រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ជាថ្មីថា កម្ពុជាមិនចូលរួមដាច់ខាតជាមួយយន្តការដែលមានគំនិតប្រឆាំង ឬផ្តួលរំលំប្រទេសណាមួយនោះទេ គឺកម្ពុជាប្រកាន់យកសន្តិភាពជានិច្ច ។…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ជាថ្មីថា កម្ពុជាមិនចូលរួមដាច់ខាតជាមួយយន្តការដែលមានគំនិតប្រឆាំង ឬផ្តួលរំលំប្រទេសណាមួយនោះទេ គឺកម្ពុជាប្រកាន់យកសន្តិភាពជានិច្ច ។
ថ្លែងក្នុងពិធី «ព្រឹត្តិការណ៍អបអរសាទរខួប២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្មពិភពលោក» នាព្រឹកថ្ងៃទី១៤ ខែតុលា ឆ្នាំ២០២៤ នៅសណ្ឋាគារសុខាភ្នំពេញ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់យ៉ាងដូ ច្នេះថា ៖ «ខ្ញុំសូមបញ្ជាក់ថា ឥឡូវនេះ មានយន្តការច្រើនដែលពិសេសនោះ នៅក្នុងតំបន់របស់យើង ដោយមានយន្តការខ្លះបង្កើត គឺមិនពាក់ព័ន្ធ ឬពាក់ព័ន្ធតិចតួច ដែលបង្កើតឡើងមានចរិតនយោបាយសន្តិសុខសង្គម ដែលអាចប៉ះពាល់ដល់នយោបាយអធ្យាក្រឹត្យរបស់យើង ហើយសុំបញ្ជាក់ថា កម្ពុជាមិនចូលរួមជាមួយយន្តការណាដែលមានចរិតនយោបាយដែលបង្កើតឡើង ដើម្បីប្រកួតប្រជែង ឬប្រឆាំងនឹងប្រទេសណាមួយនោះទេ» ។
សម្តេចមហាបវរធិបតី នាយករដ្ឋមន្ត្រីបានបន្តថា កម្ពុជានឹងចូលរួមជាមួយប្លុក ឬយន្តការដែលមានទិសដៅរួម ដែលមានគោលបំណងបង្កើតឡើងក្នុងការថែរក្សាសុខដុរមនីយកម្មសន្តិភាព វិបុលភាព សង្គមនៅក្នុងតំបន់ ។ ជំរុញការអភិវឌ្ឍរួមគ្នាជាពិសេសសេដ្ឋកិច្ច និងយន្តការថែរក្សា សន្តិភាព នៅក្នុងតំបន់ ព្រោះថា កម្ពុជាត្រូវការសន្តិភាព ។ សម្តេចមហាបវរធិបតី ប្រមុខរាជរដ្ឋាភិបាលក៏បានអះអាងថា សន្តិភាពផ្ទៃក្នុងប្រទេសរបស់កម្ពុជាត្រូវ តែថែរក្សាឲ្យបាន ប៉ុន្តែសន្តិភាពនៅក្នុងតំបន់ក៏ចាំបាច់ក្នុងការថែរក្សាផងដែរ ។ ព្រោះថាវាក៏បានជាប់ពាក់ព័ន្ធនឹងកម្ពុជាផងដែរ ។
ជាមួយគ្នានោះដែរ សម្តេចធិបតីក៏បានលើកបញ្ជាក់ជាក់ស្តែងថា គ្រាន់មានសង្គ្រាមនៅប្រទេសអ៊ុយក្រែន ជាមួយរុស្ស៊ីតម្លៃអង្ក ស្រូវ ប្រេងក៏បានឡើងថ្លៃផងដែរ ។ ហើយគ្រាន់តែវៃគ្នានៅមជ្ឈឹមបូព៌ា កប៉ាល់ដឹកទំនិញនៅតាមសមុទ្រក្រហមក៏បានឡើងថ្លៃ ។
សម្តេចធិបតីគូសបញ្ជាក់ថា ៖«គ្រាន់តែបញ្ហានេះយើងមានការលំបាក ទម្រាំមានបញ្ហានៅក្នុងតំបន់ទៀត តើវាទឹកជាយ៉ាងណា គឺវាប៉ះពាល់ដល់ប្រជាពលរដ្ឋយើងតែម្តង ។ អីញ្ចឹង សម្រាប់កម្ពុជាជាសមាជិករបស់អង្កការសហប្រជាជាតិមួយ និងជាសមាជិករបស់អាស៊ានយើង ចូលរួមជាមួយយន្តការដែលបង្កើតឡើងដែលមិនប្រឆាំង និងប្លុកណា ឬប្រទេសមិនប្រកួតប្រជែង តែជាសមារហណកម្ម ដើម្បីបំពេញឲ្យគ្នា ពិសេសជំរុញការអភិវឌ្ឍសេដ្ឋកិច្ចរួមគ្នាថែរក្សា សន្តិភាព ស្ថេរភាពសង្គម»។
សម្តេចមហាបវរធិបតី នាយករដ្ឋមន្ត្រីកម្ពុជា ក៏បានលើកឡើងថា កម្ពុជានឹងធ្វើការស្វែងយល់ និងពង្រីកលទ្ធភាពនូវគ្រប់វិស័យ ដើម្បីធ្វើការប្រទាក់ក្រឡាបន្ថែមទៀតដែលចំណុចនេះគ្រប់ក្រសួង ស្ថាប័ន ត្រូវតែធ្វើទាំងអស់គ្នាដោយមិនគិតថា យន្តការសេដ្ឋកិច្ច ពាណិជ្ជកម្ម នយោបាយនោះទេ ។
សម្តេចធិបតីប្រមុខរាជរដ្ឋាភិបាលក៏បានសង្កត់ធ្ងន់ថា ៖«យន្តការបង្កើតដើម្បីប្រឆាំងនឹងឧក្រិ.ដ្ឋកម្ម ឆ្លងដែន…នោះយើងចូលរួម ប៉ុន្តែបើយន្តការបង្កើតឡើង ដើម្បីប្រឆាំងជាមួយអ្នកនេះជាមួយអ្នកនោះយើងមិនចូលរួមជាដាច់ខាត ។ យើងនៅតែបន្តចូលរួមជាសមាជិកមួយនៃ អង្កការសហប្រជាជាតិ និងអាស៊ានដែលអង្កការមួយក្នុងការចូលរួមថែរក្សា សុខសន្តិភាពស្ថេរភាពនៅក្នុងតំបន់» ៕
ចែករំលែកព័តមាននេះ