ខេត្តត្បូងឃ្មុំ ៖ រថយន្តធុនធំពីរគ្រឿងបានពន្លះគ្នាយ៉ាងពេញទំហឹងនៅលើកំណត់ផ្លូវជាតិលេខ៧១«c»ត្រង់ចំណុចអណ្ដូងខួច ស្ថិតនៅភូមិព្រះអង្គ ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ នៅវេលាម៉ោង៤និង៣០នាទីយប់ទៀតភ្លឺ ឈានចូលព្រឹកថ្ងៃទី១៤ មិថុនា ឆ្នាំ២០២៤ ។
ដោយសំឡេងបុកលាន់ឮយ៉ាងខ្លាំង ជាហេតុធ្វើឲ្យមនុស្សជិះលើរថយន្តទាំងសងខាងស្លា.ប់ភ្លាមៗចំនួនប្រាំនាក់ ហើយត្រូវបានកម្លាំងសមត្ថកិច្ចចុះអន្តរាគមន៍ហៅរថយន្តមកសង្គ្រោះដឹកទៅមន្ទីរពេទ្យចំនួន៣នាក់ តែគ្រោះអកុសលបានស្លា.ប់ចំនួនពីរនាក់បន្ថែមទៀតនេះជាហេតុការណ៍ពុំដែលកើតមានទាល់តែសោះនៅលើកំណត់ផ្លូវជាតិនេះ ។
លោកឧត្តមសេនីយ៍ត្រីចិន នី ស្នងការនគរបាលខេត្តត្បូងឃ្មុំបានឲ្យដឹងថា ហេតុការណ៍គ្រោះថ្នាក់ចរាចរណ៍ដ៏រន្ធត់នេះ រវាងរថយន្ត និងរថយន្ត គឺរថយន្តម៉ាកហុីយុនដាយ ពណ៌ស ពាក់ផ្លាកលេខ កំពង់ធំ 3A-3053 បើកបរដោយឈ្មោះ ឈាង ហ៊ាង ភេទប្រុស អាយុ១៨ឆ្នាំ ជនជាតិខ្មែរ រស់នៅភូមិសំរោង ឃុំទំរីង ស្រុកសណ្តាន់ ខេត្តកំពង់ធំ (របួសធ្ងន់) បានដឹកឈ្មោះ រឿង សារឿន ភេទប្រុស អាយុ២៣ឆ្នាំ ជនជាតិខ្មែរ នៅភូមិឃុំជាមួយគ្នា(របួសធ្ងន់) ។
ករណីនេះបង្កជាមួយរថយន្តម៉ាកហុីយុនដាយ ពណ៌ទឹកប្រាក់ ពាក់ផ្លាកលេខ ត្បូងឃ្មុំ 3A-4487 មិនស្គាល់ឈ្មោះ និងអាស័យដ្ឋានអ្នកបើកបរ (ស្លា.ប់នៅកន្លែងកើតហេតុ) ។
លោកឧត្តមសេនីយ៍ស្នងការ បានបន្តឲ្យដឹងទៀតថា មុនពេលកើតហេតុ រថយន្តទាំងពីរគ្រឿងបានបើកបរក្នុងទិសដៅផ្ទុយគ្នា រថយន្តពាក់ផ្លាកលេខ កំពង់ធំ បើកបរមកពីជើងទៅត្បូងប្រើប្រាស់ល្បឿន ទៅបុករថយន្តពាក់ផ្លាកលេខត្បូងឃ្មុំ បើកបរមកពីត្បូងទៅជើងដែលដឹកកម្មករសរុបទាំងអ្នកបើកបរចំនួន៦នាក់ ។
សរុបមនុស្សចំនួន០៨នាក់ ប្រុស (ស្លា.ប់ចំនួន០៥នាក់ នៅកន្លែងកើតហេតុ) របួសធ្ងន់ចំនួន០៣នាក់ បានបញ្ជូនទៅដល់មន្ទីរមិត្តភាពកម្ពុជា-ចិន ( បានស្លា.ប់ចំនួន ០២នាក់ទៀត ) ។
មូលហេតុ: ប្រើប្រាស់ល្បឿន ។ ចំពោះការខូចខាត មានរថយន្ដ ២គ្រឿង កម្រិតធ្ងន់ ។ ក្រោយកើតហេតុកម្លាំងនគរបាលចរាចរណ៍ស្រុកត្បូងឃ្មុំបានចុះទៅដល់កន្លែងកើតខេត្ត ដើម្បីជួយអន្តរាគមន៍អ្នករងរបួសប្រញាប់ប្រញាល់ហៅរថយន្តមកដឹកសង្គ្រោះទៅមន្ទីរពេទ្យ។
រហូតមកដល់ព្រឹកថ្ងៃទី១៤ មិថុនា កម្លាំងជំនាញសណ្ដាប់ធ្នាប់បានកំពុងតែធ្វើចរាចរណ៍ដើម្បីបញ្ជៀសកុំឲ្យមានភាពកកស្ទះ និងបានហៅរថយន្តមកស្ទូចយករថយន្តអូសទៅរក្សាទុកជាបណ្ដោះអាសន្ននៅអធិការដ្ឋាននគរបាលស្រុកត្បូងឃ្មុំ ។
បើតាមនគរបាលចរាចរណ៍ស្រុកត្បូងឃ្មុំវិញ បញ្ជាក់ថា ក្រោយពីមានហេតុការណ៍នេះកើតឡើង លោកព្រះរាជអាជ្ញាអមសាលាដំបូងខេត្តត្បូងឃ្មុំបានចុះមកពិនិត្យមើលដល់កន្លែងកើតហេតុ ដើម្បីឲ្យដឹងការពិតករណីគ្រោះថ្នាក់ចរាចរណ៍នេះ ភាគីរថយន្តណាមួយជាអ្នកបង្កឈានដល់គ្រោះថ្នាក់ស្លា.ប់មនុស្សកើនរហូតដល់៧នាក់យ៉ាងដូច្នេះ ៕
ចែករំលែកព័តមាននេះ