រាជធានីភ្នំពេញ ៖ វិស័យឯកជនបានស្នើឲ្យរាជរដ្ឋាភិបាលដោះស្រាយបញ្ហាប្រឈមនានា និងទប់ស្កាត់ការនាំចូលផលិតផលពីប្រទេសជិតខាង ដើម្បីលើកស្ទួយជីវភាពកសិករ និងការប្រឈមរ៉ាំរ៉ៃក្នុងវិស័យកសិកម្ម ។
លោកឧកញ៉ា ភួ ពុយ ប្រធានសមាគមសម្ព័ន្ធរោងម៉ាស៊ីនកិនស្រូវកម្ពុជា និងជាអគ្គនាយកធនាគារស្រូវ បានថ្លែងតាមទូរស័ព្ទ បន្ទាប់ពីចូលរួមក្នុងកិច្ចប្រជុំអន្តរក្រសួង ដោះស្រាយបញ្ហាប្រឈមក្នុងវិស័យកសិកម្ម នាព្រឹកថ្ងៃទី៤ កក្កដា ថា ប្រសិនជាចង់ដោះស្រាយបញ្ហាប្រឈមក្នុងវិស័យកសិកម្មរ៉ាំរ៉ៃជាច្រើនឆ្នាំមកនេះ រាជរដ្ឋាភិបាលត្រូវផ្តល់អំណាចដល់ក្រុមការងាររដ្ឋ និងវិស័យឯកជន ទើបអាចដោះស្រាយបញ្ហាបាន ប៉ុន្តែការផ្តល់អំណាចនេះ មិនមែនជាការធ្វើបាបប្រជាពលរដ្ឋទេ ប៉ុន្តែជាការជួយដល់ប្រជាពលរដ្ឋ ។
លោកឧកញ៉ាបន្តថា ៖ « បញ្ហាប្រឈមរបស់យើង គឺសុំឲ្យរាជរដ្ឋាភិបាលជួយសម្រួលថ្លៃអគ្គិសនី ថ្លៃដឹកជញ្ជូន និងការលុបបំបាត់កុងត្រូលជជុះតាមដងផ្លូវ ដើម្បីជួយអ្នកផលិតក្នុងស្រុកឲ្យកាត់បន្ថយថ្លៃដើមក្នុងការផលិត ។ យើងត្រូវបង្កើតទីផ្សារសម្រាប់ប្រជាកសិករ និងមិនគួរអនុញ្ញាតឲ្យនាំចូលផលិតផលដែលយើងដាំដុះបាននោះទេ » ។ លោកបន្តថា ៖ « ទោះជាទីផ្សារអាស៊ានបើកចំហក្តី ក៏ប៉ុន្តែយើងក៏គួរមានរបាំង យើងគួរមានកំហិតអ្វីគួរនាំចូល និងអ្វីមិនគួរនាំចូល ដើម្បីជួយផលិតផលក្នុងស្រុក មិនមែនជំរុញឲ្យកសិករដាំដុះហើយខាតបង់ នាំតែឲ្យពួកគាត់រងទុក្ខទេ»។
លោកបន្ថែមថា រីឯបញ្ហាដំឡូងមី និងពោតនៅតាមបណ្តាខេត្តជាប់ព្រំដែន គួរចរចាជាមួយភាគីថៃដើម្បីសម្រួលតម្លៃ និងចរចាយកប្រទេសថៃ ដឹកជញ្ជូនឆ្លងកាត់ទៅកាន់ប្រទេសទី៣ ដើម្បីសម្រួលបញ្ហាប្រឈមទាំងនេះ ។ បើមិនដូច្នេះទេ យើងមិនអាចដោះស្រាយបញ្ហាដដែលៗទេ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានទទួលស្គាល់បញ្ហាប្រឈមនានាក្នុងវិស័យនេះ ដោយលោកលើកឡើងថា ឧបសគ្គសំខាន់ៗដែលរាំងស្ទះដល់ការអភិវឌ្ឍវិស័យកសិកម្ម រួមមាន