រាជធានីភ្នំពេញ ៖ មូលនិធិជាង៦១លានដុល្លារអាមេរិកសម្រាប់ជួយលើកកម្ពស់ផលិតភាពបន្លែនៅកម្ពុជា ដើម្បីកាត់បន្ថយការនាំចូលបន្លែពីបរទេសបាននិងកំពុងចាប់ផ្តើមដំណើរការហើយ ដោយគ្របដណ្តប់ប្រជាកសិករចំនួន១២ម៉ឺនគ្រួសារ ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានថ្លែងតាមទូរស័ព្ទកាលពីចុងសប្តាហ៍មុនថា គម្រោងផ្តល់ឥណទាន និងជំនួយឥតសំណងពីមូលនិធិអន្តរជាតិ ដើម្បីអភិវឌ្ឍន៍វិស័យកសិកម្មនេះ (IFAD) ទីភ្នាក់ងារសហរដ្ឋអាមេរិកដើម្បីកិច្ចអភិវឌ្ឍន៍អន្តរជាតិ (USAID) និងជំនួយពីធនាគារអភិវឌ្ឍន៍អាស៊ី (ADB) បាននិងកំពុងចាប់ផ្តើមអនុវត្តហើយនៅតាមបណ្តាខេត្តជុំវិញបឹងទន្លេសាប និងខេត្តមួយចំនួនទៀតដូចជា កំពង់ចាម ត្បូងឃ្មុំ កំពត និងតាកែវជាដើម ។
លោកបន្តថា ៖ « គម្រោងនេះនឹងជួយកសិករឲ្យគាត់អាចប្រើប្រាស់ប្រព័ន្ធស្រោចស្រពបែបទំនើប និងធ្វើជាមួយកសិករដែលមានឆន្ទៈក្នុងការផលិត ដើម្បីបង្កើនប្រាក់ចំណូលរបស់ពួកគាត់ » ។ លោកបន្តថា ៖ « គម្រោងនេះនឹងផ្តល់ការបណ្តុះបណ្តាលដល់កសិករ និងផ្សារភ្ជាប់ទីផ្សាររបស់គាត់ជាមួយអ្នកលក់ដើម្បីឲ្យប្រាកដថា ផលិតផលគាត់ផលិតមានទីផ្សារ » ។
តាមការសិក្សាស្រាវជ្រាវមួយរកឃើញថា ប្រជាពលរដ្ឋកម្ពុជា៩០% ព្រួយបារម្ភពីសុវត្ថិភាពបន្លែដែលបាននិងកំពុងចរាចរណ៍នៅលើទីផ្សារ ដោយសារបន្លែនាំចូលពោរពេញដោយជាតិគីមីប៉ះពាល់ដល់សុខភាព ។
ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ ថ្លែងថា ការអភិវឌ្ឍវិស័យនេះទាមទារឲ្យមានការគិតស៊ីជម្រៅ និងមានភាពជាក់ស្តែងដើម្បីចេញជាលទ្ធផលបាន ប៉ុន្តែការងារនេះមិនមែនរបស់ក្រសួងកសិកម្មតែម្នាក់ឯងឡើយ វាជាការងាររបស់ក្រសួងពាក់ព័ន្ធដែលត្រូវរួមគ្នាដោះស្រាយ ខណៈកម្ពុជាមានបញ្ហាដឹកជញ្ជូន កង្វះបច្ចេកទេស និងបច្ចេកវិទ្យា បានធ្វើឲ្យប្រជាពលរដ្ឋកម្ពុជាធ្វើចំណាកស្រុកទៅប្រទេសជិតខាង និងចូលមកកាន់ទីក្រុងកាន់តែច្រើន ។
លោកបន្តថា ៖ « យើងមិនអាចអភិវឌ្ឍឲ្យទាន់ប្រទេសថៃ និងវៀតណាមទេ តែយើងត្រូវមានផែនការជាក់លាក់ថា ត្រូវធ្វើអ្វីដើម្បីធ្វើឲ្យឃើញថា ៣ឬ៥ឆ្នាំក្រោយយើងទទួលបានលទ្ធផលអ្វីពិតប្រាកដ » ៕
ចែករំលែកព័តមាននេះ