រាជធានីភ្នំពេញ ៖ បុរសម្នាក់ស្លាប់ ក្រោយជិះម៉ូតូត្រឡប់ពីផ្ទះផ្ទះគូដណ្តឹងស្រីនៅម្តុំព្រែកក្តាម បានទៅបុករបាំងថ្មដាក់បាំងការដ្ឋានជួសជុលផ្លូវ ដែលមិនមានចំណាំងផ្លាត បណ្តាលឱ្យផ្លោងដួលបោកក្បាលស្លាប់ភ្លាមៗ កាលពីវេលាម៉ោង១២ និង២០នាទីរំលង
អធ្រាត្រឈានចូលថ្ងៃទី១២ ធ្នូ ស្ថិតត្រង់ចំណុចតាមបណ្តោយផ្លូវជាតិលេខ៥ ក្នុងក្រុម៣ ភូមិគ្រួស សង្កាត់សំរោង ខណ្ឌព្រែកព្នៅ។
ជនរងគ្រោះដែលស្លាប់ឈ្មោះនីម នីន អាយុ២៦ឆ្នាំ ជាបើកបររថយន្ត ស្នាក់នៅផ្ទះជួលម្តុំវត្តសន្សំកុសល សង្កាត់បឹងទំពុន ខណ្ឌមានជ័យ មានស្រុកកំណើតនៅភូមិបាក់ដាវក្រោម ឃុំបាក់ដាវ ស្រុកខ្សាច់កណ្តាល ខេត្តកណ្តាល ។
តាមប្រភពព័ត៌មានឱ្យដឹងថា មុនពេលកើតហេតុ ជនរងគ្រោះខាងលើជិះម៉ូតូមួយគ្រឿងម៉ាកFZ ពណ៌ខ្មៅ ពាក់ស្លាក់លេខភ្នំពេញ ១GC៥៧០៤ បើកបរតែម្នាក់ឯង ក្នុងទិសដៅពីជើងទៅត្បូង តាមបណ្តោយផ្លូវជាតិលេខ៥ ជនរងគ្រោះបានទៅលេងនៅផ្ទះគូដណ្តឹងរបស់ខ្លួននៅម្តុំព្រែកក្តាមតាំងពីម៉ោង៥ល្ងាច រហូតដល់យប់ជ្រៅបន្តិច ជនរងគ្រោះបានលាគូដណ្តឹងរបស់ខ្លួន និងគ្រួសារដើម្បីត្រលប់ទៅផ្ទះវិញនៅម្តុំវត្តសន្សំកុសល ។
ពេលនោះ គូដណ្តឹងបានឃាត់ជនរងគ្រោះឱ្យគេងនៅទីនេះមួយយប់ ចាំស្អែកចាំទៅ តែជនរងគ្រោះមិនព្រមទេ ព្រោះប្រញាប់បើករថយន្តជូនមេឡើងយន្តហោះ ។ ខណៈពេលជិះម៉ូតូមកដល់ចំណុចកើតហេតុខាងលើ ដោយសារតែផ្លូវមានស្ថានភាពងងឹតហើយរនាំងថ្ម ដែលគេដាក់បាំងការដ្ឋាននសាងសង់ផ្លូវនេះ ក៏មិនមានភ្លើងសញ្ញា ឬក៏ចំណាំងផ្លាតអ្វីផ្សេងនោះទេ បណ្តាលអោយជនរងគ្រោះខាងលើជិះទៅបុកពេញទំហឹងបណ្តាលអោយជនរងគ្រោះហោះផ្លោងចេញពីម៉ូតូជាងដប់ម៉ែត្របោកក្បាលទៅនិងថ្នលស្លាប់ភ្លាមៗនៅនិងកន្លែងកើតហេតុ។ ក្រោយពេលកើតហេតុនារីជាគូដណ្តឹងបានទៅដល់កន្លែងកើតហេតុទួញយំសោកស្តាយជាពន់ពេក ។
ចែករំលែកព័តមាននេះ