រាជធានីភ្នំពេញ – ក្រុមហ៊ុនផ្គត់ផ្គង់សេវាអ៊ីនធឺណិតលំដាប់ខ្ពស់នៅកម្ពុជា EZECOM បានឈ្នះពានរង្វាន់អ្នកផ្គត់ផ្គង់សេវាអ៊ីនធឺណិតដ៏ល្អបំផុតសម្រាប់ពាណិជ្ជកម្ម (Best Internet Service Provider for Business) ក្នុងប្រទេសកម្ពុជា នៅក្នុងវេទិកា 4G LTE ដែលត្រូវបានប្រារព្ធឡើងដោយក្រសួងប្រៃសណីយ៍និងទូរគមនាគមន៍ និងរៀបចំឡើងដោយ International Data Group (IDG) នៅសណ្ឋាគារសុខាភ្នំពេញ កាលពីថ្ងៃទី៣០ ខែមិថុនា ឆ្នាំ២០១៧ កន្លងទៅនេះ។
ពានរង្វាន់នេះ ជាពានរង្វាន់ទីមួយក្នុងប្រទេសកម្ពុជា និងត្រូវបានជ្រើសតាំងដោយការសិក្សាស្រាវជ្រាវពី IDG និងរបាយការណ៍ក្នុងវេទិកា 4G LTE។
ឧកញ៉ា ផូល ប្លែនហរហ្គែន នាយកប្រតិបត្តិរបស់ក្រុមហ៊ុន EZECOM បានមានប្រសាសន៍ថា៖ «ក្នុងនាមជាជ័យលាភីពានរង្វាន់អ្នកផ្គត់ផ្គង់សេវាអ៊ីនធឺណិតដ៏ល្អបំផុតសម្រាប់អាជីវកម្មឆ្នាំ២០១៧ យើងមានមោទនភាពយ៉ាងខ្លាំងចំពោះសមិទ្ធផលមួយនេះ ព្រោះវាសបញ្ជាក់ឲ្យឃើញពីការខិតខំប្រឹងប្រែង និងការយកចិត្តទុកដាក់របស់យើងក្នុងការផ្តល់សេវាកម្មប្រកបដោយគុណភាពល្អបំផុត ព្រមទាំងការចូលរួមលើកកម្ពស់ជីវភាពរស់នៅរបស់ប្រជាពលរដ្ឋកម្ពុជា»។ «ការខិតខំប្រឹងប្រែងនេះ បានជួយបង្កើនសេវាកម្មផ្នែកសហគ្រាសរបស់ EZECOM និងជាផ្នែកមួយដ៏សំខាន់នៃកំណើនប្រាក់ចំណូលផងដែរ»។
ឥឡូវនេះយើងមានបណ្តាញខ្សែកាប្លិ៍អុបទិកប្រវែង ១២៤០០គីឡូម៉ែត្រដែលគ្របដណ្ដប់ ៩៩% ទូទាំងប្រទេស។ EZECOM ផ្តល់ជូននូវមជ្ឈមណ្ឌលទិន្នន័យលំដាប់ពិភពលោក និងសេវាកម្មផ្សេងៗទៀតសម្រាប់បំពេញតម្រូវការសហគ្រាស។ លើសពីនេះទៀត EZECOM ផ្តល់ជូននូវសេវាអ៊ីនធឺណិតស្តង់ដារអន្តរជាតិ ដែលគួរឲ្យជឿទុកចិត្តសម្រាប់អាជីវកម្មនិ ងសហគមន៍នៅក្នុងប្រទេសកម្ពុជា។
ឧកញ៉ា ផូល ប្លែនហរហ្គែន បានបន្ថែមថា៖ «ដោយសេវាកម្មរបស់យើងមានការរីកចម្រើន យើងមានបំណងក្នុងការនាំយកសេវាកម្មរបស់យើងទៅតំបន់ជនបទ ប៉ុន្តែគម្រោងនេះទាមទារឲ្យមានកំលាំងពលកម្ម និងធនធានបន្ថែមទៀត។ លើសពីនេះ យើងបានជួបប្រទះនូវតម្លៃប្រកួតប្រជែង ដោយសារតែកំណើនទីផ្សារនិងចំនួនដៃគូប្រកួតប្រជែង» ។
EZECOM បានសម្រេចសមិទ្ធផលគួរឲ្យកត់សម្គាល់សម្រាប់ឆ្នាំ២០១៧ គឺការដាក់ឲ្យប្រើប្រាស់ប្រព័ន្ធខ្សែកាប្លិ័ក្រោមបាតសមុទ្រ ម៉ាឡេស៊ី-កម្ពុជា-ថៃ (MCT) ដែលជាសមិទ្ធផលលើកដំបូងក្នុងប្រវត្តិសាស្ត្រកម្ពុជា។ ប្រព័ន្ធខ្សែកាប្លិ័ក្រោមបាតសមុទ្រ MCT មានវិសាលភាពប្រមាណ ១៣០០ គីឡូម៉ែត្រ អនុញ្ញាតឲ្យកម្ពុជាទទួលផលចំណេញពីការកើនឡើងនៃទិន្នន័យ តភ្ជាប់កម្ពុជាទៅកាន់ពិភពលោកតាមរយៈប្រទេសម៉ាឡេស៊ីនិងថៃ រួមទាំងបង្កើនសមត្ថភាពទំនាក់ទំនងនិងធ្វើឲ្យតម្លៃសេវាកម្មក្នុងប្រទេសឲ្យកាន់តែប្រសើរឡើង។
ចែករំលែកព័តមាននេះ