តម្លៃជ័រកៅស៊ូបន្តស្ទុះងើបឡើងវិញប្រកបដោយលំនឹង
រាជធានីភ្នំពេញ ៖ ទីបំផុត តម្លៃជ័រកៅស៊ូបានស្ទុះឡើងវិញចាប់តាំងពីពាក់កណ្តាលឆ្នាំនេះប្រកបដោយលំនឹង ខណៈតម្រូវការជ័រកៅស៊ូនៅទីផ្សារអន្តរជាតិបានងើបឡើងវិញដំណាលគ្នា ។
រាជធានីភ្នំពេញ ៖ ទីបំផុត តម្លៃជ័រកៅស៊ូបានស្ទុះឡើងវិញចាប់តាំងពីពាក់កណ្តាលឆ្នាំនេះប្រកបដោយលំនឹង ខណៈតម្រូវការជ័រកៅស៊ូនៅទីផ្សារអន្តរជាតិបានងើបឡើងវិញដំណាលគ្នា ។
លោក ធី សំបូរ ប្រធានសមាគមកៅស៊ូគ្រួសារត្បូងឃ្មុំ ស្ថិតក្នុងស្រុកត្បូងឃ្មុំ ខេត្តត្បូងឃ្មុំ បានឲ្យដឹងតាមទូរស័ព្ទនាព្រឹកថ្ងៃទី១៩ ធ្នូ កន្លងមកថា តម្លៃជ័រកៅស៊ូបានស្ទុះងើបឡើងវិញហើយ ដោយជ័រប្រភេទដេអាសេបានឡើងថ្លៃចន្លោះពី៥.៧០០ទៅ៦.០០០រៀលក្នុង១គីឡូក្រាម បន្ទាប់ពីបានធ្លាក់ចុះដល់កម្រិតទាបបំផុត គឺតម្លៃត្រឹម៣.០០០រៀលកាលពីប៉ុន្មានឆ្នាំមុន ។ ការឡើងថ្លៃជ័រកៅស៊ូ បានធ្វើឲ្យអ្នកដាំកៅស៊ូមានទំនុកចិត្តឡើងវិញច្រើន ដោយសារតម្លៃជ័រធៀបនឹងការចំណាយលើកម្លាំងពលកម្មអាចរកផលចំណេញបាន ។ លោកនិយាយថា ៖ « នៅពេលតម្លៃជ័រកៅស៊ូឡើងថ្លៃ តម្លៃដីដាំកៅស៊ូបានកើនឡើងជាស្វ័យប្រវត្តិផងដែរ។ ជាក់ស្តែង ដីសម្រាប់ដាំកៅស៊ូមានតម្លៃ
ប្រមាណ១ម៉ឺនដុល្លារ, ដីដាំកៅស៊ូមិនទាន់ចៀរជ័រមានតម្លៃ១២.០០០ដុល្លារ និងដីកៅស៊ូអាចចៀរជ័របាន មានតម្លៃ១៥.០០០ដុល្លារក្នុង១ហិកតា » ។
លោកបន្តថា អ្វីដែលលោកកត់សម្គាល់បច្ចុប្បន្ន គឺមានចលនាទិញជ័រកៅស៊ូពីឈ្មួញកណ្តាលច្រើន ដែលធ្វើឲ្យតម្លៃកៅស៊ូឡើងថ្លៃ ព្រោះមានការប្រកួតប្រជែងគ្នា ។ ផ្ទុយទៅវិញ ប្រសិនជាមានឈ្មួញទិញតិច តម្លៃកៅស៊ូនឹងធ្លាក់ថ្លៃមិនខាន ដោយសារឈ្មួញក្រឡុកតម្លៃ ។
លោក ជា សាយិន ប្រធានសហគមន៍កសិកម្មកៅស៊ូគ្រួសារស្រុកមេមត់ ឱ្យដឹងថា តម្លៃកៅស៊ូបានស្ទុះងើបគួរសម ដោយជ័របង្កកចានបានកើនពី១.៣០០រៀលកាលពី៣ឆ្នាំមុន ដល់២.៩០០ទៅ៣.០០០រៀលនៅពេលនេះ។ ចំណែកជ័រប្រភេទដេអាសេមានតម្លៃ៦.