ADផ្ទាំងផ្សព្វផ្សាយពាណិជ្ជកម្ម

ប្រទេសចិនចុះត្រជាក់ដល់-៤០អង្សាក្រោមសូន្យដូចមហាសមុទ្ទទឹកកក

11 ខែ មុន

២៦ ខែ ធ្នូ ឆ្នាំ ២០២៣ ម៉ោង ០៤:៤១

ទីក្រុងប៉េកាំង៖ អាកាសធាតុត្រជាក់ខ្លាំងបន្តគ្របដណ្ដប់ទៅលើទីក្រុងប៉េកាំង និងធ្វើឱ្យទីក្រុងនេះចុះត្រជាក់ខ្លាំងជាងពេលណាៗទាំងអស់គិតចាប់តាំងពីឆ្នាំ១៩៥១។ ជាទូទៅនៅប្រទេសចិនសម្រាប់ពេលនេះ នៅទីណាក៏មានសីតុណ្ហភាពក្រោមសូន្យអង្សាទាំងអស់។ បើនិយាយពីភាគខាងជើង និងភាគឦសានវិញមិនបាច់ថ្លែងតែម្ដង។ តំបន់ទាំងនោះចុះត្រជាក់ខ្លាំងតាំងពីសប្ដាហ៍មុន។ កន្លែងខ្លះនៅភាគឦសានចុះត្រជាក់ដល់ដកសែសិបអង្សាក្រោមសូន្យ (-40)។…

ទីក្រុងប៉េកាំង៖ អាកាសធាតុត្រជាក់ខ្លាំងបន្តគ្របដណ្ដប់ទៅលើទីក្រុងប៉េកាំង និងធ្វើឱ្យទីក្រុងនេះចុះត្រជាក់ខ្លាំងជាងពេលណាៗទាំងអស់គិតចាប់តាំងពីឆ្នាំ១៩៥១។ ជាទូទៅនៅប្រទេសចិនសម្រាប់ពេលនេះ នៅទីណាក៏មានសីតុណ្ហភាពក្រោមសូន្យអង្សាទាំងអស់។ បើនិយាយពីភាគខាងជើង និងភាគឦសានវិញមិនបាច់ថ្លែងតែម្ដង។ តំបន់ទាំងនោះចុះត្រជាក់ខ្លាំងតាំងពីសប្ដាហ៍មុន។ កន្លែងខ្លះនៅភាគឦសានចុះត្រជាក់ដល់ដកសែសិបអង្សាក្រោមសូន្យ (-40)។ ពេលខ្លះត្រជាក់ខ្លាំងជាងនេះទៀតក៏មានដោយសារខ្យល់ត្រជាក់ដល់កម្រិតកំពូលបក់មកឥតដាច់ពីមហាសមុទ្ទទឹកកកអាកទិច (Arctic)។

យោងតាមកំណត់ត្រារបស់ការិយាល័យឧតុនិយមប្រចាំទីក្រុងប៉េកាំង, ចាប់តាំងពីថ្ងៃទី១១ ខែធ្នូ រហូតដល់យប់ថ្ងៃអាទិត្យ សីតុណ្ហភាពក្រោមសូន្យអង្សាកើតមានរយៈពេលលើសពី៣រយម៉ោង។ អាចនិយាយបានថាប្រទេសចិនចុះត្រជាក់ខ្លាំងលើសពេលណាៗទាំងអស់គិតចាប់តាំងពីឆ្នាំ១៩៥១។ គិតទៅជាង៧០ឆ្នាំហើយទើបតែម្ដងនេះទេដែលត្រជាក់ហួសកម្រិត។ បើនិយាយអំពីទីក្រុងប៉េកាំងវិញមិនបាច់ថ្លែងតែម្ដង។ ដប់ថ្ងៃចុងក្រោយនេះ ប៉េកាំងចុះត្រជាក់ក្រោមសូន្យអង្សាជានិច្ច។

នៅតាមទីក្រុងតូច-ធំមួយចំនួននៃប្រទេសចិនដូចជានៅខេត្តហឺណាន (Henan) ជាដើមកំពុងប្រឈមនឹងបញ្ហាខ្វះខាតឥន្ធនៈសម្រាប់ដុតកម្ដៅខ្លួនឱ្យបាត់រងា។ នៅទីក្រុងជាវសួ (Jiaozuo) រោងចក្រកំពុងតែរត់ប្រណាំងនឹងពេលវេលាដើម្បីផលិតថាមពលអគ្គិសនីឱ្យទាន់តម្រូវការ។ នៅជាវសួដដែល រោងចក្រផលិតទឹកក្ដៅដ៏ធំមួយដល់ពេលខំផលិតខ្លាំងពេកឡើងខូចខ្ទេចខ្ទីអស់រលីងទៅហើយ ហើយធ្វើឱ្យអ្នករស់នៅតំបន់ខ្លះនៅហេលហាលមិនដឹងថាត្រូវរកអ្វីមកកម្ដៅខ្លួន។

