រាជធានីភ្នំពេញ ៖ មហាជនជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង បន្ទាប់ពីបានឃើញតារាចម្រៀងរ៉េប Vid Cooler បានប្រកាសក្តែងៗពីការដាក់ពាក្យបណ្តឹងប្តឹងទៅកាន់តារាចម្រៀងរ៉េបដូចគ្នា គឺប្រុសឡា និងប្អូន ដែលមានជម្លោះឈានទៅដល់ការប្រើអំពើហិង្សាបង្កជារបួសស្នាម។…
រាជធានីភ្នំពេញ ៖ មហាជនជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង បន្ទាប់ពីបានឃើញតារាចម្រៀងរ៉េប Vid Cooler បានប្រកាសក្តែងៗពីការដាក់ពាក្យបណ្តឹងប្តឹងទៅកាន់តារាចម្រៀងរ៉េបដូចគ្នា គឺប្រុសឡា និងប្អូន ដែលមានជម្លោះឈានទៅដល់ការប្រើអំពើហិង្សាបង្កជារបួសស្នាម។
គេមិនទាន់ដឹងថា ជម្លោះរវាងក្រុមតារាចម្រៀងរ៉េបទាំងពីរនាក់ខាងលើនេះ ផ្តើមចេញពីបញ្ហាអ្វីនោះឡើយ ប៉ុន្តែបើតាមការបញ្ជាក់តាមរយៈពាក្យបណ្តឹងរបស់លោក Vid Cooler បានឲ្យដឹងថា ហេតុការណ៍ជម្លោះនោះ បានកើតឡើងនៅក្នុងហាងមួយកន្លែង ស្ថិតនៅក្នុងសង្កាត់ជ័យជំនះ ខណ្ឌដូនពេញ កាលពីថ្ងៃទី៦ ខែសីហា ឆ្នាំ២០២០មកម្ល៉េះ។
យ៉ាងណា ទំនងជាមិនមានការចូលដោះស្រាយលើបញ្ហាជម្លោះខាងលើនេះ ទើបធ្វើឱ្យតារាចម្រៀងលោក Vid Cooler ក៏បានទម្លាយរឿងរ៉ាវមួយនេះតាមបណ្តាញសង្គមហ្វេសប៊ុកឲ្យមហាជនបានដឹងពីការប្រព្រឹត្តរឿងមិនគប្បីពីសំណាក់តារាចម្រៀងរ៉េបដែលល្បីតាមរយៈបទ «នារីសក់ខ្លី» នេះតែម្តង។
បើយោងតាមអ្វីដែល Vid Cooler បានសរសេរសារបង្ហោះតាមបណ្តាញសង្គមហ្វេសប៊ុកនោះ បានឲ្យដឹងថា ស្វាគមន៍លោក តារាល្បីៗ ទាំងប៉ុន្មានដួងនៅខាងក្រោមនេះ..! ។
លោកបញ្ជាក់ថា សូមលោកអញ្ជើញមកតុលាការ មើម្បីដោះស្រាយរឿងនេះ ខ្ញុំរង់ចាំនៅតុលាការ…!! មានភស្តុតាងនេះ រឿងស្អុយជាច្រើនដែលលោកត្រូវចូលខ្លួន…!! កុំគេចវេះ ព្រោះរឿងនេះ បើមិនដោះស្រាយ គឺវាជាប់ជាមួយអស់លោកមួយជីវិត…!!។ ចុងក្រោយ ខ្ញុំពិតជាសោកស្ដាយណាស់ ដែលពួកគាត់ជាបុគ្គលគំរូ ទៅកាន់ក្មេងជំនាន់ក្រោយ ដែលប្រព្រឹត្តអំពើហិង្សាដែលសង្គមមិនគាំទ្រ!។
ដោយឡែកជុំវិញករណីជម្លោះខាងលើនេះ បើតាមឯកសារពាក្យបណ្ដឹងដែល Vid Cooler បានបង្ហោះនោះបានឲ្យដឹងពីសាច់រឿងនៃដើមចមនោះថា ករណីហិង្សានេះ បានកើតឡើងកាលពីថ្ងៃទី៦ ខែសីហា ២០២០ នៅវេលាម៉ោង ៤ :០០ ដោយរូបលោក (Vid Cooler) បានទៅទទួលទានអាហារនៅហាងផ្ទះលេខ ២៥ E0 ផ្លូវលេខ ១៨៤ សង្កាត់ជ័យជំនះ ខណ្ឌដូនពេញ ដោយខាងលោកមានគ្នា២នាក់អង្គុយញ៉ាំស្រាបៀ។ ពេលនោះ លោកបានដើរទៅតុមួយផ្សេងដែលមានប្រុសឡា និងគ្នីគ្នា៤នាក់កំពុងញ៉ាំអាហារជុំគ្នាដែរ។
Vid Cooler បញ្ជាក់ថា លោកបានយកកែវទៅក្នុងបំណងសុំជល់កែវជាមួយភាគីប្រុសឡា ហើយពេលនោះ ប្រុសឡា បាននិយាយថា «ថ្ងៃនេះវាបង់លុយ» ហើយលោកបានហៅប្រុសឡា ចេញមកក្រៅដើម្បីនិយាយគ្នា ប៉ុន្តែពេលចេញដល់ខាងក្រៅ មិនទាន់បាននិយាយគ្នាផង ស្រាប់តែឈ្មោះ 4t5 ដែលលោកអះអាងថា ជាប្អូនរបស់ប្រុសឡា បានយកដបស្រាវាយលោក បណ្ដាលឲ្យរបួសដេរ៣០ថ្នេរ ឯអ្នកបង្កក៏បានគេចខ្លួនបាត់ទៅ។
ជាការកត់សម្គាល់ ពាក់ព័ន្ធបញ្ហាខាងលើនេះ គេនៅមិនទាន់បានដឹងនៅឡើយទេថា ភាគីទាំងពីរបានសម្រេចដោះស្រាយគ្នាយ៉ាងណានោះឡើយ ក្នុងពេលដែលហេតុការណ៍នេះបានកើតឡើងមកជាច្រើនខែមកហើយ ប៉ុន្តែលោក Vid Cooler ទើបតែបញ្ចេញឲ្យមហាជនបានដឹងនៅថ្ងៃទី២៦ ខែមករា ឆ្នាំ២០២១នេះប៉ុណ្ណោះ។
ទោះជាយ៉ាងណា នេះចាត់ទុកជាករណីមួយថ្មីមួយទៀតសម្រាប់ជម្លោះដែលបានកើតមានឡើងនៅក្នុងចង្កោមតារាចម្រៀងរ៉េប នៅស្រុកខ្មែរ បន្ទាប់ពីកន្លងមក គេក៏ឃើញមានជម្លោះដ៏ក្តៅគគុករវាងតារាចម្រៀងលោក ជីដេវីដ និងក្រុមរ៉េបខ្មែរមួយជីវិតតាមរយៈការចេញបទឌឺដងដាក់គ្នា ជាមួយនឹងការបង្ហោះសារដៀមដាបដាក់គ្នាទៅវិញទៅមកផងដែរ៕
ចែករំលែកព័តមាននេះ