រាជធានីភ្នំពេញ ៖ អតីតតារាចម្រៀងកញ្ញាពៅ បញ្ញាពេជ្រ បានផ្ញើសារទៅកាន់អ្នកគាំទ្រ ដែលតែងតែលើកទឹកចិត្តដល់រូបនាង ដោយចាត់ទុកការផ្តល់កម្លាំងចិត្តនេះពិតជាមិនអាចខ្វះបាន…
រាជធានីភ្នំពេញ ៖ អតីតតារាចម្រៀងកញ្ញាពៅ បញ្ញាពេជ្រ បានផ្ញើសារទៅកាន់អ្នកគាំទ្រ ដែលតែងតែលើកទឹកចិត្តដល់រូបនាង ដោយចាត់ទុកការផ្តល់កម្លាំងចិត្តនេះពិតជាមិនអាចខ្វះបាន ហើយជាបុព្វហេតុចម្បងដែលធ្វើឲ្យនាងកាន់តែមើលឃើញពិភពលោកធំជាងមុន ។
កញ្ញាពៅ បញ្ញាពេជ្រ ស្ទើរតែគ្មានសង្ឃឹមក្នុងជីវិត ខណៈនាងក្លាយជាជនពិការអង្គុយតែលើរទេះរុញ បន្ទាប់ពីនាងរងការបាញ់ប្រហារពីខ្មាន់កាំភ្លើងមិនស្គាល់អត្តសញ្ញាណកាលពីជិត១០ឆ្នាំមុន ។ ការផ្ញើសាររបស់់កញ្ញាពៅ បញ្ញាពេជ្រ នេះបន្ទាប់ពីរូបនាងតែងតែបង្ហោះវីដេអូឃ្លីបជាមួយនឹងការបកស្រាយបទចម្រៀង ហើយមានអ្នកចូលទស្សនាជាច្រើននាក់ ក្នុងនោះបានភ្ជាប់សារលើកទឹកចិត្ត និងជូនពរដល់រូបនាងឲ្យឆាប់បានជាសះស្បើយពីជំងឺផងដែរ ។
កញ្ញាពៅ បញ្ញាពេជ្រ ចាត់ទុកការផ្តល់កម្លាំងចិត្ត គឺជាស្ពានមួយចម្លងឲ្យនាងដើរទៅមុខបន្តទៀត និងមើលឃើញពិភពលោកកាន់តែធំជាងមុន បន្ទាប់ពីមុននេះនាងស្ទើរតែបាត់បង់កម្លាំងចិត្ត ដោយសារអាការជំងឺរបស់នាងចេះតែធ្វើទុក្ខស្ទើរមិនលស់ថ្ងៃ និងមានសង្ឃឹមតិចតួចក្នុងការជាសះស្បើយ ។
កញ្ញាពៅ បញ្ញាពេជ្រ បានបង្ហោះវីដេអូឃ្លីបបទចម្រៀង រួមជាមួយនឹងសារសរសេរថ្លែងអំណរគុណតាមបណ្តាញសង្គមហ្វេសប៊ុកកាលពីពេល ថ្មីៗកន្លងមកថា «ថ្ងៃនេះនាងខ្ញុំមានអារម្មណ៍សប្បាយចិត្តមែនទែនដោយសារតែបងប្អូនផ្តល់កម្លាំងចិត្តដល់រូបនាងខ្ញុំដែលធ្វើឱ្យនាងខ្ញុំមើលឃើញពិភពលោកនេះកាន់តែធំទូលាយ ដូចនេះនាងខ្ញុំត្រូវតែខំប្រឹងប្រែងតទៅទៀត នាងខ្ញុំនឹងមិនធ្វើឱ្យបងប្អូនខកបំណងទេ ហើយថ្ងៃនេះបញ្ញាពេជ្រសូមជូននូវចម្រៀងជាបន្តបន្ទាប់ដែលច្រៀងដោយ ផ្ទាល់របស់នាងខ្ញុំ សូមបងប្អូនទទួលរីករាយ ។ បងប្អូនបានកម្សាន្តអារម្មណ៍ ចំណែកនាងខ្ញុំទទួលបាននូវកម្លាំងចិត្តពីបងប្អូន ដូចនេះមានន័យថា យើងចំណេញទាំងអស់គ្នា» ។
