ខេត្ត​បន្ទាយមានជ័យ ៖ ប្រជាកសិករប្រមូលផលដំឡូងកៃពឹង ឬដំឡូងចិន នៅភូមិគោកអំពិល ឃុំអូរប្រាសាទ ស្រុកមង្គលបូរី ក្នុង​ឆ្នាំនេះ​ ទទួលទិន្នផលខ្ពស់ ដោយ​ក្នុង១រ៉ៃ (ស្មើនឹង៤០ម៉ែត្របួនជ្រុង) ទទួលផលបានពី​៤ទៅ៥តោន ​និងលក់ក្នុង​​តំលៃល្អប្រសើរជាងឆ្នាំមុន ។​

ប្រជាកសិករបានប្រាប់ថា ដំឡូង(កៃពឹង ឬដំឡូងចិន)នៅឆ្នាំនេះ ឈ្មួញមកទិញដល់ចំការក្នុង១គីឡូក្រាមលក់តំលៃ២.០០០ទៅ២.៥០០រៀលបើប្រៀបធៀបកាលឆ្នាំមុន១គីឡូក្រាមលក់បានតំលៃ១.០០០ទៅ១.៥០០រៀល ។ ដោយសារតែលក់បានតម្លៃខ្ពស់ជាងឆ្នាំមុន បាន​ធ្វើអោយប្រជាកសិករមានអារម្មណ៍​សប្បាយចិត្ត ​និងអាចផ្គត់ផ្គង់​ជីវភាពគ្រួសារ កាត់បន្ថយការ​ចំណាកស្រុក។

ប្រជាកសិករបានបញ្ជាក់ថា ដំឡូង(កៃពឹងរឺដំឡូងចិន)ដាំរយៈពេល១រដូវពេញទទួលផលបានឆ្នាំនេះជាមធ្យម១រ៉ៃស្មើ៤០ម៉ែត្របួន​ជ្រុង​​ ទទួលផលបានពី៤ទៅ៥តោន បើប្រៀបធៀបធ្វើស្រែគឺល្អ​ប្រសើរជាង តែបើធ្វើស្រែ ក្នុង​១រដូវ ស្រូវមិនប្រកាន់រដូវបាន២ដង ។ តែការដាំដំឡូងកៃពឹង​​ ឬដំឡូង​ចិន​១ឆ្នាំទទួលផលបានតែ១ដង ដែលមើលថែដាក់ទឹក បាញ់ថ្នាំ បោចស្មៅ៣ទៅ៤ដង ទើបទទួល​បានផល​ល្អ ។

ប្រជាកសិករបញ្ជាក់ថា ដំឡូងកៃពឹងបើដាំបានផលល្អ ក្នុង​១មើម មានទម្ងន់២គីឡូក្រាម ជាមធ្យម២​ទៅ​៣មើម​ មានទម្ងន់​១គីឡូក្រាម ហើយមើមតូចៗអាចលក់សម្រាប់ធ្វើពូជ ដែលគេ​ទិញយកទៅដាំ ហើយដំឡូងកៃពឹង ឬ​ដំឡូងចិន នេះអាចទិញយកទៅ​ស្ងោរ​លក់តាមទីផ្សារនិងសាលារៀន រឺចៀនលក់ ឬធ្វើបង្អែម ឬ​ស្លរ ឬយកទៅ​ធ្វើអ្វីផ្សេងៗទៀត​ក៏បានតាមតម្រូវការ​។

មន្ត្រីកសិកម្មខេត្តបន្ទាយមានជ័យប្រាប់ថា ដំឡូងកៃពឹងរឺដំឡូងចិននេះប្រជាកសិករដែលពេញនិយមដាំមាននៅស្រុកមង្គលបូរីនិងសិរីសោភ័ណដែលមានផ្ទៃដីប្រមាណជាង១០០ហិកតាទេព្រោះផលដំឡូងនេះសម្រាប់លក់បានក្នុងទីផ្សារក្នុងស្រុកដែលជាដំណាំដែលប្រជាកសិករទំនេរពីធ្វើស្រែ​ឆ្លៀត​មកធ្វើចំការ ៕