រាជធានីភ្នំពេញ ៖ យុវជនពីរនាក់ជិះម៉ូតូមួយគ្រឿង បើកជែងរថយន្តពីខាងស្តាំជ្រុលទៅបុកនឹងរទេះលក់មាន់អាំង និងត្រីដុតតាមចិញ្ចើមផ្លូវធ្វើឲ្យជ្រុះមាន់ និងត្រីរាយប៉ាយខូចខាតស្ទើរទាំងស្រុង តែមិនបង្កឲ្យមានអ្នករងរបួសទេ កើតឡើងកាលពីវេលាម៉ោង០៩និង២៥នាទីយប់ ថ្ងៃទី២៩ ខែឧសភា ឆ្នាំ២០១៧ ត្រង់ចំណុចមុខផ្ទះលេខ៨៨ ផ្លូវ៣៣៦ កែងផ្លូវ២៥៥ ស្ថិតក្នុងសង្កាត់បឹងសាឡាង ខណ្ឌទួលគោក ។
ជនបង្កមានឈ្មោះ រ័ត្ន ថា ភេទប្រុស អាយុ១៩ឆ្នាំ មុខរបរកម្មករលើកអីវ៉ាន់ ស្នាក់នៅម្តុំផ្សារបឹងសាឡាង សង្កាត់បឹងសាឡាង ខណ្ឌទួលគោក បើកម៉ូតូមួយគ្រឿងម៉ាកគ្រីសអង្គរ ពណ៌ក្រហម ធ្វើដំណើរតាមបណ្តោយផ្លូវ336 ក្នុងទិសដៅពីលិចទៅកើត ។ ជនរងគ្រោះមានឈ្មោះ គឹម លាង ភេទស្រី អាយុ៣៥ឆ្នាំ មុខរបរលក់មាន់អាំង និងត្រីដុតស្នាក់នៅផ្ទះលេខ៨៨ សង្កាត់បឹងសាឡាង ខណ្ឌទួលគោក ។ តាមប្រភពពត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូមួយគ្រឿងម៉ាកគ្រីសអង្គរ ពណ៌ក្រហម ជិះដោយយុវជន២នាក់ ទិសដៅពីលិចទៅកើតមកដល់ចំណុចខាងលើព្យាយាមបើកជែងរថយន្តមួយគ្រឿងទៀតម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ ២AL-៩៧៩១ ជិះពីរនាក់ប្តីប្រពន្ធ ខណៈពេលដែលម៉ូតូកំពុងតែព្យាយាមបើកជែង ស្រាប់តែរថយន្តបានបត់ស្តាំបម្រុងនឹងចូលទិញផ្លែឈើ បណ្តាលឲ្យម៉ូតូជ្រុលទៅបុក នឹងរទេះលក់មាន់អាំង និងត្រីដុតជ្រុះមាន់អាំង ត្រីដុត បន្លែ និងរបស់របរនៅលើរទេះធ្លាក់រាយប៉ាយខូចខាតស្ទើរទាំងស្រុង សំណាងល្អមិនមានអ្នករងរបួសទេ គ្រាន់តែខូចខាតម៉ូតូបង្កតិចតួច ។
ក្រោយពេលកើតហេតុភាគីទាំងសងខាងបានជជែកដោះស្រាយគ្នា ដោយអ្នកលក់មាន់អាំង និងត្រីដុតទាមទារសំណងថ្លៃខូចខាតចំនួន១៥០$ តែដោយសារភាគីខាងម៉ូតូមិនមានលុយដើម្បីជួយចេញថ្លៃខូចខាត ម្ចាស់រថយន្តក៏បានជួយចេញសំណងថ្លៃខូចខាតចំនួ១០០$ ដើម្បីបញ្ចប់រឿងនៅនឹងកន្លែង ៕
ចែករំលែកព័តមាននេះ