អតីតតារាចម្រៀងដ៏ល្បីល្បាញនាង ទូច ស៊ុននិច បានបង្ហាញអារម្មណ៍ចង់វិលមកមាតុប្រទេសជាថ្មីនៅក្នុងអំឡុងពេលណាមួយ ក្នុងពេលដែលនាងបាននិងកំពុងសម្រាលព្យាបាលជំងឺនៅនៅក្រៅប្រទេសជាច្រើនឆ្នាំមកហើយ។ ទូច ស៊ុននិច ហាក់មានការនឹករលឹកមកដល់ប្រទេសកម្ពុជា ជាពិសេសខេត្តសៀមរាបដែលមានប្រាសាទអង្គរវត្ត ដែលនាងធ្លាប់មានអនស្សាវរីយ៍កាលពីប៉ុន្មានឆ្នាំកន្លងទៅ…
អតីតតារាចម្រៀងដ៏ល្បីល្បាញនាង ទូច ស៊ុននិច បានបង្ហាញអារម្មណ៍ចង់វិលមកមាតុប្រទេសជាថ្មីនៅក្នុងអំឡុងពេលណាមួយ ក្នុងពេលដែលនាងបាននិងកំពុងសម្រាលព្យាបាលជំងឺនៅនៅក្រៅប្រទេសជាច្រើនឆ្នាំមកហើយ។
ទូច ស៊ុននិច ហាក់មានការនឹករលឹកមកដល់ប្រទេសកម្ពុជា ជាពិសេសខេត្តសៀមរាបដែលមានប្រាសាទអង្គរវត្ត ដែលនាងធ្លាប់មានអនស្សាវរីយ៍កាលពីប៉ុន្មានឆ្នាំកន្លងទៅ ដែលនាងបានសម្តែងច្រៀងនៅទីនោះ។
ទូច ស៊ុននិច បានបង្ហោះសារតាមគណនេយ្យហ្វេសប៊ុករបស់ខ្លួន ដោយភ្ជាប់ជាមួយរូបថតកាលពីអតីតកាលនៅលើទឹកដីអច្ឆរិយថា រូបថតអនុស្សាវរីយ៍កាលពីឆ្នាំ២០០២ ពេលដែលនាងខ្ញុំទៅសំដែង concert នៅខេត្តសៀមរាប ហើយឆ្លៀតពេលក្រុមគ្រួសារខ្ញុំ មានលោកប៉ា អ្នកម៉ាក់ ប្អូនប្រុស និងនាងខ្ញុំ បានទៅទស្សនាកំសាន្តនៅតាមប្រាសាទបុរាណដ៏អច្ឆរិយ ដែលជាកេរ្ដិ៍តំណែលរបស់បុព្វបុរសខ្មែរយើងបន្សល់ទុកអោយកូនខ្មែរជំនាន់ក្រោយការពារថែរក្សាជាដួងព្រលឹងជាតិ។
នាងថា នាងខ្ញុំមានការស្ញប់ស្ញែង និងមានមោទនភាពខ្លាំងណាស់ចំពោះសំណង់ប្រាសាទបុរាណដ៏អច្ឆរិយៈរបស់ដូនតាខ្មែរ។ នាងបញ្ជាក់ថា នាងខ្ញុំស្រលាញ់ និងនឹករលឹកទៅដល់ទឹកដីសុវណ្ណភូមិខ្មែរជានិច្ច ហើយថ្ងៃណាមួយនាងខ្ញុំនឹងទៅគោរពសក្ការ និងបានដើរទស្សនានៅតាមប្រាសាទបុរាណដ៏អច្ឆរិយដែលជាកេរ្ដិ៍តំណែលរបស់បុព្វបុរសខ្មែរយើងវិញទៀតជាក់ជាមិនខាន។
រហូតមកទល់ពេលនេះ តារាចម្រៀងនាង ទូច ស៊ុននិច បាននិងកំពុងសម្រាកព្យាបាលជំងឺរបស់នាងនៅទឹកដីអាមេរិក ក្រោយពេលដែលនាងទទួលរងនូវការបាញ់ប្រហារយ៉ាងឃោរឃៅអស់ពេលជាច្រើនឆ្នាំមកនេះ។ នាងបានធ្លាក់ខ្លួនពិការសម្រាកតែនៅលើគ្រែក្នុងផ្ទះរបស់នាង ក្នុងទីក្រុង Sacramento នៃរដ្ឋ California សហរដ្ឋអាមេរិក។ នាងកំពុងរស់នៅក្រោមការមើលថែពីឪពុកនាង ដើម្បីជួយធ្វើចលនាខ្លួនប្រាណឲ្យមានសកម្មភាព ដូចជាជួយក្នុងការហាត់ប្រាណ ដើម្បីឲ្យដំណើរឈាមរត់ស្រួល។
កន្លងមក ទូច ស៊ុននិច ក៏ធ្លាប់់អះអាងស្រដៀងគ្នានេះថា នាងនៅតែមានអារម្មណ៍នឹកទៅដល់ស្រុកខ្មែរជានិច្ច ទោះបីជានាងធ្លាក់ខ្លួនពិការសម្រាន្តនៅលើគ្រែក៏ដោយ នាងនៅតែមានមហិច្ឆតាចង់ធ្វើជាអ្នកចម្រៀង និងជាគ្រូបង្រៀននៅស្រុកខ្មែរ ដែលជាអាជីពរបស់នាងពីមុនមក។ ដូច្នេះហើយ ទូច ស៊ុននិច តែងតែបង្ហោះយូធូបនូវបទចម្រៀងរបស់នាងចាស់ៗតាមបណ្តាញសង្គមហ្វេសប៊ុករបស់នាងជាបន្តបន្ទាប់៕
ចែករំលែកព័តមាននេះ