រាជធានីភ្នំពេញ ៖ បុរសម្នាក់ស្រវឹងស្រាឡើងជោគជាំបើករថយន្តបុកម៉ូតូខ្ទាតចម្ងាយ៥ម៉ែត្រហើយបែរជាជេរប្រមាថ ហើយរកវាយអ្នកជិះម៉ូតូទៀតផង ហេតុការណ៍នេះបង្កឲ្យមានការភ្ញាក់ផ្អើល
រាជធានីភ្នំពេញ ៖ បុរសម្នាក់ស្រវឹងស្រាឡើងជោគជាំបើករថយន្តបុកម៉ូតូខ្ទាតចម្ងាយ៥ម៉ែត្រហើយបែរជាជេរប្រមាថ ហើយរកវាយអ្នកជិះម៉ូតូទៀតផង ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១០ និង៣០នាទីយប់ ថ្ងៃទី២៧ ខែកក្កដា ឆ្នាំ២០១៦ តាមបណ្តោយផ្លូវលេខ១២០ កែងផ្លូវព្រះមុនីវង្ស នៅចំណុចចំណតរថយន្តផ្សារថ្មី ស្ថិតនៅក្នុងសង្កាត់ផ្សារថ្មី២ ខណ្ឌដូនពេញ ។
សាក្សីម្នាក់ឈ្មោះ រាន ភេទប្រុស អាយុជាង៤០ឆ្នាំ មុខរបរជាអ្នករត់ម៉ូតូឌុបនៅផ្សារថ្មីពេលយប់ បានឲ្យដឹងថា មុនពេលកើតហេតុគេបានឃើញបុរសម្នាក់មានធំក្លិនស្រា ជិះម៉ូតូម៉ាក Giono ពណ៌សូកូឡា ពាក់ស្លាកលេខ កណ្តាល 1S-9629 បើកបរតាមបណ្តោយផ្លូវលេខ១២០ ក្នុងទិសដៅពីកើតទៅលិច ខណៈពេលមកដល់ចំណុចកើតហេតុស្រាប់តែមានបុរសម្នាក់អួតអាងថា ខ្លួនជាប្រធានព័ត៌មានទូរទស្សន៍ប៉ុស្តិ៍លេខ៨ មានឈ្មោះ សម សីហា បើករថយន្តម៉ាកកាមរីគូទហើម ពណ៌ស្លែ ពាក់ស្លាកលេខ ភ្នំពេញ 2D-6637 តាមបណ្តោយផ្លូវព្រះមុនីវង្ស បត់ទៅផ្លូវលេខ១២០ ទិសដៅពីលិចទៅកើត ក្នុងល្បឿនយ៉ាងលឿនទាំងស្ថានភាពស្រវឹងស្រាជោគជាំ បានបើកទៅបុកម៉ូតូចំពីមុខ បណ្តាលឲ្យខ្ទាតម៉ូតូអូសចម្ងាយ៥ម៉ែត្រ តែសំណាងល្អមិនរងរបួសធ្ងន់ធ្ងរនោះទេ ចំណែកឯរថយន្តវិញហើបស្លាកលេខ ម៉ូតូបាក់ក្បាំងខាងមុខ ។
ក្រោយពេលកើតហេតុ អ្នកបើករថយន្តបង្កបានចុះមកស្រែកជេរប្រមាថ និងរកវាយអ្នកបើកម៉ូតូទៀតផង ។ បន្ទាប់មកសុខចិត្តសងទៅម៉ូតូក្នុងតំលៃ១០ដុល្លារ ប៉ុន្តែខាងម៉ូតូមិនព្រម គាត់ទាមទារសំណងចំនួន៣០០ដុល្លារ ព្រោះខឹងខាងរថយន្តជេរប្រមាថទៅលើគាត់ ពេលនោះអ្នកបើករថយន្តបង្កបានទូរស័ព្ទទៅរកលោកឯកឧត្តមដើម្បីមកជួយអន្តរាគមន៍ និងបាននិយាយថា បើឯកឧត្តមមកដល់សូម្បីតែមួយរៀលក៏អត់បានដែរ ។ ស្របពេលនោះ ពេលឃើញអ្នកសារព័ត៌មានទៅថតយករូបភាព បានគំរាមមិនឲ្យថតរូបទេ និងជេរប្រមាថទៅលើអ្នកសារព័ត៌មានទៀតផង ។
ដោយសារតែគ្រោះថ្នាក់ចរាចរណ៍បើករថយន្តបុកម៉ូតូហើយចោទថាម៉ូតូជាអ្នកបុក ពេលសមត្ថកិច្ចមូលដ្ឋានបានមកដល់ឃើញភាគីទាំងសងខាងជជែកគ្នាជិត៣ម៉ោងនៅតែមិនត្រូវគ្នា ទោះបីជាសាច់ញាតិខាងរថយន្តមកដល់យល់ព្រមសងសំណងចំនួន២៥០ដុល្លារក៏អ្នកបើកម៉ូតូមិនព្រម ទើបសមត្ថកិច្ចជំនាញចុះទៅវាស់វែងយកម៉ូតូ និងរថយន្តទៅដោះស្រាយគ្នានៅការិយាល័យចរចរាណ៍ជើងគោករាជធានីភ្នំពេញ ៕
ចែករំលែកព័តមាននេះ