កន្លងមក ពៅ បញ្ញាពេជ្រ ធ្លាប់អះអាងថា ក្រុមគ្រូពេទ្របានរកឃើញថ្នាំម្យ៉ាងដែលអាចព្យាបាលជំងឺនាង តែថ្នាំនោះនៅមិនទាន់មានលក់ក្នុងស្រុកខ្មែរទេ ហេតុនេះនាងត្រូវបន្តតាមដានបន្ថែមទៀត ម្យ៉ាងនាងត្រូវតាមដានទៅលើប្រសិទ្ធភាពថ្នាំនោះផងដែរ ព្រោះវានៅមិនទាន់ប្រាកដថាពូកែមួយរយភាគរយនៅឡើយទេ ។
ទោះជាយ៉ាងណាក្តី ពៅ បញ្ញាពេជ្រ បញ្ជាក់ថា ប្រសិនបើថ្នាំនោះពិតជាពូកែមែននោះនាងមិនទាន់សង្ឃឹមថា អាចមានលទ្ធភាពទិញយកមកប្រើដែរ ព្រោះវាមានតម្លៃថ្លៃ ប៉ុន្តែនាងនៅតែបន្តធ្វើតាមការណែនាំពីក្រុមគ្រូពេទ្រដដែល ដើម្បីឲ្យអាការជំងឺរបស់នាងបានធូរស្បើយ និងមិនធ្វើទុក្ខ ខណៈរហូតមកដល់ពេលនេះនាងនៅតែមិនអាចដើរបាននៅឡើយ ។
ក្នុងពេលទទួលបានភាពល្បីល្បាញជាច្រើនឆ្នាំ ជាប់ៗគ្នាក្នុងពិភពសិល្បៈចម្រៀងជាមួយសម្រស់ក្មេងខ្ចី តារាចម្រៀង កញ្ញាពៅ បញ្ញាពេជ្រ ត្រូវខ្មាន់កាំភ្លើងមិនស្គាល់អត្តសញ្ញាណបាញ់ប្រហារកាលពីថ្ងៃទី២៣ ខែកុម្ភៈ ឆ្នាំ២០០៧ វេលាម៉ោង៦និង២០នាទីព្រឹកនៅមុខសាលាភាសាបរទេសមួយក្បែររបងអតីតក្រសួងឧស្សាហកម្មរ៉ែ និងថាមពល បណ្តាលឲ្យរងរបួសធ្ងន់ ។ អ្នករបួសរូបនេះត្រូវក្រុមគ្រួសារបញ្ជូនទៅព្យាបាលនៅប្រទេសវៀតណាម ហើយបន្ទាប់មកបន្តទៅប្រទេសថៃ និងចុងក្រោយវិលមកកម្ពុជាវិញកាលពីអំឡុងខែកញ្ញា ឆ្នាំ២០១២ ។
មុនវិលត្រឡប់មកកាន់ស្រុកវិញម្ចាស់បទចម្រៀង «ស្នេហ៍គ្មានខណ្ឌ» កញ្ញាពៅ បញ្ញាពេជ្រ ធ្លាប់អះអាងថា នាងមិនព្រួយបារម្ភពីសុវត្ថិភាពរបស់នាងខ្លាំងពេកឡើយដោយសារថា នៅពេលនេះនាងមិនមែនជាតារាដែលអាចកាន់ក្បាលមេក្រូច្រៀងដូចមុនឡើយ ពោលគឺនាងក្លាយជាជនពិការម្នាក់ទៅហើយ ។ អ្វីដែលនាងប្រាថ្នាចង់បាននាពេលនេះ គឺសុំត្រឹមតែបន្តការព្យាបាលជំងឺនៅក្នុងទឹកដីកំណើតក្នុងក្តីសង្ឃឹមថា ប្រសិនបើអាចបានជាសះស្បើយ នាងអាចមានឱកាសប្រឡូកក្នុងពិភពសិល្បៈជាថ្មីទៀត ៕
ចែករំលែកព័តមាននេះ