ភាពយន្តខ្លី៥៥រឿងនៃ «មហោស្រពភាពយន្តខ្លីចតុមុខ» នឹងចាក់បញ្ចាំងតាមរោងភាពយន្តទំនើប
- ភ្នំពេញ
ភាពយន្តដែលបានសម្រាំងសម្រាប់ការប្រកួតប្រជែងក្នុងមហោស្រពភាពយន្តខ្លីចតុមុខ នឹងចាក់បញ្ចាំងចាប់ពីថ្ងៃទី
រាជធានីភ្នំពេញ ៖ ភាពយន្តដែលបានសម្រាំងសម្រាប់ការប្រកួតប្រជែងក្នុងមហោស្រពភាពយន្តខ្លីចតុមុខ នឹងចាក់បញ្ចាំងចាប់ពីថ្ងៃទី២៥ ដល់ថ្ងៃទី២៨ ខែវិច្ឆិកា ឆ្នាំ២០២២ នៅសាលសន្និសីទចតុមុខ រោងកុន Major Cineplix និងរោងភាពយន្ដ Legend ជូនមហាជនទស្សនា។
មហោស្រពភាពយន្តខ្លីចតុមុខ (Chaktomuk Short Film Festival/CSFF) បានរៀបចំកម្មវិធីសន្និសីទសារព័ត៌មាន របស់ខ្លួនកាលពីព្រឹកថ្ងៃទី២១ ខែវិច្ឆិកា ឆ្នាំ២០២២ នៅរោងភាពយន្ត Legend Premium Noro Mall ដែលមានការចូលរួមពីប្រធានការិយាល័យរដ្ឋបាល នៃនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ លោក ណុប វាសនា ប្រធានមហោស្រព ឆ្នាំ២០២២ លោក ស៊ុំ ស៊ីថែន និងដៃគូសហការផ្សេងៗ និងសមិទ្ធករ និងតារាសម្តែងភាពយន្តជាច្រើនរូប។
កម្មវិធីសន្និសីទសារព័ត៌មាននេះ ធ្វើឡើងក្នុងគោលបំណងចែករំលែកព័ត៌មានសំខាន់ៗ និងលក្ខណៈពិសេសរបស់មហោស្រពនៅឆ្នាំនេះផ្ទាល់ ទៅកាន់ដៃគូសហការ ក៏ដូចជាទស្សនិកជន ដែលតែងតែគាំទ្រ និងទន្ទឹងរង់ចាំពីមហោស្រពកន្លងមក។
ប្រធានមហោស្រពឆ្នាំ២០២២ លោក ស៊ុំ ស៊ីថែន បានលើកឡើងថា ៖ ឆ្នាំនេះ មហោស្រពមានលក្ខណៈពិសេស៥ចំណុច ដែលក្នុងនោះរួមមាន ៖
ទី១- កំណើននៃការដាក់រឿងក្នុងស្រុក ដោយឆ្នាំនះ មហោស្រពទទួលបានភាពយន្តខ្លីដល់ទៅចំនួន១៨៥រឿងសរុប តែសម្រាំងតែ៥៥ចំណងជើង ដើម្បីប្រកួត និងចាក់បង្ហាញ។ លោកបញ្ជាក់ថា ជាក់ស្តែងកាលពីឆ្នាំទៅ ភាពយន្តខ្លីប្រឌិតកម្ពុជាមានតែ២៧រឿងទេ ឆ្នាំនេះទទួលបាន៣៦រឿង គឺកើនបាន៩រឿង។ នេះសរបញ្ជាក់ថា បន្ទាប់ពីវិបត្តិកូវីដ សមិទ្ធករយើងចាប់ផ្តើមសកម្មភាពថតដូចកាលពីមុនវិបត្តិនេះវិញ។
ទី២- កម្រិតគុណភាពមានការកើនឡើង ដោយអ្នករៀបចំសម្អាងលើទិដ្ឋភាព ត្រង់ថាមានរឿង២ ដែលទទួលបានពានរង្វាន់អន្តរជាតិរួចហើយ តែក៏មានវត្តមានក្នុងមហោស្រពឆ្នាំនេះដែរ។ ម្យ៉ាងទៀត សូម្បីតែជ័យលាភីឆ្នាំ២០២១ ក៏បានដាក់រឿងថ្មីរបស់ខ្លួនក្នុងឆ្នាំនេះដែរ។ ទាំងនេះជាតឹកតាងដែលបញ្ជាក់ថា ពីមួយឆ្នាំទៅមួយឆ្នាំ យុវសមិទ្ធករប្រឹងប្រែងដុសខាត់ស្នាដៃ ដើម្បីដាក់ប្រកួតមហោស្រពនានា ជាពិសេស CSFF នេះឯង។
