រាជធានីភ្នំពេញ ៖ សារាចរណែនាំចុះថ្ងៃ ទី១២ មេសា ដែលចុះហត្ថលេខាដោយសម្តេចតេជោនាយករដ្ឋមន្ត្រីត្រូវបានផ្សព្វផ្សាយសម្រាប់ការចាត់តាំងខួបអនុស្សាវរីយ៍លើកទី១២៥ នៃទិវាពលកម្មអន្តរជាតិថ្ងៃទី១ ឧសភា ឆ្នាំ២០១១ ។ សារាចរណែនាំនេះមានខ្លឹមសារថា ទិវាពលកម្មអន្តរជាតិថ្ងៃទី១ ឧសភា គឺជាព្រឹត្តិការណ៍ប្រវត្តិសាស្ត្រនៃចលនាកម្មករអន្តរជាតិ
រាជធានីភ្នំពេញ ៖ សារាចរណែនាំចុះថ្ងៃ ទី១២ មេសា ដែលចុះហត្ថលេខាដោយសម្តេចតេជោនាយករដ្ឋមន្ត្រីត្រូវបានផ្សព្វផ្សាយសម្រាប់ការចាត់តាំងខួបអនុស្សាវរីយ៍លើកទី១២៥ នៃទិវាពលកម្មអន្តរជាតិថ្ងៃទី១ ឧសភា ឆ្នាំ២០១១ ។ សារាចរណែនាំនេះមានខ្លឹមសារថា ទិវាពលកម្មអន្តរជាតិថ្ងៃទី១ ឧសភា គឺជាព្រឹត្តិការណ៍ប្រវត្តិសាស្ត្រនៃចលនាកម្មករអន្តរជាតិ ។ នៅក្នុងប្រទេសកម្ពុជា ទិវាពលកម្មអន្តរជាតិថ្ងៃទី១ ឧសភា ត្រូវបានប្រារព្ធជារៀងរាល់ឆ្នាំចាប់តាំងពីឆ្នាំ១៩៧៩ មកម៉្លេះ ហើយបច្ចុប្បន្ននេះ រាជរដ្ឋាភិបាលកម្ពុជាក៏បានកំណត់យកថ្ងៃទី១ ឧសភា ជាថ្ងៃបុណ្យការងាររបស់ពលករកម្ពុជា និងជាថ្ងៃឈប់សម្រាករបស់មន្ត្រីរាជការ និងកម្មករនិយោជិតទាំងអស់ ដូចថ្ងៃបុណ្យជាតិ បុណ្យប្រពៃណី និងបុណ្យអន្តរជាតិនានាដែរ ។ ទិវាពលកម្មអន្តរជាតិនេះ ក៏ជាព្រឹតិ្តការណ៍មួយដែលយើងត្រូវនាំគ្នាឧទ្ទិសចំពោះគោលបំណងរួមរបស់យើង គឺបន្តខិតខំបង្កើនផលិតភាពការងារ គុណភាព ផលិតផល ដើម្បីអភិវឌ្ឍន៍ប្រទេសជាតិ ។
សារាចរបន្តថា ដើម្បីរៀបចំការប្រារព្ធខួបអនុស្សាវរីយ៍លើកទី១២៥ នៃទិវាពលកម្មអន្តរជាតិថ្ងៃទី១ ឧសភា ឆ្នាំ២០១១នេះ ឱ្យប្រព្រឹត្តទៅបានល្អ រាជរដ្ឋាភិបាលកម្ពុជាសូមធ្វើការណែនាំដូចខាងក្រោមនេះ ៖
១-ក្រសួងការងារ និងបណ្តុះបណ្តាលវិជ្ជាជីវៈ ត្រូវធ្វើជាស្ថាប័នស្នូលក្នុងការរៀបចំទិវាអន្តរជាតិនេះ ដោយចេញសេចក្តីជូនដំណឹងដល់មន្ទីររាជធានី-ខេត្តក្រោមឱវាទ អង្គការវិជ្ជាជីវៈរបស់និយោជក ម្ចាស់ និងនាយកក្រុមហ៊ុន អង្គការវិជ្ជាជីវៈរបស់កម្មករនិយោជិត ព្រមទាំងកម្មករនិយោជិតទាំងអស់ ដើម្បីណែនាំអំពីការឈប់សម្រាក