ខេត្តកំពង់ធំ ៖ ទូកមួយគ្រឿង ពេលកំពុងចម្លងសិស្សសាលាមួយក្រុម(ចំនួន១៥នាក់) ចេញពីសាលាទៅផ្ទះ បានលិចនៅកណ្ដាលទឹកស្ទឹងសែន បណ្តាលឲ្យស្លា.ប់សិស្សស្រីម្នាក់ អាយុ១៣ឆ្នាំ និងសិស្ស១៤នាក់ទៀត ហែលទឹកឡើងគោករួចផុតជីវិត ។
ឧបទ្ទវហេតុលិចទូកនេះ កើតឡើងនាវេលាម៉ោងជាង១១ព្រឹកថ្ងៃទី៨ ខែមិថុនា ឆ្នាំ២០២៤ ស្ថិតនៅឃុំឈូក ស្រុកប្រាសាទសំបូរ ខេត្តកំពង់ធំ ។
សាក្សីនៅកន្លែងកើតហេតុ បានឲ្យដឹងថា នៅពេលដែលសិស្សទាំងអស់ កំពុងជិះទូកឆ្លងស្ទឹងសែន ដល់ចំណុចកណ្ដាលស្ទឹង ស្រាប់តែទូកបានលិចចូលក្នុងទឹកតែម្ដង(មានវីដេអូ) ពេលនោះ សិស្សទាំងអស់នាំគ្នា លោតហែលមកច្រាំងស្ទឹងអស់ គឺបាត់តែកុមារី អាយុ ១៣ឆ្នាំ ម្នាក់ តែប៉ុណ្ណោះ ។
សាក្សីបន្តថា កូនសិស្សចំនួន១៥នាក់នេះ បានជិះទូកចម្លងរាល់ថ្ងៃ ទាំងទៅសាលារៀន និងចេញពីសាលាទៅផ្ទះ តែអកុសល នៅថ្ងៃនេះ ទូកបានលិច តែម្តង ។
បើតាមលោក ឃឹម សុឃាង អធិបាលស្រុកប្រាសាទសំបូរ បានអោយដឹងថា ក្រោយទទួលបានព័ត៌មាននេះភ្លាម លោកបានចាត់ចែងកម្លាំងអន្តរាគមន៍ជួយក្មេងៗ ភ្លាមៗ ប៉ុន្តែគួរឲ្យសោកស្ដាយ ដែលសិស្សម្នាក់ បានបាត់បង់ជីវិតទៅហើយ ។
លោកអធិបាលស្រុកប្រាសាទសំបូរ ក៏បានឲ្យដឹងដែរថា ការលិចទូកនោះ កើតឡើងដោយសារសិស្សជិះច្រើននាក់ និងអ្នកបើកបរទូកចម្លងលឿន ហើយនៅពេល ដែលស្ថានភាពទូកលិច សិស្សក៏ចាប់ផ្ដើមជ្រួលច្របល់ ធ្វើឲ្យមានការប្រទាញប្រទង់ លិចតែម្តង ។
ដោយឡែក លោកវរសេនីយ៍ឯក ឃួន វុទ្ធី អធិការនគរបាលស្រុកប្រាទសំបូរ បានប្រាប់ដែរថា ករណីលិចទូកចម្លងនេះ កើតឡើងនៅកំពុងចម្លងចន្លោះភូមិត្នោតជួរ និងភូមិឈូក ក្នុងអំឡុងពេល ដែលសិស្សានុសិស្សចេញពីរៀន នៅអនុវិទ្យាល័យឈូក ស្ថិតនៅភូមិឈួកគ្រោះ ឃុំឈូក ស្រុកប្រាសាទសំបូរ ។
លោកបន្តថា សិស្សសាលា ដែលជិះនៅលើទូកនោះ មានចំនួនសរុប១៥នាក់ (ស្រី១០នាក់) រៀនថ្នាក់ផ្សេងគ្នា មានថ្នាក់ទី៧ ថ្នាក់ទី៨ និងថ្នាក់ទី៩ ផងដែរ ។
លោកបន្ថែមថា ម្ចាស់ជាអ្នកចម្លង ឈ្មោះ សឿ យូន ភេទស្រីអាយុ៤០ឆ្នាំ រស់នៅភូមិជាំបឹង ឃុំស្រើង ស្រុកប្រាសាទសំបូរ ក្នុងអំឡុងពេលទូកនេះ ចេញដំណើរពីត្រើយខាងលិច ទៅត្រើយខាងកើត នៅពេលជិតដល់ច្រាំងចម្ងាយប្រហែល១០ម៉ែត្រ ការណូតពន្លត់ម៉ាស៊ីន ហើយរួមជាមួយអ្នកជិះនៅមិនស្ងៀម ក៏បណ្តាលឲ្យទូកលិចផ្នែកខាងមុខ នៅពេលនោះ សិស្សចាប់ផ្តើមភ័យស្លន់ស្លោរ លោតចូលទឹកតែម្តង ។
លោកបញ្ជាក់ថា ក្នុងចំណោមអ្នកជិះទាំង១៥នាក់ មានអ្នកមិនចេះហែលទឹក ចំនួនពីរនាក់ ប៉ុន្តែត្រូវបានប្រជាពលរដ្ឋ និងអ្នករួមដំណើរជួយសង្គ្រោះទាន់ពេលបានម្នាក់ឈ្មោះ ធឿន ស្រីពេជ្រ រៀនថ្នាក់ទី៧ ។ រីឯកុមារីរងគ្រោះមានឈ្មោះ អ៊ីន សុភ័ក្រ អាយុ១៣ឆ្នាំ រៀនថ្នាក់ទី៧ រស់នៅភូមិជាំបឹងឃុំស្រើង ស្រុកប្រាសាទសំបូរ បានលិចបាត់តែម្តង ។
សពកុមារីរងគ្រោះ ត្រូវបានប្រជាពលរដ្ឋពលរដ្ឋ រួមនិងកម្លាំងនគរបាល បានស្វែងរកឃើញ ចម្ងាយប្រហែល១០០ម៉ែត្រ ពីទីតាំងកើតហេតុ នៅម៉ោងជិត១រសៀលថ្ងៃដដែល ។ ក្រោមពីធ្វើការពិនិត្យស.ពរួច បានប្រគល់ជូនគ្រួសារ ដើម្បីយកទៅធ្វើបុណ្យតាមប្រពៃណី ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