កំពូលតារា K-Pop «G-Dragon» ត្រូវប៉ូលិសសាកសួរពាក់ព័ន្ធការប្រើប្រាស់គ្រឿងញៀ.ន
កូរ៉េខាងត្បូង ៖ កំពូលតារាចម្រៀងប្រុសដ៏ល្បីឈ្មោះរបស់កូរ៉េខាងត្បូង G-Dragon កាលពីថ្ងៃទី៦
កូរ៉េខាងត្បូង ៖ កំពូលតារាចម្រៀងប្រុសដ៏ល្បីឈ្មោះរបស់កូរ៉េខាងត្បូង G-Dragon កាលពីថ្ងៃទី៦ ខែវិច្ឆិកា ឆ្នាំ២០២៣ បានបង្ហាញខ្លួនសម្រាប់ការសាកសួររបស់ប៉ូលិស ជុំវិញការចោទប្រកាន់ពីបទប្រើប្រាស់គ្រឿងញៀ.ន ហើយនេះក៏ជាករណ៍ចុងក្រោយបំផុតរបស់ក្រុមសិល្បករកូរ៉េខាងត្បូងខេប៉ុប K-pop ដែលជាប់ពាក់ព័ន្ធនៅក្នុងសំណុំរឿងគ្រឿងញៀ.ន។
ការស៊ើបអង្កេតប្រឆាំងតារាចម្រៀងរ៉េប G-Dragon ដែលមានឈ្មោះពិតថា Kwon Ji-yong កើតឡើងចំពេលមានការបង្ក្រាបគ្រឿងញៀនខុសច្បាប់ ដោយរដ្ឋាភិបាលរបស់ប្រធានាធិបតីអភិរក្សនិយម លោក Yoon Suk Yeol ហើយបន្ទាប់ពីការចោទប្រកាន់ កាលពីចុងខែតុលាកន្លងទៅ ភាគហ៊ុនរបស់ទីភ្នាក់ងារ K-pop មួយចំនួន រួមទាំងអតីតភ្នាក់ងារផលិតកម្ម YG Entertainment ដែល G-Dragon ធ្លាប់រួមរស់ជាមួយបានធ្លាក់ចុះយ៉ាងខ្លាំង។
G-Dragon ឬ G.D អាយុ៣៥ឆ្នាំ បានបដិសេធថា មិនបានប្រព្រឹត្តខុសអ្វីទាំងអស់ ព្រមទាំងបានឆ្លើយរាល់សំណួររបស់ប៉ូលិស ហើយថែមទាំងបានអះអាងថា រូបគេមកផ្តល់ចម្លើយសម្រាប់ប៉ូលិស ដើម្បីជម្រះមន្ទិលមកលើរូបគេ។ តារាប្រុសសមាជិកក្រុមដ៏ល្បីរបស់កូរ៉េខាងត្បូង BIGBANG រូបនេះ បានបញ្ជាក់នៅពេលត្រូវបានសួរថា តើលោកបានប្រើប្រាស់គ្រឿងញៀនខុសច្បាប់ដែរឬទេ?រូបគេបានឆ្លើយថា «គ្មានការពិតទេ ចំពោះការចោទប្រកាន់ពីបទល្មើសគ្រឿងញៀនខុសច្បាប់»។
ការចាប់ខ្លួនតារាល្បីកូរ៉េខាងត្បូង កើតឡើងជាបន្តបន្ទាប់នៅក្នុងប៉ុន្មានខែថ្មីៗនេះ លើបទចោទប្រកាន់គ្រឿងញៀន ដែលបានជំរុញអាជ្ញាធរបង្កើនការបង្ក្រាបគ្រឿងញៀ.ន និងអធិការកិច្ចគយ។ ប្រទេសកូរ៉េខាងត្បូងមានច្បាប់តឹងរ៉ឹងចំពោះគ្រឿងញៀន ហើយឧក្រិដ្ឋកម្មជាធម្មតាត្រូវផ្តន្ទាទោសដាក់ពន្ធនាគារយ៉ាងតិច ៦ខែ ឬរហូតដល់ ១៤ឆ្នាំសម្រាប់ជនល្មើស និងអ្នកជួញដូរ។
G-Dragon មិនមែនជាសមាជិកដំបូងរបស់ក្រុម BIGBANG ដែលប្រឈមនឹងការចោទប្រកាន់ព្រហ្មទណ្ឌនោះទេ ជាក់ស្តែងក្នុងឆ្នាំ ២០១៧ T.O.P. ដែលមានឈ្មោះពិតថា Choi Seung-hyun ទទួលការព្យួរទោសដាក់ពន្ធនាគាររយៈពេល១០ខែពីបទប្រើប្រាស់កញ្ឆា បន្ទាប់ពីរូបគេបានសារភាពកំហុស និងស្វែងរកការបន្ធូរបន្ថយគេចពីការជាប់ពន្ធនាគារ។ នៅក្នុងឆ្នាំ ២០២១ Seungri ដែលមានឈ្មោះពិតថា Lee Seung-hyun ត្រូវបានកាត់ទោសពីបទឃុបឃិតក្នុងការគេចពន្ធ គម្រោងសូកប៉ាន់ និងពេស្យាចារ ហើយត្រូវបានកាត់ទោសជាប់ពន្ធនាគាររយៈពេល១៨ខែ។
សូមជម្រាបថា BIGBANG បានគ្របដណ្ដប់លើវិស័យ K-pop អស់រយៈពេលជាច្រើនឆ្នាំ បន្ទាប់ពីការបង្ហាញវត្តមានជាលើកដំបូងនៅក្នុងឆ្នាំ ២០០៦ ដែលមានសមាជិកសរុបចំនួន៥នាក់ ខណៈដែលបច្ចុប្បន្នក្នុងចំណោមពួកគេដែលកំពុងបន្តអាជីពចម្រៀង ប្រែខ្លួនជាតារាចម្រៀងទោល៕ (ប្រភពពី Reuters)
ចែករំលែកព័តមាននេះ