ទីក្រុងវ៉ាស៊ីនតោន៖ ស្ថានភាពសេដ្ឋកិច្ចពិភពលោកដែលកំពុងយ៉ាប់ស្រាប់ទៅហើយនោះអាចនឹងយ៉ាប់ថែម១តង់ទៀតនៅពេលលោកត្រាំចុះហត្ថលេខាលើបទបញ្ជាដំឡើងពន្ធ២៥%ទៅលើដែកថែប និងអាលុយមីញ៉ូម។ ដូច្នេះ សង្គ្រាមពាណិជ្ជកម្មដ៏ធំ១កំពុងចាប់ផ្ដើមហើយដែលលោកត្រាំជម្នះចិត្តថាត្រូវតែធ្វើឱ្យបានទោះបីអឺរ៉ុប និងចិនផ្ដល់សញ្ញាព្រមានក៏ដោយ។
លោកត្រាំបង្ហើបឱ្យដឹងអំពីគម្រោងដំឡើងពន្ធតាំងពីយប់ថ្ងៃអាទិត្យ។ មុនពេលចុះហត្ថលេខានៅថ្ងៃនេះ តម្លៃភាគហ៊ុននៅផ្សារមូលប័ត្រហក់ឡើងខ្ពស់បន្តិចព្រោះក្រុមអ្នកទិញ-លក់ភាគហ៊ុនហាក់ដូចជាមិនសូវព្រួយបារម្ភខ្លាំងពេកទេចំពោះផែនការនេះ។ លោកត្រាំបញ្ជាក់ម្ដងទៀតថាពន្ធ២៥%ត្រូវតែកំណត់ទៅលើគ្រប់ប្រទេសទាំងអស់ដោយគ្មានការបន្ធូរបន្ថយទេ។
ក្រៅពីដែក និងអាលុយមីញ៉ូម លោកត្រាំក៏ត្រៀមដំឡើងពន្ធទៅលើរថយន្ត, ទំនិញពាក់ព័ន្ធនឹងសុខាភិបាល និងបន្ទះឈីបកុំព្យូទ័រផងដែរ។ កាណាដា និងម៉ិកស៊ីកូប្រហែលជារងគ្រោះមិនស្ទើរទេ។ ប្រទេសទាំង២ទី១ត្រូវលោកត្រាំដំឡើងពន្ធ២៥%ទៅលើមុខទំនិញទាំងអស់មិនថាតែដែក និងអាលុយមីញ៉ូមទេ។ ទី២ ប្រទេសទាំង២នាំចេញដែកច្រើនបំផុតទៅអាមេរិក។
ក្រៅពីនេះ កូរ៉ខាងត្បូង និងប្រេស៊ីលក៏នាំចេញដែកទៅអាមេរិកច្រើនផងដែរ។ ចំពោះសំណើរបស់អូស្ត្រាលីដែលចង់ឱ្យលោកត្រាំអនុគ្រោះពន្ធចំពោះខ្លួននោះ លោកក៏កំពុងពិចារណាត្រង់ចំណុចនេះផងដែរ។ លោកថាអូស្ត្រាលីទិញយន្តហោះពីយើងច្រើន។ អូស្ត្រាលីមានទីតាំងភូមិសាស្ត្រឆ្ងាយពីពិភពលោក ហើយត្រូវការយន្តហោះជាចាំបាច់សម្រាប់ការធ្វើដំណើរ។
ការដំឡើងពន្ធនេះជាផ្នែក១នៃនយោបាយតម្កល់ផលប្រយោជន៍ជាតិអាមេរិកជារឿងសំខាន់ទី១ផង និងដើម្បីចាត់ការតបទៅនឹងការធ្វើពាណិជ្ជកម្មមិនស្មើភាពរវាងអាមេរិកជាមួយទ្វីបអាស៊ី និងអឺរ៉ុប។ លោកសម្លឹងឃើញថាពួកគេកេងចំណេញលើអាមេរិកច្រើនពេក។ រោងចក្រផលិតដែករបស់កាណាដាព្រមានថាការដំឡើងពន្ធនឹងបន្ទច់បង្អាក់សង្វាក់ផលិតកម្មរបស់ខ្លួន។
គណៈកម្មការអឺរ៉ុបថ្លែងថាខ្លួននឹងចាត់វិធានការឆ្លើយតបដើម្បីការពារវិស័យឯកជនរបស់ខ្លួនរួមទាំងម្ចាស់អាជីវកម្ម កម្មករ និងអ្នកប្រើប្រាស់ផងដែរ។ អឺរ៉ុបចាត់ទុកថានេះជាការដំឡើងពន្ធដែលមិនសមហេតុផល។ ប្រធានាធិបតីបារាំង លោកម៉ាក្រុងយល់ថាលោកត្រូវតែជជែកទល់មុខគ្នាជាមួយលោកត្រាំឱ្យដឹងសខ្មៅម្ដងបន្ទាប់ពីលោកព្រមានដំឡើងពន្ធទៅលើទំនិញរបស់សហភាពអឺរ៉ុប។ លោកម៉ាក្រុងយល់ថាអាមេរិកគួរតែផ្ដោតសំខាន់ទៅលើប្រទេសចិនវិញល្អជាង។
រដ្ឋមន្ត្រីក្រសួងសេដ្ឋកិច្ចអាល្លឺម៉ង់យល់ថានៅក្នុងសង្គ្រាមពាណិជ្ជកម្មគ្មានភាគីណាមួយទទួលជ័យជម្នះទេ។ ចាំមើលចុះគ្រប់ភាគីត្រូវតែខាតបង់ទាំងអស់គ្នា។ អ្នកដែលរងគ្រោះយ៉ាងដំណំពីការដំឡើងពន្ធដែកថែប និងអាលុយមីញ៉ូមគឺអឺរ៉ុប។ អឹរ៉ុបនាំចេញ២៥%នៃដែករបស់ខ្លួនទៅអាមេរិក។ អង់គ្លេសក៏រងគ្រោះដែរ។ អង់គ្លេសចាត់ទុកថាការដំឡើងពន្ធនេះជាការទះកំផ្លៀងយ៉ាងដំណំ។
ប្រទេសដែលនាំដែកទៅលក់នៅអាមេរិកច្រើនជាងគេគឺកាណដាមានចំណែក៧៩%។ បន្ទាប់មកគឺប្រេស៊ីល ម៉ិកស៊ីកូ កូរ៉េខាងត្បូង និងវៀតណាម។ ឥឡូវនេះ កូរ៉េខាងត្បូងក៏កំពុងតែថ្ងូរដូចព្រាបជាបណ្ដើរៗហើយក្នុងនាមជាប្រទេសសេដ្ឋកិច្ចទី៤ប្រចាំទ្វីបអាស៊ី។ ប្រធានាធិបតីស្ដីទីកូរ៉េខាងត្បូង លោកឆយសាងម៉ុក បានអំពាវនាវនៅសប្ដាហ៍នេះទៅមន្ត្រីជាន់ខ្ពស់រដ្ឋាភិបាលដើម្បីពិនិត្យមើលផលប៉ះពាល់នៃការដំឡើងពន្ធ។ កូរ៉េខាងត្បូងនាំចេញអាលុយមីញ៉ូមប្រហែល១/៣ទៅអាមេរិក៕
ចែករំលែកព័តមាននេះ