ខេត្តកណ្តាល ៖ ផ្ទុះការចាប់អារម្មណ៍ជាខ្លាំងនៅលើបណ្តាញសង្គមហ្វេកប៊ុក និងTik Tok ទៅលើក្មេងប្រុសម្នាក់ដែលមានសំឡេងពិរោះអន្លង់អន្លូចមិនធម្មតា ដោយមានមហាជនជាច្រើនបានកោតសរសើរនៅទឹកដមសំឡេងដ៏ផ្អែមស្រទន់ តាមរយៈបទចម្រៀងដែលប្អូនបានបកស្រាយដូចជាបទ«ដាក់ទានស្នេហ៍បង» «ដំណាក់ចង្អើរ» និងបទ…
ខេត្តកណ្តាល ៖ ផ្ទុះការចាប់អារម្មណ៍ជាខ្លាំងនៅលើបណ្តាញសង្គមហ្វេកប៊ុក និងTik Tok ទៅលើក្មេងប្រុសម្នាក់ដែលមានសំឡេងពិរោះអន្លង់អន្លូចមិនធម្មតា ដោយមានមហាជនជាច្រើនបានកោតសរសើរនៅទឹកដមសំឡេងដ៏ផ្អែមស្រទន់ តាមរយៈបទចម្រៀងដែលប្អូនបានបកស្រាយដូចជាបទ«ដាក់ទានស្នេហ៍បង» «ដំណាក់ចង្អើរ» និងបទ «និស្ស័យស្នេហ៍»ជាដើម។
ក្រោយផ្ទុះនៅបទដាក់ទានស្នេហ៍បង ស្រាប់តែផារិន បានទម្លាយមហិច្ចតាដ៏មុតស្រួតរបស់ខ្លួន ដោយនាពេលអនាគតចង់ក្លាយជាតារាចម្រៀងដ៏ល្បីម្នាក់ដែលមានការគាំទ្រច្រើនពីសំណាក់មហាជន។
ប្រាកដណាស់ ជុំវិញការផ្ទុះនៅបទមួយនេះមានមហានជនជាច្រើនចង់ដឹងពីជីវិតរបស់ប្អូនរូបនេះថា តើសុខទុក្ខយ៉ាងណាជីវភាពគ្រួសារយ៉ាងណាដែរ?
លើសពីនេះទៀត តើក្រោយការផ្ទុះនៅបទមួយនេះ តើនរណាគេជាអ្នកផ្តួចផ្តើម? តាមរយៈបទសម្ភាសន៍ជាមួយកម្មវិធី 60Buzz នៃសារព័ត៌មានកោះសន្តិភាព បានអោយដឹងថា ផារិន ជាក្មេងម្នាក់ដែលបានកើតចេញពីគ្រួសារកសិករ ដែលមានទីលំនៅ ភូមិអំពៅព្រៃ ឃុំអំពៅព្រៃ ស្រុកកណ្តាលស្ទឹង ខេត្តកណ្តាល។ផារិនជាក្មេងម្នាក់ដែលឧស្សាហ៍ព្យាយាម ដោយក្រៅពីការសិក្សា ផារិន បានជួយធ្វើការឪពុកម្តាយ ដោយជួនកាលត្រូវជួយរកក្តាម ឬបះស្តៅ ដើម្បីដោះស្រាយជីវភាពគ្រួសាររបស់ខ្លួន ក្រៅពីរបរទាំងនេះ ផារិន ក៏ឆ្លៀតពេលទំនេរខ្លះៗក្នុងការ Cover បទចម្រៀងផងដែរ។
បទចម្រៀងដែលប្អូនផារិនបានបកស្រាយក៏ទទួលបាននៅការគាំទ្រនេះ គឺកើតចេញពីការផ្តួចផ្តើមរបស់បងប្រុសជីដូនមួយខ្លួនដែលមានឈ្មោះថា រុំ តុលា ដែលតែងតែជួយណែនាំប្អូន និងការសម្រួលចង្វាក់ភ្លេង និងជួយជ្រុំជ្រែងដល់ប្អូនជាច្រើនទៀតដែលទាក់ទងជាមួយចម្រៀង។
ក្រៅពីនេះ ផារិន ដែលមានវ័យ១៣ឆ្នាំរូបនេះបានពោលបន្តថា នាពេលអនាគតប្អូនចង់ក្លាយជាតារាចម្រៀងមួយរូបដែលមានមហាជនស្គាល់ច្រើនដោយផារិនក៏បានទម្លាយអារម្មណ៍មហិច្ចតា និងកូនចិត្តដ៏មុតស្រួចក្នុងការប្រឡងចម្រៀងនៅក្នុងកម្មវិធីផ្សេងៗដោយនាពេលនេះ ផារិន បាននឹងកំពុងតែហាត់ពត់សំឡេងបន្ថែម ដើម្បីអោយសំឡេងរបស់ខ្លួនកាន់តែមានភាពល្អជាងនេះបន្ថែមទៀត។
ផារិនបានបន្តថា នាពេលបច្ចុប្បន្ននេះ ខ្លួនទើបតែ Cover បាន៣បទប៉ុណ្ណោះ តាមរយៈបទដែលទទួលបានការគាំទ្រខាងលើបន្ថែមពីនេះ ផារិន បានបង្ហើបថា ខ្លួនកំពុងតែ Cover ពីរបីបទបន្ថែមទៀត ដោយប្អូនសុំធ្វើការលាក់ចំណងជើងសិន ដោយពេលប៉ុន្មានថ្ងៃទៀតអាចនឹងមានបទ Cover ចេញជាបន្តបន្ទាប់ទៀត ដើម្បីបម្រើអារម្មណ៍របស់ប្រិយមិត្តពុកម៉ែបងប្អូនបន្តទៀត។
បើងាកមករឿងជីវភាពគ្រួរសារវិញ ផារិន បាននិយាយរៀបថា សព្វថ្ងៃនេះ ខ្លួនមានបងប្អូនរហូតដល់ទៅ៧នាក់ ដោយខ្លួនជាកូនពៅ សម្រាប់ជីវភាពគ្រួសារប្អូនក៏មានការខ្វះខាតដោយពេលខ្លះត្រវទៅបះស្តៅជាម្តាយ ឬរកក្តាម ដើម្បីជួយសម្រួលជីវភាពនៅក្នុងគ្រួសារ។
ជាចុងក្រោយ ពន្លកសិល្បៈដែលទើបនឹងរះប្អូន ផារិនសូមអរគុណជាអនេកសម្រាប់បងប្អូនមហាជនដែលបានគាំទ្រប្អូនតាមរយៈចម្រៀងខាងលើ ដោយប្អូនមានការគោរពពីចម្ងាយ សូមអោយបងប្អូនជួបប្រទះតែភាពសុខសុភមង្គលក្នុងក្រុមគ្រួសារ៕ ដោយ ៖ ឆៃ
ចែករំលែកព័តមាននេះ