រាជធានីភ្នំពេញ ៖ ថ្លែងជាសាធារណៈសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់ថា សម្ដេចមិននិយាយអ្វីទាំងអស់ ហើយគ្មានការចាំបាច់ណាមួយឱ្យយើងយកអំបិល ទឹកត្រី…
រាជធានីភ្នំពេញ ៖ ថ្លែងជាសាធារណៈសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់ថា សម្ដេចមិននិយាយអ្វីទាំងអស់ ហើយគ្មានការចាំបាច់ណាមួយឱ្យយើងយកអំបិល ទឹកត្រី ប៊ីចឹង ទៅចាក់លើសម្លផ្អូម ដែលគេចាក់ចោលហើយនោះ ។
ការលើកឡើងរបស់សម្តេចតេជោ បន្ទាប់ពីមានបុគ្គលមួយចំនួនបានប្រកាសខ្លួនថា ជាអ្នកចារកម្មរបស់សម្ដេច និងកំពុងស្ថិតនៅក្រៅប្រទេស ។ ការថ្លែងរបស់សម្ដេចតេជោ ប្រធានព្រឹទ្ធសភា ក្នុងឱកាសដែលសម្ដេចបានអញ្ជើញ សម្ពោធអគារសិក្សា និងសមិទ្ធផលនានា នៅវត្តព្រះឥន្ទសាមគ្គីធម៌ ស្រុកអង្គស្នួល ខេត្តកណ្តាល នាព្រឹកថ្ងៃទី១១ ខែកុម្ភៈ ឆ្នាំ២០២៥ ។
សម្ដេចតេជោ ហ៊ុន សែន បានគូសបញ្ជាក់ថា ៖ «ចុងក្រោយនេះ គឺវិបត្តិចារកម្ម ខ្ញុំព្រះករុណា ខ្ញុំមិននិយាយអីទេ គ្មានការចាំបាច់ណាមួយឱ្យយើងយកអំបិល ទឹកត្រី ប៊ីចឹង ទៅចាក់លើសម្លផ្អូម ដែលគេចាក់ចោលហើយនោះ ឬក៏និយាយមួយបែបទៀត គ្មានការចាំបាច់ណាមួយដើម្បីហ្នឹងរកថ្នាំពេទ្យ ឬរកឧបករណ៍សង្គ្រោះបន្ទាន់សម្រាប់សាកស.ព ដែលគេយកទៅកប់ហើយនោះនិយាយប៉ុណ្ណឹងអាចដឹងហើយ ។
យូរៗវាតាំងខ្លួនជាចារកម្ម ឯងក៏និយាយថា គ្រាន់តែជាអ្នកពិគ្រោះយោបល់ ។ កុំឌឺ ឌឺយ៉ាងម៉េចក៏ទៅមិនរួចដែរ ត្រូវនឹង ត្រូវស្ដាប់ពេលណាសភាពការណ៍កំពុងតែជ្រួលត្រូវនៅឱ្យស្ងៀម នៅឱ្យរឹង អាហ្នឹងបានគេហៅអ្នកនយោបាយ» ។
គួរឮកថា កាលពីពេលថ្មីៗនេះ មានការបែកធ្លាយសារជាសំឡេងរវាងសម្ដេចតេជោ ជាមួយលោក សេង សារី នាំឱ្យមានការវែកញែកគ្នារក្នុងកិច្ចសម្ភាសន៍អាស៊ីសេរី ដែលមានលោក ជុន ច័ន្ទបុត្រ បានហៅលោក សេង សារី ថាជា «ចារកម្ម» របស់សម្ដេចតេជោ ហ៊ុន សែន ។
យ៉ាងណាក្តី លោក សេង សារី បានអះអាងថា រូបលោក គឺជាអ្នកដែ លបានធ្លាក់ចូលក្នុងអន្ទាក់ចារកម្មរបស់សម្ដេចតេជោ ហ៊ុន សែន អស់រយៈពេល៤ឆ្នាំមកហើយ ។ យ៉ាងណាក្តីភ្លាមៗនោះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រកាសនៅក្នុងទំព័រហ្វេសប៊ុកផ្លូវការរបស់សម្ដេច នារាត្រីថ្ងៃទី០៦ ខែកុម្ភៈ ឆ្នាំ២០២៥ ថា «ខ្ញុំមិនដែល ចាត់ទុក សេង សារី ជាចារកម្ម ឬជាចំណាប់ខ្មាំងនោះឡើយ តែចាត់ទុកជាអ្នកពិគ្រោះនយោបាយមួយរូប» ៕
ចែករំលែកព័តមាននេះ