រាជធានីភ្នំពេញ៖ ស្ថានទូតជប៉ុនប្រចាំព្រះរាជាណាចក្រកម្ពុជា រួមសហការជាមួយ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ការិយាល័យទំនាក់ទំនងភ្នំពេញ នៃមូលនិធិជប៉ុន រៀបចំនូវមហោស្រពគីហ្សូណាជប៉ុន-កម្ពុជា លើកទី១២ ដែលជាកម្មវិធីវប្បធម៌ដ៏ធំមួយ…
រាជធានីភ្នំពេញ៖ ស្ថានទូតជប៉ុនប្រចាំព្រះរាជាណាចក្រកម្ពុជា រួមសហការជាមួយ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ការិយាល័យទំនាក់ទំនងភ្នំពេញ នៃមូលនិធិជប៉ុន រៀបចំនូវមហោស្រពគីហ្សូណាជប៉ុន-កម្ពុជា លើកទី១២ ដែលជាកម្មវិធីវប្បធម៌ដ៏ធំមួយ ក្នុងចំណោមកម្មវិធីធំៗនានា នៃខួបអនុស្សាវរីយ៍លើកទី៧០ នៃមិត្តភាពជប៉ុន-កម្ពុជា ។
មហោស្រពគីហ្សូណាជប៉ុន-កម្ពុជា ត្រូវបានរៀបចំឡើងជារៀងរាល់ឆ្នាំ ចាប់តាំងពីឆ្នាំ ២០១២ ក្នុងគោលបំណងបង្ហាញពីវប្បធម៌ជប៉ុន និងកម្ពុជា ក៏ដូចជាការជម្រុញការផ្លាស់ប្ដូរនានារវាងប្រជា ជននៃប្រទេសទាំងពីរផងដែរ ។
នាឱកាសថ្ងៃបើកមហោស្រពនេះផងដែរ ឯកឧត្តម តាកិអ៊ិ ស៊ុនស៊ុកិ អនុរដ្ឋមន្ត្រីការបរទេសជប៉ុន បានថ្លែងថា៖ «ឆ្នាំនេះគឺជាឆ្នាំនៃខួបអនុស្សាវរីយ៍លើកទី៧០ នៃមិត្តភាពជប៉ុននិងកម្ពុជា។ រយៈពេល ៧០ ឆ្នាំមកនេះ ចំណងមិត្តភាពដ៏រឹងមាំរបស់ប្រទេសយើងទាំងពីរ បានរីកចម្រើនតាមរយៈកិច្ចសហការប្រតិបត្តិការក្នុងដំណើរការស្វែងរកសន្តិភាពនៅកម្ពុជា ការកសាងប្រទេសឡើងវិញ និងការអភិវឌ្ឍសេដ្ឋកិច្ចសង្គមរបស់កម្ពុជា។ តាមរយៈមហោស្រពនេះ ខ្ញុំសង្ឃឹមថាអ្នកចូលរួមនឹងមានអារម្មណ៍កាន់តែស្និទ្ធស្នាលជាមួយប្រទេសជប៉ុន និងបានយល់ដឹងកាន់តែស៊ីជម្រៅទៅលើវប្បធម៌ខ្មែរ និងជប៉ុន ក្រោយបានចូលរួមកម្មវិធីនានា ក្នុងមហោស្រពនេះ» ។
ជាមួយគ្នានេះផងដែរ លោកជំទាវ ប៉ែន មុនីមករា រដ្ឋលេខាធិការក្រសួងវប្បធម៌និងវិចិត្រសិល្បៈ បានថ្លែងថា៖ «តាមរយៈវិស័យវប្បធម៌ ជប៉ុនតែងតែជួយឧបត្ថម្ភគាំទ្រដល់ព្រះរាជាណាចក្រកម្ពុជាលើការអភិរក្ស អភិវឌ្ឍវប្បធម៌ ជាពិសេសការជួយជួសជុលប្រសាទនានាក្នុងតំបន់អង្គរ ក្នុងខេត្តសៀមរាប។ ទន្ទឹមនោះប្រទេសយើងទាំងពីរតែងតែជួយ ឧបត្ថម្ភគាំទ្រគ្នាទៅវិញទៅមកក្នុងតំបន់ក៏ដូចជាអន្តរជាតិនៅពេលចាំបាច់» ។
សូមជម្រាបផងដែរថា ប្រធានបទក្នុងកម្មវិធីមហោស្រពក្នុងឆ្នាំនេះគឺ «មិត្តភាពស្រស់បំព្រងរបស់យើង A Blossoming Friendship» ដែលគូស បញ្ជាក់ពីចំណងមិត្តភាពរវាងជប៉ុន និងកម្ពុជា ក្នុងរយៈពេល ៧០ ឆ្នាំ ។ ក្នុងពិធីបើកក៏មានវត្តមាន ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា ឯកឧត្តម ចាន់ រតនា អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និង ព្រមទាំងភ្ញៀវកិត្តិយស ជាច្រើនរូបទៀត ។ មិនត្រឹមតែប៉ុណ្ណោះក៏មានការសម្តែង ដោយផ្ទាល់ពីអគ្គរាជទូតសុឆន្ទៈនៃខួបអនុស្សាវរីយ៍លើកទី៧០ នៃមិត្តភាពជប៉ុន-កម្ពុជា គឺលោកស្រី មិណាមិណុ យូកុ ដែលជាតារាចម្រៀង និងសម្ដែង និងកញ្ញា ម៉ម ឡរ៉ា ទេវរី ជាសិល្បករខ្មែរ-អា មេរិកាំង ដែលជាអ្នកនិពន្ធបទចម្រៀង អ្នកផលិតតន្ត្រី អ្នកជំនួញ និងជាសហស្ថាបនិកនៃផលិតកម្មបារមី ។
គួរបញ្ជាក់ផងដែរថា មហោស្រពគីហ្សូណាជប៉ុន-កម្ពុជា ២០២៣ ប្រព្រឹត្តិទៅចាប់ពីថ្ងៃទី២៣ ដល់ថ្ងៃទី២៦ ខែកុម្ភៈ ឆ្នាំ២០២៣ នៅCJCC ។ កម្មវិធីចម្បងរៀបចំក្នុងសាលអង្គរ-គីហ្សូណានៃ CJCC នៅក្នុងមហោស្រពរួមមាន ៖ ការប្រគំតន្ត្រីពិសេស កម្មវិធីល្បងប្រាជ្ញាសប្បាយៗស្តីអំពីជប៉ុន និងកម្ពុជា, ការសម្ដែងខ្នាតតូចពី Cosplay, បទពិសោធន៍ជាមួយកីឡាកេនដូ, បទពិសោធន៍ជាមួយកីឡាអគីដូ, ប្រគំតន្ត្រីអុប៉េរ៉ាកម្ពុជា-ពេលវេលាដ៏អស្ចារ្យជាមួយរីយ៉ូកុ អ៊ុកដា, ការប្រគំតន្ត្រីខ្នាតតូចជប៉ុន, ការប្រគំតន្ត្រីអាខូស្ទិកខ្មែរ ។ល។ ៕
ចែករំលែកព័តមាននេះ