ្ដើមស្គាល់មុខ និងក្បាច់ប្រដាល់ដ៏ខ្លាំងក្លារបស់អ្នកប្រដាល់រូបនេះ តាមរយៈការប្រើជង្គង់និងកែងផ្ដូលគូប្រកួតមិនឲ្យលើសពីទឹកទី២ឬទី៣ឡើយ ។ ហើយរឹតតែល្បីខ្លាំងទ្វេដងទៀត នៅពេលដែលកីឡាករូបនេះផ្ដួលគូប្រកួតឲ្យសន្លប់ដល់ទៅ២នាក់ ក្នុងរយៈពេលតែប៉ុន្មាននាទីប៉ុណ្ណោះ ពេលឡើងសង្វៀនប្រដាល់ម្ដង ដែលមិនធ្លាប់មានសោះ ក្នុងប្រវត្តិសាស្ត្រអ្នកកីឡាប្រដាល់ ។ ជាមួយនឹងការបង្ហាញនូវកាយវិការផង លោកសាត ថាន បានរំលឹកអំពីប្រវត្តិខ្លះៗរបស់ខ្លួនលោកផ្ទាល់ថា៖ «តាមពិត ខ្លួនខ្ញុំក៏ជាអតីតអ្នកប្រដាល់ដ៏ខ្លាំងម្នាក់ដែរ កាលពីសម័យមុនតែខ្ញុំមិនចង់ឲ្យកូនហាត់ប្រដាល់ទេ ព្រោះខ្លាចមិនបានដូចខ្ញុំ នាំឲ្យគេវាយធ្វើបាប»។ គាត់និយាយថា ដំបូងគាត់មិនដឹងថា កូនប្រុសគាត់ហាត់ដាល់ទេ តែនៅអំឡុងឆ្នាំ១៩៩៧ និង១៩៩៨ ស្រាប់តែគេល្បីថា ឃើញកូនគាត់ឡើងដាល់ ហើយផ្ដួលគូប្រកួតជាញឹកញាប់ ។ លុះពេលកូនគាត់ឡើងដាល់លើកក្រោយ គាត់ក៏ទៅមើលឃើញកូនគាត់ ពិតជាវាយបានល្អ ហើយខ្លាំងទៀត ។ ឃើញដូច្នេះ គាត់ក៏ចាប់ផ្ដើមលើកទឹកចិត្ត និងជួយបង្ហាត់បង្រៀនក្បាច់ពិសេសៗបន្ថែមទៀតដល់កូនចាប់តាំងពីពេលនោះមក។
អតីតកីឡាករប្រដាល់វ័យ៧០ឆ្នាំរូបនេះ បានបញ្ជាក់ថា៖ «កូនខ្ញុំបានឡើងសង្វៀនប្រដាល់តាំងពីអាយុក្រោម២០ឆ្នាំបន្តិច ហើយអ្វីដែលខ្ញុំស្ងើចសរសើរកូនខ្ញុំបំផុត គឺនៅពេលអ្នករៀបចំកម្មវិធីប្រដាល់ឲ្យគេឡើងវាយម្ដងដល់ទៅ២លើក ។ ពេលនោះប៊ុនធឿន បានផ្ដួលគូទី១ ឲ្យសន្លប់នៅទឹកទី១ ហើយភ្លាមនោះអាជ្ញាកណ្ដាលក៏បានផ្គូផ្គងឲ្យប៊ុនធឿន វាយជាមួយកីឡាករមួយរូបទៀតភ្លាមៗដែរ»។ លោក សាត ថាន បានបញ្ជាក់ត្រង់ចំណុចនេះដូច្នេះថា៖ «នៅពេលត្រូវអាជ្ញាកណ្ដាលរៀបចំឲ្យវាយគូបន្ទាប់ វាមិនបានប្រកែកទេ ហើយវាក៏បានផ្ដូលគូទី២នេះឲ្យសន្លប់បន្តទៀតនៅទឹកទី២.. ខ្ញុំពិតជាមានមោទនភាពណាស់នៅពេលឃើញកូនខ្ញុំវាយទៅលើគូប្រកួតសាហាវបែបនេះ ដែលខ្ញុំមិនធ្លាប់ជួបសោះ នៅក្នុងប្រវត្តិសាស្ត្រ នៃអ្នកប្រដាល់»។
