ខេត្តបន្ទាយមានជ័យ ៖ រថយន្តម៉ាកកាមរីមួយគ្រឿងដែលដឹកទំនិញចូលពីប្រទេសថៃគេចពន្ធ រួចពីគយបែរជាមកជាប់អន្ទាក់កងកម្លាំងនគរបាលប្រឆាំងបទល្មើសសេដ្ឋកិច្ចខេត្តនៅចំកណ្តាលក្រុងសិរីសោភ័ណទៅវិញ ។ ការស្ទាក់ចាប់ឃាត់រថយន្តដឹកទំនិញគេចពន្ធនេះ កម្លាំងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានធ្វើឡើងកាលពីវេលាម៉ោង១១ និង២នាទីព្រឹក ថ្ងៃទី០៤ កុម្ភៈ ២០១៥ នៅចំណុចភូមិសូភី សង្កាត់កំពង់ស្វាយ ក្រុងសិរីសោភ័ណ។
លោកវរសេនីយ៍ទោ ចាប សុផាប្ញទ្ធិ នាយការិយាល័យនគរបាលប្រឆាំងបទល្មើសសេដ្ឋកិច្ចខេត្ត បានឲ្យដឹងថា បន្ទាប់ពីទទួលបានព័ត៌មានពីកម្លាំងសម្ងាត់ថា មានរថយន្តកាមរី១គ្រឿងដឹកទំនិញគេចពន្ធ លោកបានរាយការណ៍ជូនលោកឧត្តសេនីយ៍ស្នងការស្នើសុំគោលការណ៍ និងមានការសម្របសម្រួលពីស្ថាប័នអយ្យការសាលាដំបូងខេត្តបន្ទាយមានជ័យ ។
កម្លាំងនគរបាលជំនាញប្រឆាំងបទល្មើសសេដ្ឋកិច្ចខេត្ត បានធ្វើការស្ទាក់ចាប់ឃាត់រថយន្ត១គ្រឿងម៉ាកកាមរី ពណ៌ទឹកប្រាក់ ស៊េរី១៩៩៥ ពាក់ស្លាកលេខខាងមុខ បាត់ដំបង 2A.2722 ខាងក្រោយគ្មានពាក់ស្លាកលេខ អ្នកបើកបររថយន្តគេចខ្លួនបាត់ ។ ក្រោយពីចាប់ឃាត់រថយន្តមានបុរសម្នាក់បានចេញមុខមកអះអាង និងទទួលខុសត្រូវ ដែលគេបានស្គាល់ថា ជាម្ចាស់រថយន្តឈ្មោះ ស៊ឹម ចិត្រ ភេទប្រុស អាយុ៣២ឆ្នាំ នៅភូមិអូរអំបិល សង្កាត់អូរអំបិល ក្រុងសិរីសោភ័ណ មានមុខរបរជាអ្នកបើករថយន្តឈ្នួល ។
លោកនាយការិយាល័យបានបញ្ជាក់ថា តាមការត្រួតពីនិត្យទំនិញនៅក្នុងរថយន្តគេឃើញមានដឹកទឹកក្រូចសម្រាប់ក្មេងហូបម៉ាក DEEDO (ប្រភេទទឹករាវ)ដោយគ្មានបង្កាន់ដៃពន្ធនាំចូល ។ ម្យ៉ាងរថយន្តនេះខុសច្បាប់ចរចរណ៍បិទស្គត់ខ្មៅដើម្បីបំភ័ន្តភ្នែកសមត្ថកិច្ច ដែលបំរើឲ្យការដឹកទំនិញគេចពន្ធខុសច្បាប់។
ចំពោះទំនិញ និងរថយន្ត ត្រូវបានយកមករក្សាទុកនៅការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត តែគេនៅមិនទាន់បានត្រួតពិនិត្យរាប់ឲ្យដឹងពីចំនួនកេស ចំនួនដប ឬក៏ទំនិញហួសកាលបរិច្ឆេទនៅឡើយទេ រង់ចាំស្ថាប័នអយ្យការសាលាដំបូងខេត្តបង្កើតគណៈកម្មការត្រួតពិនិត្យរួមគ្នា ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