ខេត្តកណ្តាល ៖ មនុស្ស២នាក់បានស្លា.ប់ ក្នុងករណីគ្រោះថ្នាក់ចរាចរណ៍រវាងរថយន្តបុកជាមួយម៉ូតូកាលពីវេលាម៉ោង០៦និង៥៥នាទីល្ងាច ថ្ងៃទី១៨ ខែតុលា ឆ្នាំ២០១៦ នៅលើកំណាត់ផ្លូវជាតិលេខ១
ខេត្តកណ្តាល ៖ មនុស្ស២នាក់បានស្លាប់ ក្នុងករណីគ្រោះថ្នាក់ចរាចរណ៍រវាងរថយន្តបុកជាមួយម៉ូតូកាលពីវេលាម៉ោង០៦និង៥៥នាទីល្ងាច ថ្ងៃទី១៨ ខែតុលា ឆ្នាំ២០១៦ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ ៥៩-៦០ ស្ថិតក្នុងភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្ដាល។ ជនរងគ្រោះទាំង២នាក់ ដែលស្លាប់នៅនឹងកន្លែងកើតហេតុ ទី១.ឈ្មោះ ធី រាជ ភេទប្រុស អាយុ១៦ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកបាក់ ឃុំព្រែកទន្លាប់ ស្រុកលើកដែក ជាអ្នកបើកបរម៉ូតូម៉ាកហុងដាគុប(៥០) ពណ៌ស្លែគ្មានស្លាកលេខ បើកបរក្នុងទិសដៅពីក្បូងទៅជើង ដោយមិនបានពាក់មួកសុវត្ថិភាព និងម្នាក់ទៀតរួមដំណើរពីក្រោយឈ្មោះ ខេម រដ្ឋា ភេទប្រុស អាយុ២៥ឆ្នាំ ជនជាតិខ្មែរ មុខរបរកសិករមានទីលំនៅភូមិឃុំជាមួយគ្នា។
ចំណែកភាគីរថយន្តម៉ាក ឡិចស៊ីស RX-៣០០ ពណ៌ទឹកប្រាក់ពាក់ស្លាកលេខភ្នំពេញ 2N-1756 ទិសដៅបញ្ច្រាសគ្នា(ភ្នំពេញ-អ្នកលឿង) ពីជើងទៅត្បូង។ យោងតាមរបាយការណ៍របស់សមត្ថកិច្ចនគរបាលចរាចរណ៍ស្រុកលើកដែកបានឲ្យដឹងថាករណីគ្រោះថ្នាក់ចរាចរណ៍នេះបណ្ដាលមកពីអ្នកបើកបរទាំងភាគីរថយន្ត និងភាគីម៉ូតូបើកបរខ្វះការប្រុងប្រយត្ន័ដោយភាគីម៉ូតូ បើកចេញពីផ្លូវលេខ១៤ (ច្រកចូលទៅក្អមសំណ) បត់ឆ្វេងឆ្លងកាត់ផ្លូវជាតិលេខ១ រីឯរថយន្តបើកបរពីភ្នំពេញទៅអ្នកលឿង មកដល់ចំណុចផ្លូវបំបែកបើកបរល្បឿនលឿនពេក ក៏បណ្ដាលឲ្យបុកម៉ូតូពេញទំហឹងតែម្ដង។
ក្រោយបង្កហេតុរួច អ្នកបើកបររថយន្ត បានព្យាយាមបើករត់បានប្រហែលជិតកន្លះឡូដី ទើបសមត្ថកិច្ច និងប្រជាពលរដ្ឋដេញឃាត់បានតែរថយន្តដែលតៃកុងចតទុកចោលនៅចំណុចស្ពានដែក ហើយរត់គេចខ្លួនបាត់ស្រមោល។ សពជនរងគ្រោះទាំង២នាក់ សមត្ថកិច្ចជំនាញបានធ្វើកំណត់ហេតុប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី។ រីឯរថយន្តបង្ក និងម៉ូតូត្រូវនគរបាលជំនាញធ្វើការវាស់វែងរួចយកមករក្សាទុកនៅអធិការដ្ឋាននគរបាលស្រុកចាត់ការបន្តតាមនីតិវិធី៕
ចែករំលែកព័តមាននេះ