លោក សាត ថាន ក៏ដូចអ្នកនិយមចូលចិត្តវិស័យកីឡាប្រដាល់ក្បាច់គុនបុរាណខ្មែរដទៃទៀតដែរ សុទ្ធតែបានអះអាង និងទទួលស្គាល់ថា ពេជ្រ ប៊ុនធឿន ពិតជាកីឡាករប្រដាល់ដ៏ខ្លាំងពូកែមែន ។ អ្នកគាំទ្របានលើកសរសើរពីក្បាច់ពិសេសរបស់ ពេជ្រ ប៊ុនធឿនថា ក្បាច់ពិសេសសម្រាប់ផ្ដួលគូប្រកួតរបស់ ពេជ្រ ប៊ុនធឿន គឺ«ជង្គង់និងកែង »។ លោក សាត ថានបានបញ្ជាក់ថា៖«ខ្ញុំទទួលស្គាល់ថា កូនប្រុសខ្ញុំពូកែជង្គង់ និងកែងនេះខ្លាំងណាស់ ព្រោះខ្ញុំមានបទពិសោធន៍អំពីក្បាច់នេះ គូប្រកួតអាចគ្រោះថ្នាក់បំផុតនៅពេលចូលវាយកៀក»។លោកបញ្ជាក់ដែរថា ប៊ុនធឿន ធ្លាប់ទទួលពានរង្វាន់លើកដំបូងទូទាំងប្រទេសនៅឆ្នាំ១៩៩៩ ក្រោយមកវាយដណ្ដើមបានខ្សែក្រវាត់M150 នៅស្ថានីយទូរទស្សន៍ និងទទួលបានពានរង្វាន់ជាច្រើនសន្ធឹកសន្ធាប់ជាបន្តបន្ទាប់ទៀត។
ត្រឡប់មកនិយាយអំពីបច្ចុប្បន្នភាព នៃអតីតអ្នកប្រដាល់ដ៏ល្បីល្បាញ ពេជ្រ ប៊ុនធឿនរូបនេះវិញ បើតាមអ្នកស្រីញឹក ចាន់ ដែលជាម្ដាយកីឡាកររូបនេះ បានរៀបរាប់ថា ស្របពេលដែល ប៊ុនធឿន កំពុងតែស្ថិតក្នុងភាពល្បីល្បាញ ស្រាប់តែគេត្រូវបោះបង់សង្វៀនទៅវិញ ដោយសារការសេពគប់ជាមួយមិត្តភក្ដិដែលប្រព្រឹត្តគ្រឿងញៀន ។ អ្នកស្រីបានប្រាប់ថា កូនប្រុសរូបនេះបានចាប់ផ្ដើមរយាលពីសង្វៀនប្រដាល់ក្នុងអំឡុងឆ្នាំ២០១៥ តែនៅមានគេហៅទៅប្រកួតម្ដងម្កាលដែរ លុះក្រោយមកក៏បោះបង់តែម្ដង ។អ្នកស្រីញឹក ចាន់ បានបញ្ជាក់ថា សព្វថ្ងៃគាត់ទទួលស្គាល់ថា ប៊ុនធឿន ពិតជាប្រព្រឹត្តថ្នាំញៀនមែន ។ គេតែងបង្កហិង្សានៅក្នុងផ្ទះពេលគ្មានថ្នាំញៀន តែគេមិនដែលបង្កបញ្ហាជាមួយមនុស្សក្រៅផ្ទះទេ ។ អ្នកស្រីបានបន្តថា