ផលិតភាពទាប, ការប្រកួតប្រជែងទីផ្សារមានកម្រិតទាប, ថ្លៃដើមផលិតកម្មខ្ពស់, សុវត្ថិភាពចំណីអាហារនៅតែជាបញ្ហាសំខាន់,ការផលិតតាមគោលការណ៍កសិកម្មល្អនៅមានកម្រិត, បញ្ហាការផ្តុំកម្លាំងសម្រាប់ផ្គត់ផ្គង់ក្នុងទ្រង់ទ្រាយធំ នៅមិនទាន់សមស្រប, យន្តការផលិតកម្មតាមកិច្ចសន្យានៅខ្សោយ, ការភ្ជាប់ទីផ្សាររវាងតួអង្គអ្នកផលិតកសិករជាមួយអ្នកប្រមូលទិញ, ការកែច្នៃនាំចេញនៅមិនទាន់ឆ្លើយតបបានក្នុងសង្វាក់តម្លៃ, ការវិនិយោគឯកជនមានកម្រិតតិចតួច និងការអនុវត្តតាមគោលការណ៍មិនទាន់ដំណើរការធំដុំនៅឡើយ ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងថា បញ្ហាប្រឈមត្រូវដោះស្រាយ គឺជាគោលដៅទីផ្សារ ដែលវិស័យឯកជនជាក្បាលម៉ាស៊ីននាំមុខ មិនមែនរាជរដ្ឋាភិបាលទេ ។ លោកលើកជាសំណួរថា ហេតុអ្វីវិនិយោគិនបរទេសមិនមកវិនិយោគលើការកែច្នៃនាំចេញ គឺមកពីតម្លៃអគ្គិសនី និងការដឹកជញ្ជូននៅកម្ពុជាថ្លៃ ។ យោងតាមការសិក្សារបស់ធនាគារអភិវឌ្ឍន៍អាស៊ីបង្ហាញថា ការដឹកជញ្ជូនទំនិញ១តោន ក្នុងចម្ងាយ១០០គីឡូម៉ែត្រនៅកម្ពុជា ត្រូវចំណាយ១៥ដុល្លារ ខណៈឡាវ១០ដុល្លារ វៀតណាម៨ដុល្លារ និងថៃត្រឹម៥ដុល្លារប៉ុណ្ណោះ ។
លោកបន្តថា ៖ « អ្វីដែលយើងចង់បាន គឺធ្វើយ៉ាងណា ឲ្យកសិករផលិត និងអាចវេចខ្ចប់ដឹកជញ្ជូនមកកាន់ទីផ្សារបានដោយខ្លួនឯង ដោយឲ្យប្រព័ន្ធស្រោចស្រពចំណាយប្រាក់តិច មានទឹកហូរបញ្ចូលស្រែដូចនៅប្រទេសវៀតណាម មិនមែនមានតែទឹកក្នុងប្រឡាយ ត្រូវបូមបន្តទេ ព្រោះវាធ្វើឲ្យការចំណាយកើនឡើង »។ លោកបន្តថា ៖ « ក្រសួងសេដ្ឋកិច្ចថា បានឲ្យក្រសួងធនធានទឹកធ្វើហើយ តែមិនស៊ីជម្រៅទេ និងថា បានផ្តល់ថវិកាដល់ក្រសួងច្រើនហើយ ប៉ុន្តែការពិត ក្រសួងទទួលថវិកាតែ១%ប៉ុណ្ណោះនៃការចំណាយសរុបរបស់ជាតិ » ។
លោកបន្ថែមថា កិច្ចប្រជុំនេះ ជាការប្រមូលមតិយោបល់ផ្សេងៗដើម្បីរៀបចំជាគោលនយោបាយ និងផែនការយុទ្ធសាស្ត្រសម្រាប់អភិវឌ្ឍន៍វិស័យកសិកម្ម ឆ្នាំ២០១៨-២០៣០ ខាងមុខ ៕
ចែករំលែកព័តមាននេះ