រាជធានីភ្នំពេញ ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានអញ្ជើញចូលរួមកិច្ចប្រជុំពិនិត្យ និងពិភាក្សាលើសេចក្តីព្រាង “យុទ្ធសាស្ត្រស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨”…
រាជធានីភ្នំពេញ ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានអញ្ជើញចូលរួមកិច្ចប្រជុំពិនិត្យ និងពិភាក្សាលើសេចក្តីព្រាង “យុទ្ធសាស្ត្រស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨” ក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ច និងធុរកិច្ចឌីជីថល នាថ្ងៃទី ១៣ ខែមករា ឆ្នាំ ២០២៥ នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
កិច្ចប្រជុំនេះមានវត្តមានចូលរួមរបស់ឯកឧត្តមរដ្ឋមន្ត្រីក្រសួងពាក់ព័ន្ធជាច្រើន និងថ្នាក់ដឹកនាំជាន់ខ្ពស់តំណាងក្រសួងស្ថាប័ននានា ព្រមទាំងភាគីពាក់ព័ន្ធផ្សេងៗជាច្រើនរូប ។ កិច្ចប្រជុំនេះមានគោលបំណងពិនិត្យពិភាក្សាលើខ្លឹមសារសេចក្តីព្រាង “យុទ្ធសាស្ត្រស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨” ដែលបានរៀបចំដោយក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ច ។
នៅក្នុងកិច្ចប្រជុំនេះ លោកជំទាវទេសាភិបាល បានលើកឡើងពីសសរស្តម្ភ ៤ ក្នុងការគាំទ្រសេដ្ឋកិច្ចឌីជីថលដែលប្រទេសអភិវឌ្ឍបានប្រកាន់យករួមមាន i/- អត្តសញ្ញាណឌីជីថល ii/- ការអនុញ្ញាត និងការព្រមព្រៀង iii/- ការផ្លាស់ប្តូរទិន្នន័យ និង iv/- ប្រព័ន្ធទូទាត់ដែលមានលទ្ធភាពធ្វើប្រតិបត្តិការឆ្លងគ្នា។ បន្ថែមលើនេះ លោកជំទាវក៏បានចែករំលែកទស្សនាទាន ទាក់ទងនឹងកិច្ចការមួយចំនួនដែលក្រសួង-ស្ថាប័នរដ្ឋអាចសហការជាមួយវិស័យឯកជនបាន ដើម្បីបង្កើនប្រសិទ្ធភាពប្រតិបត្តិការសេវាកម្ម និងនិងបានស្នើពិនិត្យលទ្ធភាពបញ្ជាក់ពីគោលការណ៍ណែនាំច្បាស់លាស់អំពីការបើកលទ្ធភាពអោយមានកិច្ចសហប្រតិបត្តិការជាមួយវិស័យឯកជនក្នុងការអភិវឌ្ឍន៍សេវាអេឡិចត្រូនិចនៅក្នុងសេចក្តីព្រាងយុទ្ធសាស្ត្រ ។
ជារួម អង្គប្រជុំបានពិភាក្សាយ៉ាងផុលផុសលើខ្លឹមសារសេចក្តីព្រាងយុទ្ធសាស្ត្រនេះ និងបានលើកឡើងសំណើក៏ដូចជាសំណូមពរមួយចំនួន សំដៅពិនិត្យគ្រប់ទិដ្ឋភាពនៃដំណើរការរៀបចំឯកសារដ៏មានសារៈសំខាន់នេះ ៕ អត្ថបទសហការ
ចែករំលែកព័តមាននេះ