ទី៣- រង្វាន់ច្រើនជាងឆ្នាំមុនៗ ដោយនៅក្នុងនោះភាពយន្តខ្លីកម្ពុជាល្អបំផុត ទទួលរង្វាន់ទឹកប្រាក់ចំនួន ១០០០ដុល្លារ និងពាន១ ហើយភាពយន្តខ្លីកម្ពុជាល្អបន្ទាប់ ទទួលបាន៥០០ដុល្លារ និងពាន១ ខណៈពេលភាពយន្តខ្លីអន្តរជាតិល្អបំផុត ទទួលបាន៣០០ដុល្លារ និងពាន១។ លោកបន្តថា ដោយ ឡែកសម្រាប់រង្វាន់ទស្សនិកជនដល់ភាពយន្តខ្លីក្នុងស្រុក ទទួលបាន ៣០០ដុល្លារ និងលិខិតសរសើរ និងរង្វាន់ទស្សនិកជនដល់ភាពយន្តខ្លីអន្តរជាតិ ទទួលបានលិខិតសរសើរ ចំណារលើកទឹកចិត្តពីមេប្រយោគកម្ពុជា (Cambodian Special Jury Mention) ព្រមទាំងលិខិតសរសើរចំណារលើកទឹកចិត្តពីមេប្រយោគកម្ពុជា (International Special Jury Mention) ។
ទី៤- ភាពយន្តខ្លីពិសេស សម្រាប់ពិធីបើក និងបិទ ដោយពិធីបើកជំនាន់ទី១១នេះ នឹងរំលេចស្នាដៃរបស់យុវសមិទ្ធករឯករាជ្យ១រូប គឺអ្នកនាង មាស ស្រីលីន តាមរយៈភាពយន្តខ្លី របស់គាត់រឿង «សុបិនកាលីហ្វ័រញ៉ា» (California Dreaming)។ លោកបញ្ជាក់ថា រឿងនេះ មានការកោតសរសើរពីឆាកអន្តរជាតិ ដោយនិយាយពីទំនាក់ទំនងលាក់បាំងរវាងនារី២នាក់ ដែលមកពីសាវតារផ្សេងគ្នា។
រីឯពិធីបិទវិញ នឹងមានបញ្ចាំងភាពយន្តខ្លីរឿង «ភាសាម្តាយខ្ញុំ» ដែលដឹកនាំលោក ភូ ហ្សង់បាបទីស្ត ដែលវីដេអូលាយជីវចល សម្លេង និងគំនូរបែបសហសម័យ។ រឿងនេះ ផ្តោតលើភាពអាលោះអាល័យរបស់សមិទ្ធករទៅដល់ម្តាយខ្លួនដែលជាខ្មែរកាត់ចិន ដែលជន្លៀសទៅរស់នៅប្រទេសបារាំង និងទី៥ ដំណើរត្រឡប់មករោងភាពយន្តទំនើបវិញ ដោយភាពយន្តខ្លីទាំងអស់នឹងត្រូវធ្វើការចាក់បញ្ចាំងទីតាំងនៅតាមរោងភាពយន្តដែលជាដៃគូសហការរបស់យើង ដូចជាសាលសន្និសីទចតុមុខ រោងភាពយន្ត Legend Premium Noro Mall និងរោងភាពយន្ត Major Cineplex by Smart Sorya។
បើតាមលោក ស៊ុំ ស៊ីថែន ថា នេះជាការបើកសករាជថ្មី នៃ CSFF បន្ទាប់ពីខកខានពាំនាំភាពយន្តខ្លីទៅរោងភាពយន្តទំនើបអស់រយៈពេល៣ឆ្នាំមកហើយ ដោយកត្តាភស្តុភារផង និងជំងឺរាតត្បាតសកលផង។ មហោស្រពធំរបស់យើង គ្រោងនឹងប្រព្រឹត្តទៅពីថ្ងៃទី២៥ ដល់ទី២៨ ខែវិច្ឆិកា ឆ្នាំនេះ ដោយមានរយៈពេលសរុប៤ថ្ងៃជាប់ៗគ្នា។ ហើយទស្សនិកជន ដែលចង់លើកទឹកចិត្តយុវសមិទ្ធករយើងអាចទៅទស្សនារាល់រឿងខ្លីជាប់ជម្រើសទាំងអស់នេះ ក៏ដូចជាបោះឆ្នោតគាំទ្រដោយផ្ទាល់ដល់រឿងដែលខ្លួនពេញចិត្តនៅសាលសន្និសីទចតុម្មុខ រោងភាពយន្តLegend Cinema – Noro Mall, និង Major Cineplex by Smart Sorya៕
ចែករំលែកព័តមាននេះ