និងកំសាន្តសប្បាយតាមលទ្ធផលរៀងៗខ្លួនរបស់សហគ្រាស គ្រឹះស្ថាន សំដៅបង្កបរិយាកាសយោគយល់គ្នារវាងកម្មករនិយោជិត និងនិយោជក ។ ចៀសវាងដាច់ខាតនូវការប្រើប្រាស់រូបភាពទិវាពលកម្មអន្តរជាតិនេះ ដើម្បីធ្វើសកម្មភាពទាំងឡាយណាដែលបណ្តាលឱ្យមានការប៉ះពាល់ដល់សណ្តាប់ធ្នាប់សាធារណៈរបស់សង្គម ។ ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ ត្រូវជ្រើសរើសសហគ្រាស គ្រឹះស្ថានជានិមិត្តរូប ដើម្បីធ្វើការសំណេះសំណាលជាមួយកម្មករនិយោជិត ។
២-ក្រសួងព័ត៌មានត្រូវណែនាំប្រព័ន្ធឃោសនារបស់រដ្ឋ និងឯកជន ទទួលផ្សព្វផ្សាយសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសខួបអនុស្សាវរីយ៍លើកទី១២៥ នៃទិវាពលកម្មអន្តរជាតិថ្ងៃទី១ ឧសភា ឆ្នាំ២០១១ ឱ្យបានទូលំទូលាយ ។
៣-ក្រសួងមហាផ្ទៃ អគ្គស្នងការដ្ឋាននគរបាលជាតិ បញ្ជាការដ្ឋានកងរាជអាវុធហត្ថលើផ្ទៃប្រទេស អាជ្ញាធររាជធានី និងស្ថាប័នពាក់ព័ន្ធទាំងអស់ ត្រូវមានវិធានការតាមសមត្ថកិច្ចរបស់ខ្លួនក្នុងការថែរក្សាសន្តិសុខ សុវត្ថិភាព សណ្តាប់ធ្នាប់សាធារណៈ ក្នុងឱកាសទិវាពលកម្មអន្តរជាតិឆ្នាំ២០១១ នេះ ។
៤-នៅតាមរបងខាងមុខក្រសួង ស្ថាប័ន អង្គភាពរដ្ឋ និងសហគ្រាស គ្រឹះស្ថានឯកជន ត្រូវមានការចងបដាពាក្យស្លោកចំនួនបី គឺ ៖
-ជយោ! ព្រះរាជាណាចក្រកម្ពុជា
-អបអរសាទរខួបអនុស្សាវរីយ៍លើកទី ១២៥ នៃទិវាពលកម្មអន្តរជាតិថ្ងៃទី១ ឧសភា
-ខិតខំបង្កើនផលិតភាពការងារ គុណភាពផលិតផល ដើម្បីរួមចំណែកអភិវឌ្ឍន៍ប្រទេសជាតិ ។
រាជធានីភ្នំពេញ និងខេត្តទាំងអស់ ត្រូវជ្រើសរើសដងវិថីសំខាន់ៗ និងទីតាំងរោងចក្រសហគ្រាស ការដ្ឋាន កសិដ្ឋាន ដើម្បីធ្វើការចងបដាពាក្យស្លោក ។ រាជរដ្ឋាភិបាលកម្ពុជា អំពាវនាវដល់មន្ត្រីរាជការគ្រប់ជាន់ថ្នាក់ កម្មករនិយោជិតកម្ពុជា និងពលករបរទេសទាំងអស់ ចូលរួមប្រារព្ធ និងអបអរសាទរទិវាពលកម្មអន្តរជាតិ ថ្ងៃទី១ ឧសភា ឆ្នាំ២០១១ ក្នុងក្តីសោមនស្សរីករាយ សាមគ្គីភាព និងភាតរភាព ដើម្បីឱ្យស័ក្តិសមជាបុណ្យការងាររបស់ប្រទេសជាតិយើងដែលជាសមាជិកសហគមន៍អន្តរជាតិនានានៅលើពិភពលោក៕
ចែករំលែកព័តមាននេះ