០០០រៀលក្នុង១គីឡូក្រាម ដែលធ្វើឲ្យប្រជាកសិករដាំកៅស៊ូចាប់ផ្តើមរីកមុខមាត់ឡើងវិញ ។ គេរំពឹងថា តម្លៃកៅស៊ូនឹងស្ទុះងើបឡើងវិញប្រកបដោយនិរន្តរភាព ប្រសិនជាទីផ្សារអន្តរជាតិនៅតែត្រូវការច្រើន ។ លោកនិយាយថា ៖ « ពីមុនកសិករចង់កាប់ដើមកៅស៊ូចោលដើម្បីដាំម្រេច ប៉ុន្តែពេលនេះ ពួកគេបានងាកមកថែទាំកៅស៊ូវិញហើយ ហើយតម្លៃដីដាំកៅស៊ូ ក៏បានឡើងថ្លៃផងដែរ » ។
លោកបន្តថា ដោយសារតម្លៃជ័រកៅស៊ូកើនឡើង ក៏បានរួមចំណែកធ្វើឲ្យសិប្បកម្មផលិតជ័រសន្លឹកអាចដំណើរការឡើងវិញ ។ សិប្បកម្មទាំងនោះបានទិញកៅស៊ូប្រភេទដេអាសេតម្លៃ៦.០០០រៀលក្នុង១គីឡូក្រាម ដើម្បីផលិតជ័រសន្លឹកនាំចេញទៅបរទេស ។
ជ័រកៅស៊ូដេអាសេ ជាប្រភេទជ័រមានគុណភាពល្អ ធៀបនឹងជ័របង្កកចាន និងមានកំហាប់ជាង ។ ជ័របង្កកចាន២គីឡូក្រាម ទើបផលិតបានជ័រដេអាសេ១គីឡូក្រាម ។
លោកឧកញ៉ា ម៉ុង ឫទ្ធី អគ្គនាយកក្រុមហ៊ុនម៉ុង ឫទ្ធីគ្រុប ដែលមានផ្ទៃដីដាំកៅស៊ូ២.៥០០ហិកតានៅខេត្តព្រះសីហនុ ថ្លែងថា ជ័រកៅស៊ូជាមធ្យមបច្ចុប្បន្នមានតម្លៃ២.០០០ដុល្លារក្នុង១តោន ជាតម្លៃមួយអាចទទួលយកបាន បន្ទាប់ពីតម្លៃកៅស៊ូធ្លាក់ចុះអស់រយៈពេល៥ឆ្នាំកន្លងមក។ ការធ្លាក់ចុះតម្លៃកៅស៊ូបានទុំជោរ វាល្មមដល់ពេលកើនឡើងហើយ អ្នកដាំកៅស៊ូមានទឹក មាត់លេបឡើងវិញ ។
លោកឧកញ៉ាបន្តថា ៖ « ចម្ការកៅស៊ូរបស់យើងមានជាង៤០ម៉ឺនហិកតា តែបើមិនចៀរជ័រមានកៅស៊ូឯណានាំចេញ ព្រោះពេលនេះ បណ្តាប្រទេសក្នុងសហគមន៍អឺរ៉ុបត្រូវការជ័រកៅស៊ូច្រើនពីយើង ។ យើងមានប៉ុន្មាន គេយកប៉ុណ្ណឹង តែសំខាន់អ្នកដាំកៅស៊ូត្រូវថែទាំ ដាក់ជី ទើបអាចចៀរជ័របាន ព្រោះកន្លងមកមានអ្នកទុកកៅស៊ូចោលច្រើន និងកាប់ចោលដោយសារតម្លៃធ្លាក់ចុះ » ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ថ្លែងថា កសិករបច្ចុប្បន្នកំពុងសប្បាយចិត្ត និងរីកមុខរីកមាត់សម្បើមណាស់ ដោយសារជ័រកៅស៊ូឡើងថ្លៃ ព្រោះតម្រូវការជ័រកៅស៊ូពីទីផ្សារអន្តរជាតិមានការកើនឡើង ។ បច្ចុប្បន្ន ផ្ទៃដីដាំកៅស៊ូបានកើនឡើងរហូតដល់៤០២.១៤០ហិកតា និងគ្របដណ្តប់លើខេត្ត-ក្រុងជាច្រើននៅកម្ពុជា ៕
ចែករំលែកព័តមាននេះ