រាជធានីភ្នំពេញ ៖ ឯកឧត្តម នេត្រ ភក្ត្រា រដ្ឋមន្ដ្រីក្រសួងព័ត៌មាន បានចាត់ទុកកម្មវិធី “សាទរកម្ពុជា” ជាព្រឹត្តិការណ៍សាទរដល់សង្គមមួយប្រកបដោយភាពរស់រវើក បង្ហាញវិសេសភាព…
រាជធានីភ្នំពេញ ៖ ឯកឧត្តម នេត្រ ភក្ត្រា រដ្ឋមន្ដ្រីក្រសួងព័ត៌មាន បានចាត់ទុកកម្មវិធី “សាទរកម្ពុជា” ជាព្រឹត្តិការណ៍សាទរដល់សង្គមមួយប្រកបដោយភាពរស់រវើក បង្ហាញវិសេសភាព ភាពប្លែក នៃអត្តសញ្ញាណ និងតម្កើងវឌ្ឍនភាព នៃប្រទេសកម្ពុជា ហើយការរៀបចំកម្មវិធីនេះ គឺជាចរិតមហាជន ដែលមានការចូលរួមពីគ្រប់ស្រទាប់ទាំងអស់ ។
ការលើកឡើងរបស់ឯកឧត្តមរដ្ឋមន្ត្រីក្រសួងព័ត៌មានបែបនេះ ក្នុងឱកាសអញ្ជើញជាអធិបតី នៃកិច្ចប្រជុំជាមួយក្រុមការងារសហភាពសហព័ន្ធយុវជនកម្ពុជា នារសៀលថ្ងៃទី២៤ ខែធ្នូ ឆ្នាំ២០២៤ នៅទីស្តីការក្រសួងព័ត៌មាន ដើម្បីត្រៀម លក្ខណៈសម្រាប់ការផ្សព្វផ្សាយ កម្មវិធីសាទរកម្ពុជា នៅរសៀលថ្ងៃទី៣១ ខែ ធ្នូ ឆ្នាំ២០២៤ ដែលជាថ្ងៃឆ្លងឆ្នាំសកល ។
ឯកឧត្តម នេត្រ ភក្ត្រា បានជំរុញដល់ក្រុមការងារបច្ចេកទេសថតផ្សាយរបស់ទូរទស្សន៍ជាតិកម្ពុជា ទូរទស្សន៍ BTV និង Best Solution រួមសហការក្នុងការធ្វើយ៉ាងណាថតឱ្យបាន នូវគ្រប់ទិដ្ឋភាពសំខាន់ៗ ប្លែកៗ ពីព្រឹត្តការណ៍សាទរកម្ពុជា ហើយផ្សាយជារួមឱ្យបានស្អាត ច្បាស់ល្អទាំងអស់គ្នា ដើម្បីឱ្យសាធារណជនទាំងក្នុង និងក្រៅប្រទេសបានទស្សនាទាំងអស់គ្នា ។
ក្នុងឱកាសនោះ ឯកឧត្តម សុខ សប្បាយណា សមាជិកគណៈអចិន្ត្រៃយ៍គណៈកម្មាធិការកណ្តាល សហភាពសហព័ន្ធយុវជនកម្ពុជា(ស.ស.យ.ក.) និងជាសមាជិកគណៈកម្មការរៀបចំព្រឹត្តិការណ៍ «សាទរកម្ពុជា» ឬ «Celebrating Cambodia» បានជម្រាបជូនថា ការត្រៀមរៀបចំ សាទរកម្ពុជា គឺជាគំនិតផ្តួចផ្តើមឡើងដោយ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អស់រយៈពេល ៧ឆ្នាំមកហើយ ទើបសម្រេចរៀបចំឡើងនាចុងឆ្នាំ២០២៤ ខាងមុខនេះ ។
ឯកឧត្ដមបន្ដថា «ព្រឹត្តិការណ៍សាទរកម្ពុជា» នឹងរៀបចំជាលើកដំបូង ដោយសហភាពសហព័ន្ធយុវជនកម្ពុជា នារាត្រីឆ្លងឆ្នាំសកល នៅថ្ងៃទី៣១ ខែធ្នូ ឆ្នាំ២០២៤ ឆ្លងចូលឆ្នាំ២០២៥ ។
ឯកឧត្ដមបានបញ្ជាក់បន្ថែមថា ព្រឹត្តិការណ៍នេះ នឹងមានក្បួនដង្ហែ បែបវប្បធម៌ប្រពៃណី តន្ត្រីប្រជាប្រិយ ក្បួនដង្ហែសាទរកម្ពុជា រួមទាំងកម្មវិធីកម្សាន្តចម្រុះជាច្រើនទៀត អមជាមួយទីងមោង គោមយក្សដ៏ធំ ពោងយក្ស និង ទស្សនីយភាពជាច្រើន ហើយព្រឹត្តិការណ៍នេះនឹងរៀបចំឡើងនៅបរិវេណសួនច្បារមុខព្រះបរមរាជវាំង រាជធានីភ្នំពេញ ។
សូមជម្រាបជូនថា កម្មវិធី «សាទរកម្ពុជា» ត្រូវបានផ្តួចផ្តើមឡើងក្នុងគោលបំណងផ្សារភ្ជាប់ប្រជាជនទៅសង្គមជាតិទាំងមូល ដែលក្នុងនោះ តាមរយៈការរៀបចំព្រឹត្តិការណ៍ និងកម្មវិធីនានា ហើយជាការបង្ហាញក្នុងនាមជាប្រជាជាតិមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរពេញដោយក្តីសង្ឃឹម និងមានភាពជឿជាក់រួមគ្នាឆ្ពោះទៅកាន់អនាគតដ៏រុងរឿងរបស់ជាតិយើង ។
ព្រឹត្តការណ៍នេះ ផ្តល់ជាវេទិកា និងឱកាសដល់គ្រប់កោសិកា គ្រប់ស្រទាប់វណ្ណៈ គ្រប់សហគមន៍ និងមជ្ឈដ្ឋានផ្សេងៗ នៃសង្គម បង្ហាញនូវមោទនភាពចំពោះអត្តសញ្ញាណរបស់ខ្លួន និងជាពិសេសចំពោះអត្តសញ្ញាណជាតិជារួមដែលជាអ្វីធ្វើឱ្យខ្លួនយើងមានមោទនភាព ក្រោម “ទង់នៃព្រះរាជាណាចក្រកម្ពុជា” ដោយការរួបរួមសាមគ្គី ឯកភាពទៅជាកម្លាំងជាតិតែមួយ ។ ទន្ទឹមនេះ បង្កើនមនោសញ្ចេតនារវាងប្រជាជន និងនៃប្រជាជាតិកម្ពុជា ទោះនៅក្នុងប្រទេស ឬនៅឯនាយសមុទ្រ ក្នុងការអបអរសាទរ ក្នុងនាមជាមហាគ្រួសារខ្មែរតែមួយ នៅក្រោមទង់ជាតិតែមួយ ហើយដែលមានអនាគតតែមួយដើម្បីកម្ពុជា ៕
ចែករំលែកព័តមាននេះ