គាត់ធ្លាប់បានបញ្ជូនកូនប្រុសរូបនេះទៅមណ្ឌលកែប្រែចំនួន៤លើកហើយ តែពេលត្រឡប់មកវិញលើកចុងក្រោយនេះ ប៊ុនធឿន ហាក់មានការកែប្រែប្រសើរជាងមុន ។ អ្នកស្រីនិយាយថា ពេលខ្លះគេបានទៅស៊ីឈ្នួលចាប់ម៉ូយតាក់ស៊ីនៅចំណតរថយន្តផ្សារបឹងឈូក ក្នុងក្រុងបាត់ដំបង ដើម្បីរកកម្រៃចាយផ្ទាល់ខ្លួន ។ប៉ុន្តែមានពេលខ្លះក៏ត្រូវបានអ្នករៀបចំកម្មវិធីប្រដាល់ហៅប៊ុនធឿន ឲ្យទៅជួយធ្វើ«អាប៊ីត ជាអ្នកផ្សព្វផ្សាយ ឬជាអ្នកជួយរៀបចំកម្មវិធីប្រដាល់»ផងដែរ។
ជុំវិញការបរិយាយអំពីប្រវត្តិខ្លះៗរបស់លោក ពេជ្រ ប៊ុនធឿន អតីតអ្នកប្រដាល់ក្បាច់គុនបុរាណខ្មែរដ៏ល្បីរូបនេះ កោះសន្តិភាព បានព្យាយាមជាច្រើនថ្ងៃដើម្បីស្វែងរកធ្វើបទសម្ភាសន៍ដោយផ្ទាល់ តែមិនទទួលបានលទ្ធផលឡើយ ដោយសារតែអ្នកប្រដាល់រូបនេះមិនស្ថិតនៅគោលដៅណាមួយច្បាស់លាស់ សូម្បីតែក្រុម
គ្រួសារក៏ពិបាកនឹងស្វែងរកដែរ ។ ស្ថិតក្នុងស្ថានភាពបែបនេះ លោក សាត ថាន និងភរិយាគឺអ្នកស្រីញឹក ចាន់ បានបង្ហើបឲ្យដឹងថា ពិតមែនតែកូនគាត់ហាក់មានការកែប្រែល្អជាងមុន តែគេនៅតែអាចឆ្មក់ទៅសេពថ្នាំញៀនម្ដងម្កាលជាមួយមិត្តភក្ដិដដែល ។ ប៉ុន្តែមួយរយៈនេះកូនប្រុសគាត់បានទទូចសុំឲ្យគាត់បង្កើតក្លិបតូចមួយ ដើម្បីបង្ហាត់បង្រៀនសិស្ស តែគាត់គ្មានលទ្ធភាព។ ដូច្នេះតាមរយៈកោះសន្តិភាព លោក សាត ថាន និងភរិយា បានអំពាវនាវសុំឲ្យក្រសួងពាក់ព័ន្ធក្ដី សហព័ន្ធកីឡាកម្ពុជាក្ដី ឬតាមបណ្ដាក្លិបកីឡានានាក្ដី សូមមេត្តាជួយជ្រោមជ្រែង ឬធ្វើបែបណាដើម្បីជួយឲ្យកូនប្រុសគាត់បោះបង់ថ្នាំញៀននេះផង ។ គ្រួសារគាត់ជឿថា កូនប្រុសរូបនេះមិនមានសមត្ថភាពឡើងសង្វៀនប្រកួតបានទៀតទេ តែគាត់មានជំនឿយ៉ាងមុតមាំថា កូនប្រុសគាត់(ពេជ្រ ប៊ុនធឿន) អាចមានសមត្ថភាពគ្រប់គ្រាន់ក្នុងការបង្ហាត់បង្រៀនសិស្ស៕
ចែករំលែកព័តមាននេះ