គេរំពឹងថាបន្ទាប់ពីក្រុមអ្នកបច្ចេកទេសខិតខំជួសជុលយ៉ាងដុតដៃដុតជើង យ៉ាងយូរត្រឹមថ្ងៃទី២៦ ខែធ្នូអាចដំណើរការឡើងវិញបានហើយ។ ទីក្រុងជាវសួនឹងផ្អាកការផ្គត់ផ្គង់អគ្គិសនីសម្រាប់វិស័យជំនួញភាគច្រើន លើកលែងតែសេវាកម្មដែលចាំបាច់ខ្លាំងមែនទែនដល់ថ្នាក់មិនអាចខ្វះបាន។ ឧទាហរណ៍ដូចជានៅតាមមន្ទីរពេទ្យ និងមណ្ឌលសម្រាប់មនុស្សចាស់ជរា។

ធ្វើបែបនេះដើម្បីបម្រុងទុកភ្លើងអគ្គិសនីសម្រាប់ប្រើប្រាស់ឱ្យបានគ្រប់គ្រាន់នៅតាមគេហដ្ឋានរបស់បងប្អូនប្រជាពលរដ្ឋដែលកំពុងតែត្រជាក់ខ្លាំងណាស់ ទោះបីពួកគេខំដណ្ដប់ភួយប៉ុន្មានជាន់ក៏មិនបាត់រងាដែរបើសីតុណ្ហភាពត្រជាក់ដូចនៅមហាសមុទ្ទទឹកកកបែបនេះនោះ។ ទីក្រុងពូយីង និងភីងឌីងសាន (Puyang & Pingdingshan) នៅខេត្តហឺណានសម្រេចផ្អាកផ្គត់ផ្គង់អគ្គិសនីសម្រាប់ស្ថាប័នរបស់រដ្ឋដើម្បីទាញភ្លើងយកទៅផ្គត់ផ្គង់នៅតាមផ្ទះរបស់ប្រជាពលរដ្ឋមួយសំណើសិន។

យោងតាមការសង្កេតរបស់ការិយាល័យឧតុនិយមចិន, ទីក្រុងទាំងបីនៃខេត្តហឺណានដូចរៀបរាប់អម្បាញ់មិញនេះគឺជាវសួ, ពូយីង និងភីងឌីងសាន ចុះត្រជាក់ដល់ក្រោមសូន្យអង្សាកាលពីថ្ងៃអាទិត្យ។ ចំណែកតំបន់ដទៃទៀតនៃខេត្តដដែលនេះរឹតតែត្រជាក់ជាងនេះទៅទៀត។ កន្លែងខ្លះចុះត្រជាក់ដល់ដក១៥អង្សាក្រោមសូន្យកាលពីចុងសប្ដាហ៍។ គេរំពឹងថាមិនយូរទេបញ្ហាដ៏លំបាកនេះអាចនឹងជួយសម្រាលបន្ទុកបានខ្លះៗនៅពេលខ្យល់ក្ដៅឧុណ្ហបក់មកពីភាគខាងជើងទៅភាគខាងត្បូង។

គិតត្រឹមម៉ោង២រសៀលថ្ងៃអាទិត្យ, ប្រទេសចិនភាគកណ្ដាល និងភាគខាងកើតមិនសូវត្រជាក់ខ្លាំងពេកទេ។ នៅតំបន់ខ្លះ សីតុណ្ហភាពក្រោមសូន្យអង្សាបានហក់ឡើងខ្ពស់ដល់លើសូន្យអង្សាវិញ។ តំបន់ខ្លះត្រជាក់ត្រឹម១០អង្សា។ នេះបើយោងតាមការប្រកាសឱ្យដឹងរបស់ការិយាល័យឧតុនិយមចិន៕

ប្រភព៖ Channel News Asia
https://www.channelnewsasia.com/asia/china-beijing-cold-weather-sub-zero-historic-lows-blizzards-henan-winter-heating-4009381